Romans 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1Mga utod, daku gid ang handom sang bug-os ko nga tagipusoon nga ang akon mga kasimanwa maluwas! Daw ano ang pagpangamuyo ko sa Dios tungod sa ila!

2Sarang ako makasaksi nga matutom gid sila sa pag-alagad sa Dios, pero ang ila pagkatutom indi sa husto nga paagi tungod kay wala sila makahibalo.

3Kay wala sila makahangop kon paano batunon sang Dios ang mga tawo, sa baylo nagahimuhimo sila sang ila kaugalingon nga paagi. Gani, wala sila magpasakop sa pamaagi sang Dios sa pagbaton sang mga tawo.

4Kay si Cristo amo ang katapusan sang Kasugoan, agod nga mabaton sa atubang sang Dios ang tagsatagsa nga nagatuo.

5Amo ini ang ginsulat ni Moises nahanungod sa pagbaton sang Dios sa mga tawo paagi sa pagtuman sang Kasugoan: “Ang bisan sin-o nga nagatuman sang mga mando sang Kasugoan magakabuhi.”

6Pero amo ini ang ginsiling sang kasulatan nahanungod sa pagbaton sang Dios sa mga tawo paagi sa pagtuo: “Indi ka magsiling sa imo kaugalingon, Sin-o bala ang mapalangit?” (kon sayuron, sa pagdala kay Cristo sa idalom).

7“Indi ka man magsiling, Sin-o bala ang magapanaog sa kadadalman sang duta?” (kon sayuron, sa pagdala kay Cristo sa ibabaw halin sa mga minatay).

8Amo ini ang ginasiling sang kasulatan: “Ang pulong sang Dios malapit na sa inyo, sa inyo mga bibig kag sa inyo tagipusoon”—kon sayuron, ang pulong sang pagtuo nga amon ginawali.

9Kon imo ginapabutyag sa mga tawo nga “si Jesus Ginoo,” kag nagatuo ka sa imo tagipusoon nga ginbanhaw sia sang Dios halin sa mga minatay, maluwas ka.

10Ang Dios magabaton kag magaluwas sa imo, kon ikaw magtuo kag magsugid sini sa iban.

11Ang kasulatan nagasiling, “Ang tagsatagsa nga nagatuo sa iya indi mapaslawan.”

12Ini para sa tanan, tungod kay wala sing kinatuhay ang mga Judio sa mga Hentil. Ang Dios amo man ang Ginoo sang tanan, kag nagahatag sia sing bugana nga kaayuhan sa tanan nga nagapanawag sa iya.

13Ang kasulatan nagasiling, “Ang tagsatagsa nga nagapanawag sa ngalan sang Ginoo maluwas.”

14Pero paano bala ang pagpanawag nila sa iya, kon wala sila magtuo? Kag paano bala ang pagtuo nila sa iya, kon wala sila makabati sang pulong sang Dios? Kag paano bala ang pagkabati nila, kon wala mawali sa ila ang pulong sang Dios?

15Kag paano bala ang pagwali sang pulong sang Dios, kon wala mapadala ang mga manugwali? Ang kasulatan nagasiling, “Daw ano katahom tulokon ang pag-abot sang mga manugwali sang maayong balita!”

16Pero indi ang tanan nagbaton sang Maayong Balita! Si Isaias mismo nagsiling, “Ginoo, sin-o bala ang nagpati sang amon ginwali?”

17Gani, ang pagtuo nagagikan sa pagpamati sang pulong sang Dios, kag ang pulong sang Dios nagaabot paagi sa pagwali nahanungod kay Cristo.

18Pero mamangkot ako: Matuod bala nga wala sila makabati sang pulong sang Dios? Huo, nakabati gid sila! Kay ang kasulatan nagasiling: “Ang ila mga tingog nabatian sa bug-os nga duta, ang ila mga pulong nakalambot sa mga ukbong sang kalibutan.”

19Liwat mamangkot ako: Wala bala makahangop ang katawhan sang Israel? Si Moises mismo, ang manughambal sang Dios, amo ang una nga nagsabat sini: “Paimunon ko kamo sa mga tawo nga indi matuod nga pungsod, paakigon ko kamo sa isa ka pungsod nga ang iya mga tawo buangbuang.”

20Kag si Isaias may labi pa nga kaisog sa iya pagsiling: “Nasapwan ako sang mga wala nagapangita sa akon, nagpakilala ako sa mga wala nagapamangkot nahanungod sa akon.”

21Pero nahanungod sa Israel nagasiling sia, “Sa bug-os nga adlaw, gintanyag ko ang paghidait sa di-matinumanon kag malalison nga mga tawo.”

← Chapter 9 Jump to: Chapter 11 →