1 John 1

Ilonggo (Ang Biblia (1982))

Jump to: Chapter 2 →

1Yadtong kutub sa ginsuguran, nga amon nabatian, nga amon nakita sang amon mga mata, nga amon natan-aw kag nakaptan sang amon mga kamut, nahanungud sang polong sang kabuhi—

2ang kabuhi napahayag, kag nakita namon, kag ginasaksihan, kag ginaasoy sa inyo ang kabuhi nga walay katapusan nga upud anay sa Amay kag napahayag sa amon—

3yadtong amon nakita kag nabatian ginaasoy namon sa inyo man, agud nga kamo man may pagpakig-ambit sa amon; kag ang aton pagpakig-ambit upud sa Amay kag sa iya Anak nga si Jesu-Cristo.

4Kag ini ginasulat namon agud nga ang amon kalipay mahimpit.

5Amo ini ang balita nga nabatian namon sa iya kag ginapahibalo sa inyo, nga ang Dios kapawa kag sa iya wala gid sing kadudulman.

6Kon magsiling kita nga may pagpakig-ambit kita sa iya kag nagalakat sa kadudulman, nagabutig kita kag wala nagakabuhi sono sa kamatooran;

7apang kon nagalakat kita sa kapawa, subong nga sia yara sa kapawa, may paghiambitay kita, kag ang dugo ni Jesus nga iya Anak nagatinlo sa aton sa tanan nga sala.

8Kon magsiling kita nga wala kita sing sala, ginadayaan ta ang aton kaugalingon, kag ang kamatooran wala sa aton.

9Kon itu-ad ta ang aton mga sala, matutum kag matarung sia, kag magapatawad sang aton mga sala kag magatinlo sa aton sa tanan nga pagkadimatarung.

10Kon magsiling kita nga wala kita makasala, ginahimo ta sia nga butigon, kag ang iya polong wala sa aton.

Jump to: Chapter 2 →