1 John 5

Ilonggo (Ang Biblia (1982))

← Chapter 4 Jump to:

1Ang tagsatagsa nga nagatoo nga si Jesus amo ang Cristo nangin-anak sang Dios, kag ang tagsatagsa nga nagahigugma sa ginikanan nagahigugma sa anak.

2Sa sini nahibaloan ta nga nagahigugma kita sa mga anak sang Dios, kon nagahigugma kita sa Dios kag nagatuman sang iya mga sogo.

3Kay ini amo ang gugma sang Dios, nga bantayan ta ang iya mga sogo. Kag ang iya mga sogo indi mabug-at.

4Kay ang bisan sin-o nga natawo sa Dios nagadaug sang kalibutan; kag ini amo ang pagdaug nga nagadaug sang kalibutan, ang aton pagtoo.

5Sin-o bala ang nagadaug sang kalibutan kondi ang nagatoo nga si Jesus amo ang Anak sang Dios?

6Ini sia amo ang nagkari paagi sa tubig kag dugo, si Jesu-Cristo, indi sa tubig lamang kondi sa tubig kag sa dugo.

7Kag ang Espiritu amo ang nagasaksi, kay ang Espiritu amo ang kamatooran.

8May tatlo ka saksi, ang Espiritu, ang tubig, kag ang dugo; kag ining tatlo nagahilisugut.

9Kon ginabaton ta ang panaksi sang mga tawo, ang panaksi sang Dios daku pa; kay ang panaksi sang Dios amo ini nga nagsaksi sia nahanungud sa iya Anak.

10Ang nagatoo sa Anak sang Dios may panaksi sa iya kaugalingon. Ang wala nagatoo sa Dios, naghimo sa iya nga butigon, kay wala sia magtoo sa panaksi nga ginsaksi sang Dios nahanungud sa iya Anak.

11Kag ang panaksi amo ini, nga ang Dios naghatag sa aton sing kabuhi nga walay katapusan, kag ining kabuhi yara sa iya Anak.

12Ang nakabaton sang Anak may kabuhi; ang wala makabaton sang Anak walay kabuhi.

13Ini ginasulat ko sa inyo nga nagatoo sa ngalan sang Anak sang Dios, agud nga mahibaloan ninyo nga nakabaton kamo sang kabuhi nga walay katapusan.

14Kag ini amo ang pagsalig naton sa iya, nga kon magpangayo kita sing bisan anong butang sono sa iya kabubut-on nagapamati sia sa aton.

15Kag kon nahibaloan ta nga nagapamati sia sa aton sang bisan ano nga aton ginapangayo, nahibaloan ta nga nabaton naton ang mga pangabay nga ginpangayo ta sa iya.

16Kon ang bisan sin-o makakita sa iya utud nga nagapakasala sing sala nga indi sa kamatayon, magapangayo sia, kag ang Dios magahatag sa iya sing kabuhi tungud sa mga nagapakasala nga indi sa kamatayon. May sala nga sa kamatayon; indi nahanungud sina nagasiling ako nga magpangamuyo ang isa.

17Ang tanan nga pagkadimatarung sala, apang may sala nga indi sa kamatayon.

18Nahibaloan ta nga ang bisan sin-o nga natawo sa Dios wala nagapakasala, apang Sia nga natawo sa Dios nagatipig sa iya, kag ang maluton wala nagatandug sa iya.

19Nahibaloan ta nga kita iya sang Dios, kag ang bug-os nga kalibutan yara sa gahum sang malauton.

20Kag nahibaloan ta nga nagkari ang Anak sang Dios kag naghatag sa aton sing paghangup, sa pagkilala sa iya nga matuud; kag yara kita sa iya nga matuud, sa iya Anak nga si Jesu-Cristo. Ini amo ang matuud nga Dios kag ang kabuhi nga walay katapusan.

21Mga anak, maglikaw kamo sa mga diosdios.

← Chapter 4 Jump to: