1 John 4

Ilonggo (Ang Biblia (1982))

← Chapter 3 Jump to: Chapter 5 →

1Mga hinigugma, dili ninyo pagtoohan ang tanan nga espiritu, kondi tilawi ang mga espiritu kon sila iya sang Dios; kay madamu ang dimatuud nga mga manalagna nga naglapnag sa kalibutan.

2Sa sini makilala ninyo ang Espiritu sang Dios: ang tagsa ka espiritu nga nagatu-ad nga si Jesu-Cristo nakaabut sa unud iya sang Dios,

3kag ang tagsa ka espiritu nga wala nagatu-ad kay Jesus indi iya sang Dios. Ini amo ang espiritu sang anticristo, nga inyo nabatian nga magaabut, kag karon yari na ini sa kalibutan.

4Mga anak, iya kamo sang Dios, kag nadaug ninyo sila; kay ang yara sa inyo daku pa sa iya nga yara sa kalibutan.

5Sila iya sang kalibutan, busa nagahambal sila sang iya sang kalibutan, kag ang kalibutan nagapamati sa ila.

6Kita iya sang Dios. Ang nakakilala sa Dios nagapamati sa aton, kag ang indi iya sang Dios wala nagapamati sa aton. Bangud sini makilala ta ang espiritu sang kamatooran kag ang espiritu sang kasaypanan.

7Mga hinigugma, maghigugmaanay kita; kay ang gugma gikan sa Dios, kag ang tagsatagsa nga nagahigugma natawo sa Dios kag nakakilala sa Dios.

8Ang wala nagahigugma wala makakilala sa Dios; kay ang Dios gugma.

9Sa sini ginpahayag sa aton ang gugma sang Dios, nga ginpadala sang Dios sa kalibutan ang iya bugtong nga Anak, agud nga magkabuhi kita paagi sa iya.

10Sa sini amo ang gugma, indi nga ginhigugma ta ang Dios kondi nga ginhigugma niya kita kag ginpadala ang iya Anak nga katumbasan sang aton mga sala.

11Mga hinigugma, kon ang Dios naghigugma gid sa aton, kita man dapat maghigugmaanay.

12Walay tawo nga nakakita sa Dios sa bisan san-o; kon maghigugmaanay kita, ang Dios nagapabilin sa aton kag ang iya gugma ginahimpit sa aton.

13Sa sini nakahibalo kita nga kita nagapabilin sa iya kag sia sa aton, kay ginhatagan niya kita sang iya Espiritu.

14Kag nakita naton kag ginasaksihan nga ang Amay nagpadala sang iya Anak subong nga Manluluwas sang kalibutan.

15Ang bisan sin-o nga magtu-ad nga si Jesus Anak sang Dios, ang Dios nagapabilin sa iya, kag sia sa Dios.

16Gani nakahibalo kita kag nagatoo sang gugma sang Dios sa aton. Ang Dios gugma, kag ang nagapabilin sa gugma nagapabilin sa Dios, kag ang Dios nagapabilin sa iya.

17Sa sini ginhimpit sa aton ang gugma, agud nga may pagsalig kita sa adlaw sang paghukom, kay subong nga amo sia amo man kita sa sining kalibutan.

18Sa gugma walay kahadluk, kondi ang himpit nga gugma nagasobol sang kahadluk. Kay ang kahadluk may kaangtanan sa silot, kag ang nagakahadluk wala mahimpit sa gugma.

19Nagahigugma kita, kay sia naghigugma sa aton sing una.

20Kon ang isa nagasiling, “Ako nagahigugma sa Dios,” kag nagadumut sa iya utud, butigon sia; kay ang wala nagahigugma sa iya utud nga iya makita, indi makahigugma sa Dios nga wala niya makita.

21Kag ining sogo nabaton ta sa iya, nga ang nagahigugma sa Dios maghigugma sa iya utud man.

← Chapter 3 Jump to: Chapter 5 →