1 John 3

Ilonggo (Ang Biblia (1982))

← Chapter 2 Jump to: Chapter 4 →

1Tan-awa ninyo kon daw ano nga gugma ang ginhatag sang Amay sa aton, nga pagtawgon kita nga mga anak sang Dios; kag amo ina kita. Bangud sini ang kalibutan wala makakilala sa aton kay wala ini makakilala sa iya.

2Mga hinigugma, karon mga anak kita sang Dios; wala pa mapahayag kon mangin-ano kita, apang nahibaloan ta nga kon magpahayag sia manginkaangay kita niya, kay makita ta sia subong nga sia gid.

3Kag ang tagsatagsa nga may iya sining paglaum sa iya nagapaputli sang iya kaugalingon subong nga sia putli.

4Ang tagsatagsa nga nagapakasala nagalapas man; ang sala amo ang pagkamalinapason.

5Nahibaloan ninyo nga sia nagpahayag sa pagkuha sang mga sala, kag walay sala sa iya.

6Ang bisan sin-o nga nagapabilin sa iya wala nagapakasala; ang bisan sin-o nga nagapakasala wala makakita sa iya ukon nakakilala sa iya.

7Mga anak, indi kamo pagpatalangon ni bisan sin-o. Ang nagahimo sing matarung amo ang matarung, subong nga sia matarung.

8Ang nagapakasala iya sang yawa; kay ang yawa nagapakasala kutub sa ginsuguran. Sa sining katuyoan nagpahayag ang Anak sang Dios agud nga malaglag niya ang mga binuhatan sang yawa.

9Ang bisan sin-ong natawo sa Dios wala nagapakasala; kay ang kinaugali sang Dios nagapabilin sa iya, kag indi sia makasala kay natawo sia sa Dios.

10Sa sini ginapahayag ang mga anak sang Dios, kag ang mga anak sang yawa: ang bisan sin-o nga wala nagahimo sing matarung indi iya sang Dios, amo man ang wala nagahigugma sang iya utud.

11Kay amo ini ang balita nga nabatian ninyo kutub sa ginsuguran, nga maghigugmaanay kita,

12kag indi kaangay kay Cain nga iya sang malauton kag nagpatay sang iya utud. Kag ngaa bala nga ginpatay niya sia? Bangud nga ang iya mga binuhatan malaut kag ang iya sang iya utud matarung.

13Mga kauturan, indi kamo matingala nga ang kalibutan nagadumut sa inyo.

14Nakahibalo kita nga nagliton kita sa kamatayon pa kabuhi, kay ginahigugma ta ang mga kauturan. Ang wala nagahigugma nagapabilin sa kamatayon.

15Ang bisan sin-o nga nagadumut sang iya utud manugpatay, kag nakahibalo kamo nga walay manugpatay nga may kabuhi nga walay katapusan nga nagapabilin sa iya.

16Sa sini nakilala ta ang gugma, kay ginhatag niya ang iya kabuhi tungud sa aton; kag dapat naton ihatag ang aton mga kabuhi tungud sa mga kauturan.

17Apang ang bisan sin-o nga may pangabuhian sang kalibutan kag nagatan-aw sa iya utud nga yara sa kakulangan, apang nagapugung sang iya kalooy sa iya, paano bala ang pagpabilin sang gugma sang Dios sa iya?

18Mga anak, dili kita maghigugma sa polong ukon sa hambal kondi sa buhat kag sa kamatooran.

19Sa sini makilala ta nga kita iya sang kamatooran, kag mapalig-on ang aton tagiposoon sa atubangan niya

20kon ang aton tagiposoon nagatagudili sa aton; kay ang Dios daku pa sa aton mga tagiposoon, kag nakakilala sia sang tanan nga butang.

21Mga hinigugma, kon ang aton mga tagiposoon wala nagatagudili sa aton, may pagsalig kita sa atubangan sang Dios;

22kag ang bisan ano nga ginapangayo ta mabaton ta sa iya, kay ginabantayan ta ang iya mga sogo kag nagahimo sang nahamut-an niya.

23Kag ini amo ang iya sogo, nga magtoo kita sa ngalan sang iya Anak nga si Jesu-Cristo kag maghigugmaanay, sono ginsogo sa niya sa aton.

24Ang tanan nga nagabantay sang iya mga sogo nagapabilin sa iya, kag sia sa ila. Kag sa sini nahibaloan ta nga nagapabilin sia sa aton, bangud sang Espiritu nga ginhatag niya sa aton.

← Chapter 2 Jump to: Chapter 4 →