1 John 2

Ilonggo (Ang Biblia (1982))

← Chapter 1 Jump to: Chapter 3 →

1Mga anak ko, nagasulat ako sa inyo sini agud nga indi kamo makasala; apang kon ang bisan sin-o makasala, may mananabang kita upud sa Amay, si Jesu-Cristo nga matarung;

2kag sia amo ang katumbasan tungud sa aton mga sala, kag indi lamang tungud sa aton kondi man tungud sa mga sala sang bug-os nga kalibutan.

3Kag sa sini mapamatud-an ta nga nakakilala kita sa iya, kon ginabantayan ta ang iya mga sogo.

4Ang nagasiling, “Ako nakakilala sa iya” apang wala nagatuman sang iya mga sogo butigon sia, kag ang kamatooran wala sa iya;

5apang ang bisan sin-o nga nagabantay sang iya polong, sa pagkamatuud nahimpit sa iya ang gugma tungud sa Dios. Sa sini mapamatud-an ta nga yara kita sa iya:

6ang nagasiling nga nagapabilin sia sa iya dapat man sia maggawi subong sang paggawi niya.

7Mga hinigugma, wala ako nagasulat sa inyo sing bag-ong sogo, kondi isa ka sogo nga daan nga nabaton ninyo kutub sa ginsuguran; ang daan nga sogo amo ang polong nga inyo nabatian.

8Apang nagasulat ako sa inyo sing bag-ong sogo, nga ang amo matuud sa iya kag sa inyo, kay ang kadudulman nagataliwan kag ang matuud nga kapawa nagabanaag na.

9Ang nagasiling nga yara sia sa kapawa kag nagadumut sa iya utud yara sa kadudulman pa tubtub karon.

10Ang nagahigugma sa iya utud nagapabilin sa kapawa, kag walay kahigayonan sang kasandad sa iya.

11Apang ang nagadumut sa iya utud yara sia sa kadudulman kag nagalakat sa kadudulman, kag wala makahibalo kon diin sia nagapakadto, kay ang kadudulman nagbulag sang iya mga mata.

12Nagasulat ako sa inyo, mga anak, kay ang inyo mga sala ginpatawad tungud sa iya ngalan.

13Nagasulat ako sa inyo, mga amay, kay nakakilala kamo sa iya nga kutub sa ginsuguran. Nagasulat ako sa inyo, mga pamatan-on nga lalaki, kay nadaug ninyo ang malauton. Nagasulat ako sa inyo, mga anak, kay nakilala ninyo ang Amay.

14Nagasulat ako sa inyo, mga amay, kay nakakilala kamo sa iya nga kutub sa ginsuguran. Nagasulat ako sa inyo, mga pamatan-on nga lalaki, kay mabakud kamo, kag ang polong sang Dios nagapabilin sa inyo, kag nadaug ninyo ang malauton.

15Dili ninyo paghigugmaon ang kalibutan ukon ang mga butang nga yara sa kalibutan. Kon ang bisan sin-o nagahigugma sang kalibutan, ang gugma tungud sa Amay wala sa iya.

16Kay ang tanan nga yara sa kalibutan, ang kailigbon sang unud kag ang kailigbon sang mga mata kag ang bugal sang kabuhi, indi iya sang Amay kondi iya sang kalibutan.

17Kag ang kalibutan nagataliwan, kag ang kailigbon sini; apang ang nagahimo sang kabubut-on sang Dios nagapadayon sa gihapon.

18Mga anak, katapusan na ini nga takna; kag sa nabatian ninyo nga naga-abut ang anticristo, gani karon may nagalutaw nga madamu nga anticristo; busa nakahibalo kita nga amo na ang katapusan nga takna.

19Naghalin sila sa aton, apang indi sila tagaaton; kay kon sila tagaaton, nagpadayon kuntani sila kaupud naton; apang naghalin sila, agud nga mapahayag nga sila tanan indi tagaaton.

20Apang ginhaplas kamo sang Balaan, kag tanan kamo nakahibalo.

21Nagasulat ako sa inyo, indi kay wala ninyo mahibaloi ang kamatooran, kondi kay nahibaloan ninyo, kag nakahibalo nga walay butig nga iya sang kamatooran.

22Sin-o bala ang butigon kondi ang nagapanghiwala nga si Jesus amo ang Cristo? Ini amo ang anticristo, sia nga nagapanghiwala sang Amay kag sang Anak.

23Ang bisan sin-o nga nagapanghiwala sang Anak wala man sia sang Amay. Ang nagatu-ad sang Anak may iya sang Amay man.

24Padayona sa inyo ang nabatian ninyo kutub sa ginsuguran. Kon ang nabatian ninyo kutub sa ginsuguran magpabilin sa inyo, niyan kamo magapabilin sa Anak kag sa Amay.

25Kag amo ini ang ginsaad niya sa aton, ang kabuhi nga walay katapusan.

26Ini ginasulat ko sa inyo nahanungud sa mga magpatalang sa inyo;

27apang ang panghaplas nga nabaton ninyo sa iya nagapabilin sa inyo, kag wala kamo kinahanglan nga may isa nga magtudlo sa inyo; subong nga ang iya panghaplas nagatudlo sa inyo nahanungud sang tanan nga butang, kag matuud, kag indi butig, sono sa gintudlo sini sa inyo, magpabilin kamo sa iya.

28Kag karon, mga anak, magpabilin kamo sa iya, agud nga kon magpahayag sia may pagsalig kita kag indi mahuya sa iya atubangan sa pag-abut niya.

29Kon nakahibalo kamo nga sia matarung, mapamatud-an ninyo nga ang tagsa nga nagahimo sing matarung natawo sa iya.

← Chapter 1 Jump to: Chapter 3 →