Amos 1

Ilonggo (Ang Biblia (1982))

Jump to: Chapter 2 →

1Ang mga polong ni Amos, nga isa sa tunga sang mga manugpahalab sang Tekoa, nga nakita niya nahanungud sa Israel sa mga adlaw ni Uzias nga hari sang Juda kag sa mga adlaw ni Jeroboam nga anak ni Joas, nga hari sang Israel, duha ka tuig sang wala pa ang linog.

2Kag nagsiling sia: “Ang Ginoo magangurub gikan sa Sion, kag magapatonog sang iya tingug gikan sa Jerusalem; magalalaw ang mga palahalban sang mga manugpahalab, kag malaya ang putokputokan sang Carmelo.”

3Amo ini ang ginasiling sang Ginoo: “Sa tatlo ka paglalis sang Damasco, kag sa apat, indi ko pag-ipaiway ang iya silot; bangud nga ginligis nila ang Galaad sang mga inugligis nga salsalon.

4Gani ipadala ko ang kalayo sa panimalay ni Hazael, kag magalamon ini sang mga pamakud ni Ben-hadad.

5Balion ko ang pintal sang Damasco, kag utdon ang mga pumuluyo sa nalupyakan sang Aven, kag ang nagauyat sang cetro gikan sa Bet-eden; kag ang katawohan sang Siria dalhon sa kabihagan sa Kir,” nagasiling ang Ginoo.

6Amo ini ang ginasiling sang Ginoo: “Sa tatlo ka paglalis sang Gaza, kag sa apat, indi ko pag-ipaiway ang iya silot; bangud nga gindala nila nga bihag ang bug-os nga katawohan sa pagtugyan sa ila sa Edom.

7Gani magapadala ako sing kalayo sa kuta sang Gaza, kag magalamon ini sang iya mga pamakud.

8Utdon ko ang mga pumuluyo sa Asdod, kag ang nagakaput sang cetro sa Ascalon; lisoon ko ang akon kamut batok sa Ecron; kag ang nabilin sang mga Filistinhon mawala,” nagasiling ang Ginoong Dios.

9Amo ini ang ginasiling sang Ginoo: “Sa tatlo ka paglalis sang Tiro, kag sa apat, indi ko pag-ipaiway ang iya silot; bangud nga ila gintugyan ang bug-os nga katawohan sa Edom, kag wala makadumdum sang makiutud nga katipan.

10Gani magapadala ako sing kalayo sa mga kuta sang Tiro, kag magalamon ini sang iya mga pamakud.”

11Amo ini ang ginasiling sang Ginoo: “Sa tatlo ka paglalis sang Edom, kag sa apat, indi ko pag-ipaiway ang iya silot; bangud nga ginlagas niya ang iya utud sang espada, kag ginsikway niya ang bug-os nga kaawa, kag ang iya kaakig naggisi sing dalayon, kag ginhuptan niya ang iya kasingkal sa gihapon.

12Gani magapadala ako sing kalayo sa Teman, kag magalamon ini sang mga pamakud sang Bozra.”

13Amo ining ginasiling sang Ginoo: “Sa tatlo ka paglalis sang mga anak sang Amon, kag sa apat, indi ko pag-ipaiway ang iya silot; bangud nga gingayhab nila ang mga nagabusung sang Galaad, agud nga mapalapad nila ang ila ginsakpan.

14Gani magadabok ako sing kalayo sa kuta sang Raba, kag magalamon ini sang iya mga pamakud, nga may sininggit sa adlaw sang inaway, nga may unus sa adlaw sang buhawi;

15kag bihagon ang ila hari, sia kag ang iya mga principe sing tingub,” nagasiling ang Ginoo.

Jump to: Chapter 2 →