Amos 8

Ilonggo (Ang Biblia (1982))

← Chapter 7 Jump to: Chapter 9 →

1Amo ini ang ginpahayag sang Ginoo sa akon: yari karon, isa ka alat nga bunga sa tingadlaw.

2Kag nagsiling sia, “Amos, ano bala ang ginatan-aw mo?” Kag nagsiling ako, “Isa ka alat nga bunga sa tingadlaw.” Niyan nagsiling sa akon ang Ginoo, “Nag-abut ang katapusan sa akon katawohan nga Israel; indi ko na sila pagpasaylohon pa.

3Ang mga ambahanon sang templo manginhinaya sa sadtong adlaw,” nagasiling ang Ginoong Dios; “manginmadamu ang bangkay; sa tagsa ka duug ihaboy nila sila sing hipus.”

4Pamati sini, O kamo nga buut maglamon sang mga nawad-an, kag buut magdula sang mga makalolooy sang duta,

5nga nagasiling, “San-o pa bala magtaliwan ang lati, agud nga makapadalawat kami sing uyas? Kag ang inugpahuway, agud nga makapagowa kami sing trigo, nga nagapadiotay sang efa kag nagapadaku sang siclo, kag nagadaya sa timbangan nga malimbongon,

6agud nga mabakal namon ang mga makalolooy sing pilak kag ang mga nawad-an sa isa ka paris nga sapin, kag mabaligya ang alupinpin sang trigo?”

7Ang Ginoo nagsumpa sa kamahalan ni Jacob: “Sa pagkamatuud dili ko pagkalimtan nga mas-a ang bisan ano sang ila binuhatan.”

8Indi bala magkurug ang duta tungud sini, kag maglalaw ang tagsatagsa nga nagapuyo didto, kag magadalodo ini sing bug-os kaangay sang Nilo, kag tublagon ini kag mahubas liwat, kaangay sang Nilo sang Egipto?”

9“Kag sa sadto nga adlaw,” nagasiling ang Ginoong Dios, “patunuron ko ang adlaw sa kaudtohon, kag padulmon ko ang duta sa masanag nga kaadlawon.

10Baylohon ko ang inyo mga piesta sa lalaw, kag ang tanan ninyo nga ambahanon sa panalabiton; wagkusan ko sing panapton nga sako ang tanan nga balikawang, kag paupawon ang tagsa ka olo; himoon ko ini subong nga paglalaw sa bugtong nga anak, ang iya katapusan subong sang adlaw sang kapaitan,

11“Yari karon, nagaabut ang mga adlaw,” nagasiling ang Ginoong Dios, “nga magapadala ako sing tiggulutum sa duta; indi tiggulutum sa kalan-on, ukon kauhaw sa tubig, kondi sang pagpamati sang mga polong sang Ginoo.

12Magadalangdalang sila kutub sa dagat pa dagat, kag kutub sa aminhan tubtub gid sa sidlangan; magadalagan sila pakadto-pakari, sa pagpangita sang polong sang Ginoo, apang indi makakita sini.

13“Sa sadto nga adlaw ang maayoayo nga mga ulay kag ang pamatan-on nga mga lalaki mapunaw sa kauhaw.

14Sila nga nagasumpa tungud sa sala sang Samaria, kag nagasiling, ‘Sa nagakabuhi ang imo dios, O Dan,’ kag, ‘Sa nagakabuhi ang pagginawi sang Beer-seba,’ mapukan sila, kag indi nga mas-a makabangon.”

← Chapter 7 Jump to: Chapter 9 →