Amos 6

Ilonggo (Ang Biblia (1982))

← Chapter 5 Jump to: Chapter 7 →

1“Kailo sila nga matawhay sa Sion, kag sila nga malig-on sa bukid sang Samaria, ang lutaw nga mga tawo sa puno sang mga pungsud, nga sa ila nagadangup ang panimalay sang Israel!

2Agi kamo sa Calne, kag magtan-aw; kag gikan didto kadto kamo sa Hamat nga daku; niyan dolhog sa Gat sang mga Filistinhon. Maayo pa sila bala sa sining mga ginharian? Ukon ang ila ginsakpan malapad pa bala sa inyo ginsakpan,

3kamo nga nagapaiswag sang adlaw nga malaut, kag nagapapalapit sang lingkoran sang panglugus?

4Kailo sila nga nagahigda sa mga katre nga tiposo, kag nagahilayhilay sila sa ila mga higdaan, kag nagakaon sang mga cordero gikan sa panong, kag sang mga tinday gikan sa bulukutan;

5nga nagaamba sing mga ugoy-ugoy sa lanton sang viola, nga nagapatok nga sa ila sing mga tolonggon kaangay kay David;

6nga nagainum sing alak sa mga yahong, kag nagapanghaplas sila sang mga lana nga ali, apang wala sila nagakasubo sang kapipit-an ni Jose!

7Busa magakadto sila karon sa kabihagan upud sa nahauna nga ginbihag, kag ang inudyak sang mga nagahilayhilay magataliwan.”

8Ang Ginoong Dios nagasumpa sa iya kaugalingon (nagasiling ang Ginoo, ang Dios sang mga kasoldadosan): “Ginakangil-aran ko ang pagkahalangdon ni Jacob, kag ginadumtan ang iya mga palacio; busa itugyan ko ang banwa pati ang tanan nga yara sa iya.”

9Kag kon may napulo ka tawo nga mabilin sa isa ka balay, magakalapatay sila.

10Kag kon ang tiyo sang tawo magsapopo sa iya, bisan sia nga nagasonog sa iya, sa pagkuha sang mga tul-an sa balay, kag magsiling sa yara sa sulud gid sang balay, “May dira pa bala upud sa imo?” magasiling sia, “Wala”; niyan magasiling sia, “Hipus ka! Indi kita makasambit sang ngalan sang Ginoo.

11Kay yari karon, ang Ginoo nagasogo, kag gub-on ang balay nga daku, kag putaputahon ang balay nga diotay.

12Magadalagan bala ang mga kabayo sa mga igang? Magaarado bala ang isa didto sing mga baka? Apang ginbaylo ninyo ang katarungan sa apdo kag ang bunga sang pagkamatarung sa ajenjo—

13kamo nga nagakalipay sa butang nga wala sing pulus, nga nagasiling, “Wala bala kami makaagaw sing mga sungay nga sa amon tungud sa amon kaugalingon nga kusug?”

14“Kay yari karon, magapatindug ako sing pungsud batok sa inyo, O panimalay sang Israel,” nagasiling ang Ginoo, ang Dios sang mga kasoldadosan; “kag papiotan niya kamo kutub sa salamputan sa Hamat tubtub sa sapa sang Araba.”

← Chapter 5 Jump to: Chapter 7 →