Daniel 12

Ilonggo (Ang Biblia (1982))

← Chapter 11 Jump to:

1“Sa sadto nga tion magatindug si Miguel, ang daku nga principe nga nagatindug tungud sa mga anak sang imo katawohan. Kag may tion sang kagamu, subong sang wala pa mahanabu kutub sang may pungsud tubtub sa amo nga tion; kag sa sadto nga tion luwason ang imo katawohan, ang tagsatagsa nga makita nga nasulat sa tolon-an.

2Kag madamu sang mga nagakatolog sa yab-ok sang duta magamata, ang iban sa kabuhi nga walay katapusan, kag ang iban sa kahuluy-an kag sa pagkatalamayon nga walay katapusan.

3Kag ang mga maalam magasidlak subong sang kasiga sang kahawaan; kag ang mga nagaliso sang madamu sa pagkamatarung, subong sang kabitoonan sa gihapon kag sa gihapon.

4Apang ikaw, O Daniel, takpi ang mga polong, kag pat-ini ang tolon-an, tubtub gid sa tion sang katapusan. Madamu ang magadalagan pakadto-pakari, kag magadugang ang ihibalo.”

5Niyan ako nga si Daniel nagtolok, kag yari karon, may iban nga duha nga nagtindug, ang isa sa sini nga pihak sang pangpang sang suba kag ang isa sa sina nga pihak sang pangpang sang suba.

6Kag nagsiling ang isa sa lalaki nga napanaptan sang lino, nga yara sa ibabaw sang mga tubig sang suba, “Daw ano bala kalawig tubtub sa katapusan sini nga mga katingalahan?”

7Nabatian ko ang lalaki nga napanaptan sang lino, nga yara sa ibabaw sa mga tubig sang suba, sang ginbayaw niya ang iya kamut nga too kag ang iya kamut nga wala sa langit, kag nagsumpa sa iya nga nagakabuhi sing walay katapusan nga ini manginsa isa ka tion, sa mga tion, kag sa katunga sang isa ka tion; kag sang nahimo nila ang katapusan sang pagdugmuk sang gahum sang banwa nga balaan ini tanan nga mga butang matapus.

8Ako nakabati, apang wala ako makahangup. Niyan nagsiling ako, “O Ginoo ko, ano bala ang maabutan sini nga mga butang?”

9Nagsiling sia, “Lakat ka sa imo dalanon, Daniel, kay ang mga polong natakpan kag napat-inan tubtub sa tion sang katapusan.

10Madamu ang magapaninlo sang ila kaugalingon, kag magapaputi sang ila kaugalingon, kag ulayon; apang ang mga malaut magahimo sing kalautan; kag wala sing malaut nga makahangup; apang ang mga maalam makahangup.

11Kag kutub sa tion nga kuhaon ang dalayon nga halad-nga-sinonog, kag patindugon ang kangil-aran nga nagahimo sing kamingaw, mangin isa ka libo kag duha ka gatus kag kasiaman ka adlaw.

12Bulahan ang nagahulat kag nagaabut sa isa ka libo kag tatlo ka gatus kag katloan kag lima ka adlaw.

13Apang lakat ka sa imo dalanon tubtub sa katapusan; kay magapahuway ka, kag magatindug sa imo kapalaran sa katapusan sang mga adlaw.”

← Chapter 11 Jump to: