Daniel 6

Ilonggo (Ang Biblia (1982))

← Chapter 5 Jump to: Chapter 7 →

1Nahamut-an ni Dario nga magpahamtang sa ibabaw sang ginharian sing isa ka gatus kag duha ka pulo ka satrapa, nga manginsa bug-os nga ginharian;

2kag sa ibabaw nila tatlo ka pangolo, nga sa ila si Daniel isa, agud nga ini nga mga satrapa magpanabat sa ila, kag nga ang hari wala sing kasamaran.

3Niyan ini nga Daniel naglutaw labaw sa sini nga mga pangolo kag mga satrapa, bangud nga ang labaw nga espiritu yara sa iya; kag ang hari naghunahuna sa pagbutang sa iya sa ibabaw sang bug-os nga ginharian.

4Niyan ang mga pangolo kag ang mga satrapa nagpangita sing kahigayonan batok kay Daniel nahanungud sang ginharian; apang wala sila makakita sing kahigayonan ukon sayup, sanglit nga sia matutum, kag wala sing bisan ano nga sala ukon sayup nga nakita sa iya.

5Niyan ini nga mga tawo nagsiling, “Indi kita makakita sing bisan ano nga kahigayonan batok sini nga Daniel luwas nga makita naton ini batok sa iya nahanungud sa kasogoan sang iya Dios.”

6Niyan ining mga pangolo kag ang mga satrapa naghimbon sing tingub sa hari kag nagsiling sa iya sing subong sini, “Hari Dario, magkabuhi sa gihapon!

7Ang tanan nga pangolo sang ginharian, ang mga tinugyanan kag ang mga satrapa, ang mga manuglaygay kag ang mga pangolo-puud naghilisugut sa pagtukud sing palatukuran nga harianon kag paghimo sing mabaskug nga pagdumili, nga bisan sin-o nga magpangayo sing pangabay sa bisan ano nga dios ukon tawo sa sulud sang katloan ka adlaw, luwas sa imo, O hari, itagbong sia sa lungib sang mga leon.

8Karon, O hari, palig-ona ang pagdumili kag pirmahi ang sinulat, agud nga indi mabalhin, sono sa kasogoan sang mga Mediahanon kag mga Persiahanon, nga wala nagabaylo.”

9Busa si Hari Dario nagpirma sang sinulat kag sang pagdumili.

10Sang nahibaloan ni Daniel nga ang sinulat napirmahan, nagsulud sia sa iya balay diin nabuksan ang mga talambuan sa iya hulut nayon sa Jerusalem; kag nagluhud sia sing makatlo sa isa ka adlaw, kag nagpangamuyo kag nagpasalamat sa atubangan sang iya Dios, subong sang ginhimo niya sang una.

11Niyan ini nga mga tawo nagtipon sing tingub kag nasapwan si Daniel nga nagapangayo kag nagapakilooy sa atubangan sang iya Dios.

12Niyan nagpalapit sila kag nagpamolong sa atubangan sang hari nahanungud sang pagdumili sang hari, “Wala ka bala magpirma sing pagdumili, nga ang tagsa ka tawo nga magpangayo sa bisan kay sin-o nga dios ukon sa tawo sa sulud sang katloan ka adlaw luwas sa imo, O hari, itagbong sa lungib sang mga leon?” Ang hari nagsabat, “Matuud nga butang, sono sa kasogoan sang mga Mediahanon kag sang Persihanon, nga wala nagabaylo.”

13Niyan nagsabat sila sa atubangan sang hari, “Ina nga Daniel, nga gikan sa mga anak sang kabihagan sang Juda, wala magsapak sa imo, O hari, ukon sang pag-dumili nga ginpirmahan mo, kondi nga nagahimo sia sang iya pangayo sing makatlo sa isa ka adlaw.”

14Niyan ang hari, sang pagkabati niya sini nga mga polong, nasaklaw sing tama, kag nagtuhoy sang iya tagiposoon kay Daniel sa pagluwas sa iya; kag nagpanikasug sia sa pagluwas sa iya tubtub sa pagtunud sang adlaw.

15Niyan ini nga mga tawo nagtilipon sing tingub sa hari, kag nagsiling sa hari, “Kilalaha, O hari, nga ini kasogoan sang mga Mediahanon kag sang mga Persiahanon nga wala sing pagdumili ukon palatukuran nga gintukud sang hari nga mabaylohan.”

16Niyan ang hari nagsogo, kag gindala nila si Daniel kag ginsulud sia sa lungib sang mga leon. Karon ang hari nagsiling kay Daniel, “Ang imo Dios, nga ginaalagad mo sing dalayon, sia magaluwas sa imo!”

17Kag gindala ang isa ka bato kag ginbutang sa baba sang lungib, kag ginpat-inan ini sang hari sang iya kaugalingon nga singsing nga inugpat-in, kag sang singsing nga inugpat-in sang iya mga ginoo, agud nga wala gid sing mabaylohan nahanungud kay Daniel.

18Niyan ang hari nagpauli sa iya palacio, kag nagpaligad sang kagab-ihon nga nagapuasa; wala sing mga tolonggon nga gindala sa atubangan niya, kag ang iya katologon nagpalagyo gikan sa iya.

19Niyan, ang hari nagbangon sing aga pa gid, kag nagkadto sing dalidali sa lungib sang mga leon.

20Sang nag-abut sia malapit sa lungib kay Daniel, nagsinggit sia sing makahalanusbu nga tingug kag nagsiling kay Daniel, “O Daniel, alagad sang Dios nga buhi, ang imo Dios, nga ginaalagad mo sing dalayon, nakasarang bala sa pagluwas sa imo sa mga leon?”

21Niyan si Daniel nagsiling sa hari, “O hari, magkabuhi sa gihapon!

22Ang akon Dios nagpadala sang iya manugtunda kag nagtakup sang mga baba sang mga leon, kag wala sila magdaut sa akon, sanglit nga sa atubangan niya ang pagkawala sing sala nakita sa akon; kag sa atubangan mo man, O hari, wala ako makahimo sing daut.”

23Niyan nagkalipay ang hari sing lakas, kag nagsogo nga batakon nila si Daniel pagowa sa lungib. Busa si Daniel ginbatak pagowa sa lungib, kag wala sing bisan ano nga bagay sang daut nga nakita sa iya, bangud nga nagsalig sia sa iya Dios.

24Kag nagsogo ang hari, gindala nila yadto nga mga tawo nga nagsumbung kay Daniel kag gintagbong sila sa lungib sang mga leon—sila, ang ila mga anak, kag ang ila mga asawa; kag gindamhagan sila sang mga leon sa wala pa sila makalambut sa idalum sang lungib kag ginpanglutaluta ang tanan nila nga mga tul-an.

25Niyan si Hari Dario nagsulat sa tanan nga mga katawohan, mga pungsud, kag mga hambal nga nagapuyo sa bug-os nga duta: “Ang paghidait pagpaukaron sa inyo.

26Nagahimo ako sing mando, nga sa bug-os nga ginsakpan sang akon ginharian ang tanan nga tawo magkurug kag magkahadluk sa atubangan sang Dios ni Daniel, kay sia amo ang Dios nga buhi, nga malig-on sa gihapon; ang iya ginharian indi malaglag, kag ang iya pagbulut-an mangintubtub gid sa katapusan.

27Sia nagaluwas kag nagasagup, nagahikut sia sing mga talandaan kag katingalahan sa langit kag sa duta, sia nga nagluwas kay Daniel sa gahum sang mga leon.”

28Gani ini nga si Daniel nag-uswag sa paghari ni Dario kag sa paghari ni Ciro nga Persiahanon.

← Chapter 5 Jump to: Chapter 7 →