Ephesians 1

Ilonggo (Ang Biblia (1982))

Jump to: Chapter 2 →

1Si Pablo, nga pinadala ni Cristo Jesus sa kabubut-on sang Dios, Sa mga balaan [sa Efeso ] nga matutum man kay Cristo Jesus:

2Ang bugay sa inyo kag paghidait nga gikan sa Dios nga aton Amay kag kay Ginoong Jesu-Cristo.

3Pagpakamaayohon ang Dios kag Amay sang aton Ginoong Jesu-Cristo, nga nakapakamaayo sa aton kay Cristo sa tagsa ka pagpakamaayo nga espirituhanon sa langitnon nga mga duug,

4subong nga ginpili kita sang Dios sa kay Cristo sa wala pa mapasad ang kalibutan, agud nga magbalaan kita kag walay kasawayan sa iya atubangan.

5Sia nagtangdo sa aton sa gugma nga mangin-iya mga anak paagi kay Jesu-Cristo, sono sa katuyoan sang iya kabubut-on,

6sa pagdayaw sang iya mahimayaon nga bugay, nga ginbugay niya sa aton sa Hinigugma

7Sa iya may pagtubus kita paagi sa iya dugo, nga amo ang kapatawaran sang aton mga paglapas, sono sa kamanggaran sang iya bugay

8nga ginpabugana niya sa aton.

9Kay ginpakilala niya sa aton sa bug-os nga kaalam kag paghangup ang tinago sang iya kabubut-on, sono sa iya katuyoan nga ginpahayag niya sa kay Cristo

10subong nga buko tungud sa kabug-osan sang mga panag-on, sa pagtingub sang tanan nga butang kay Cristo, ang mga butang sa langit kag ang mga butang sa duta.

11Sono sa katuyoan sang Dios nga nagatuman sang tanan nga butang sono sa laygay sang iya kabubut-on,

12kami nga naglaum sing una kay Cristo gintangdo kag ginpili sa iya sa pagkabuhi sa pagdayaw sang iya himaya.

13Sa tapus ninyo mabatian ang balita sang kamatooran, ang maayong balita nahanungud sa inyo kaluwasan, kag nagsalig sa iya, sa iya kamo man ginpat-inan sang Espiritu Santo nga ginsaad,

14nga amo ang patinga sang aton panublion tubtub nga maangkon naton ini, sa pagdayaw sang iya himaya.

15Sa sining kabangdanan, bangud nga ako nakabati sang inyo pagtoo sa kay Ginoong Jesus kag sang inyo gugma sa tanan nga balaan,

16wala ako nagauntat sa pagpasalamat tungud sa inyo, nga nagadumdum sa inyo sa akon mga pangamuyo,

17nga ang Dios sang aton Ginoong Jesu-Cristo, ang Amay sang himaya, maghatag sa inyo sang espiritu sang kaalam kag bugna sa pagkilala sa iya,

18nga naiwagan ang mga mata sang inyo mga tagiposoon, agud nga mahibaloan ninyo kon ano ang paglaum diin gintawag niya kamo, kon ano ang kamanggaran sang mahimayaon nga panublion sa mga balaan,

19kag kon ano ang dimatakus nga pagkadaku sang iya gahum sa aton nga nagatoo, sono sa pagpanghikot sang kusug sang iya gahum

20nga nahimo niya kay Cristo sang ginbanhaw niya sia, kag ginpalingkod sia sa too niya sa langitnon nga mga duug,

21nga labaw pa gid sa tanan nga pagdumala kag pagbulut-an kag gahum kag pagkaginoo, kag labaw sa tagsa ka ngalan nga ginhingalan, indi lamang sa sining panuigon kondi man sa palaabuton;

22kag ginpasakup niya ang tanan nga butang sa idalum sang iya mga tiil kag ginhimo sia nga olo sa tanan nga butang tungud sa iglesia,

23nga amo ang iya lawas, ang kabug-osan niya nga nagapuno sang tanan sa tanan.

Jump to: Chapter 2 →