Ephesians 6

Ilonggo (Ang Biblia (1982))

← Chapter 5 Jump to:

1Mga anak, tumana ang inyo mga ginikanan sa Ginoo, kay ini matarung.

2“Tahora ang imo amay kag ang imo iloy” (ini amo ang nahaunang sogo nga may saad),

3“agud nga magmaayo sa imo kag magkabuhi ka sing malawig sa duta.”

4Mga amay, dili ninyo pagpaakiga ang inyo mga anak, kondi sagura sila sa disiplina kag sa pagtudlo sang Ginoo.

5Mga ulipon, magtuman kamo sa inyo mga agalon nga dutan-on, nga may kahadluk kag pagkurug, sa pagkabunayag sang inyo tagiposoon, subong nga kay Cristo;

6indi sa pag-alagad nga sa mata, subong nga manugpahamuut sa mga tawo, kondi subong nga mga ulipon ni Cristo, nga nagahimo sang kabubut-on sang Dios gikan sa tagiposoon,

7nga nagaalagad sa maayong kabubut-on subong nga sa Ginoo kag indi nga sa mga tawo,

8nga nakahibalo nga ang bisan anong maayo nga ginahimo sang tagsatagsa, ang amo batonon niya liwat gikan sa Ginoo, bisan sia ulipon ukon hilway.

9Mga agalon, himoa ang amo sa ila, kag mag-untat sa pagpahog, nga nakahibalo nga sia nga ila kag inyo Agalon yara sa langit, kag sa iya walay pinasulabi sa mga tawo.

10Sa katapusan, magmalig-on kamo sa Ginoo kag sa kusug sang iya gahum.

11Isuklub ang bug-os nga hinganib sang Dios, agud nga sarang kamo makabatok sa mga daya sang yawa.

12Kay kita indi nagapakig-away batok sa unud kag dugo, kondi batok sa mga punoan, batok sa mga kagamhanan, batok sa mga manugdumala sang kalibutan sining kadudulman karon, batok sa espirituhanon nga mga kabon sang kalautan sa langitnon nga mga duug.

13Busa gamita ang bug-os nga hinganib sang Dios, agud nga makabatok kamo sa adlaw nga malaut, kag sang nakahimo sang tanan, makatindug.

14Busa magtindug, nga nawagkusan ang inyo mga hawak sing kamatooran, kag nakasuklub sang limbutong sang pagkamatarung,

15kag nasukluban ang mga tiil sang pangaman sang maayong balita sang paghidait;

16labaw sa tanan nagagamit sang taming sang pagtoo, nga sa amo makasarang kamo sa pagpapalong sang tanan nga nagadabadaba nga baslay sang malauton.

17Kag gamita ang pandong sang kaluwasan, kag ang espada sang Espiritu, nga amo ang polong sang Dios.

18Magpangamuyo sa tanan nga tion sa Espiritu, sa bug-os nga pangamuyo kag pag-ampo. Sa sining katuyoan magbantay sa bug-os nga pagpadayon, nga nagaampo tungud sa tanan nga balaan,

19kag tungud man sa akon, nga sa pagtikab sang akon baba mahatag sa akon ang pagmitlang sa pagpakilala nga may kasidla sang tinago sang maayong balita,

20nga tungud sini embajador ako nga may mga talikala; agud nga mahambal ko ini sing masidla, subong sang dapat ko ihambal.

21Karon agud nga makahibalo man kamo sang akon kahimtangan kag kon ano ang ginahimo ko, si Tiquico nga hinigugma nga utud kag matutum nga manug-alagad sa Ginoo magapahibalo sa inyo sang tanan nga butang.

22Ginpadala ko sia sa inyo sa sini gid nga katuyoan, agud nga mahibaloan ninyo ang amon kahimtangan, kag malipay niya ang inyo mga tagiposoon.

23Ang paghidait manginsa mga kauturan, kag gugma nga may pagtoo, gikan sa Dios nga Amay kag kay Ginoong Jesu-Cristo.

24Ang bugay manginsa tanan nga nagahigugma sa aton Ginoong Jesu-Cristo sa gugma nga dimamalatyon.

← Chapter 5 Jump to: