Ephesians 3

Ilonggo (Ang Biblia (1982))

← Chapter 2 Jump to: Chapter 4 →

1Sa sining kabangdanan ako, si Pablo, binilanggo tungud kay Cristo Jesus tungud sa inyo nga mga Gentil—

2ginabilang ko nga nakabati kamo sang pagkatinugyanan sang bugay sang Dios nga ginhatag sa akon nga sa inyo,

3kon paano nga bangud sang bugna ginpakilala sa akon ang tinago, subong sang ginsulat ko sa pila ka polong.

4Sa pagbasa ninyo sini makahantup kamo sang akon paghangup sang tinago ni Cristo,

5nga sa iban nga mga kaliwatan wala mapakilala sa mga anak sang mga tawo subong nga napahayag karon sa iya balaan nga mga pinadala kag mga manalagna paagi sa Espiritu;

6nga amo, kon paano nga ang mga Gentil mga masigkamanunubli, mga bahin sang among lawas, kag mga masigkaumalambit sang saad kay Cristo Jesus paagi sa maayong balita.

7Sa sining maayong balita ginhimo ako nga manug-alagad sono sa hiyas sang bugay sang Dios nga ginhatag sa akon paagi sa pagpanghikot sang iya gahum.

8Sa akon, nga labing kubus gid sa tanan nga balaan, ginhatag ining bugay, sa pagwali sa mga Gentil sang dimatungkad nga kamanggaran ni Cristo,

9kag sa pagpakita sa tanan nga tawo kon ano ang buko sang tinago nga sa katuigan natago sa Dios nga nagtuga sang tanan nga butang;

10nga paagi sa iglesia ang sarisari nga kaalam sang Dios mapakilala sa mga punoan kag sa mga kagamhanan sa langitnon nga mga duug.

11Ini sono sa dayon nga tinutuyo nga ginhimo niya kay Cristo Jesus nga aton Ginoo,

12nga sa iya may kasidla kita kag pagsalig sa pagpalapit paagi sa pagtoo sa iya.

13Gani ginapangayo ko nga indi kamo magkapunaw sa akon pag-antus tungud sa inyo, nga amo ang inyo himaya.

14Sa sining kabangdanan ginaluhud ko ang akon mga tuhud sa atubangan sang Amay,

15nga gikan sa iya ginahingalanan ang tagsa ka panimalay sa langit kag sa duta,

16nga itugut niya sa inyo sono sa kamanggaran sang iya himaya, nga mapabaskug kamo nga may gahum sa tawo nga nasulud paagi sa iya Espiritu,

17kag nga si Cristo magpuyo sa inyo mga tagiposoon paagi sa pagtoo; sa katuyoan nga kamo, nga nakagamut kag napasad sa gugma,

18manginmay gahum sa paghangup kaupud sang tanan nga balaan kon ano ang kasangkaron kag kalabaon kag kataason kag kadalumon,

19kag sa pagkilala sang gugma ni Cristo nga nagalabaw sa ihibalo, agud nga mapun-an kamo sa tanan nga kabug-osan sang Dios.

20Karon sa iya nga sarang makahimo sono sa gahum nga nagapanghikot sa aton sing lakas kabugana labaw sa tanan nga aton ginapangayo ukon ginahunahuna,

21sa iya ang himaya sa iglesia kag sa kay Cristo Jesus sa tanan nga kaliwatan, sa gihapon kag gihapon. Kabay pa.

← Chapter 2 Jump to: Chapter 4 →