Ephesians 5

Ilonggo (Ang Biblia (1982))

← Chapter 4 Jump to: Chapter 6 →

1Busa magmanug-ilog kamo sang Dios, subong nga mga anak nga hinigugma.

2Kag maggawi sa gugma, subong nga si Cristo man naghigugma sa aton kag nagtugyan sang iya kaugalingon tungud sa aton, nga dolot kag halad nga maamyon sa Dios.

3Apang ang pagkamakihilawason kag ang tanan nga kahigkoan ukon paghamkon dili gid paghingadlan sa inyo, subong nga nagakaigo sa mga balaan.

4Magmanginwalay binastos, ukon binuang nga hinambal, ukon malaw-ay nga linahog, nga indi nagakaigo; kondi hinonoo mga pagpasalamat.

5Saligi ninyo ini, nga walay makihilawason ukon mahigko nga tawo, ukon mahamkonon (kon sayoron, diwatahan), nga may panublion sa ginharian ni Cristo kag sang Dios.

6Walay tawo nga magdaya sa inyo sa mga polong nga walay pulus, kay bangud sining mga butang nagaabut ang kasingkal sang Dios sa mga anak sang pagkadimatinumanon.

7Busa dili kamo mag-umalambit sa ila,

8kay kamo anay kadudulman, apang karon kapawa sa Ginoo; maggawi subong nga mga anak sang kapawa

9(kay ang bunga sang kapawa yara sa tanan nga maayo kag matarung kag matuud),

10kag magtinguha sa paghibalo kon ano ang kalahamut-an sa Ginoo.

11Dili kamo magpakig-ambit sa dimabungahon nga mga buhat sang kadudulman, kondi hinonoo sabdonga sila.

12Kay ang mga butang nga ginahimo nila sa tago makahuluya bisan hambalon;

13apang ang tanan nga butang kon ginasabdong ginapahayag sang kapawa, kay ang tagsa ka butang nga ginpahayag amo ang kapawa.

14Busa ginsiling, “Pagmata, ikaw nga nagakatolog, kag bangon gikan sa mga patay, kag si Cristo magasilak sa imo.”

15Niyan tan-awa sing mainandamon kon paano ang paggawi ninyo, indi subong nga dimaalam kondi subong nga mga maalam,

16nga nagahimulus sang kahigayonan bangud nga ang mga adlaw malaut.

17Busa dili kamo magpakabuang, kondi maghangup kon ano ang kabubut-on sang Ginoo.

18Kag dili kamo maghinobog sing alak, sa diin may pagpatuyang; kondi magmapuno sang Espiritu,

19nga nagahinambalanay sa salmos kag mga ambahanon kag mga kalantahon nga espirituhanon, nga nagaambahan kag nagadayaw sa Ginoo sa inyo bug-os nga tagiposoon,

20nga nagapasalamat sa gihapon tungud sang tanan nga butang sa Dios nga Amay sa ngalan sang aton Ginoong Jesu-Cristo.

21Magpasakup kamo ang isa sa isa sa pagtahud kay Cristo.

22Mga asawa, magpasakup kamo sa inyo mga bana, subong nga sa Ginoo.

23Kay ang bana amo ang olo sang asawa subong nga si Cristo man amo ang olo sang iglesia, nga iya lawas, kag sia gid ang Manluluwas sini.

24Subong nga ang iglesia nagapasakup kay Cristo, subong man ang mga asawa sa ila mga bana sa tagsa ka butang.

25Mga bana, higugmaa ang inyo mga asawa, subong nga si Cristo man naghigugma sang iglesia kag nagtugyan sang iya kaugalingon tungud sa iya,

26agud nga mapakabalaan niya sia, nga gintinloan sia bangud sang paghugas sa tubig upud sang polong,

27agud nga mapaatubang sa iya kaugalingon ang iglesia nga mahimayaon, nga walay dagta ukon ukut ukon bisan ano nga subong nga butang, agud nga manginbalaan sia kag walay kasawayan.

28Subong man ang mga bana dapat maghigugma sang ila mga asawa subong sang ila kaugalingon nga mga lawas. Ang nagahigugma sang iya asawa nagahigugma sang iya kaugalingon.

29Kay walay tawo nga nagadumut sang iya kaugalingon nga unud, kondi nagasagud kag nagaamlig sini, subong nga si Cristo man sang iglesia,

30bangud nga mga bahin kita sang iya lawas.

31“Sa sining kabangdanan ang lalaki magabiya sang iya amay kag iloy kag magahiusa sa iya asawa, kag ang duha mangin-isa.”

32Ining tinago daku, kag nagahambal ako nahanungud kay Cristo kag sang iglesia;

33walay sapayan ang tagsatagsa sa inyo maghigugma sang iya asawa subong sang iya kaugalingon, kag ang asawa magtahud sang iya bana.

← Chapter 4 Jump to: Chapter 6 →