Ephesians 4

Ilonggo (Ang Biblia (1982))

← Chapter 3 Jump to: Chapter 5 →

1Busa ako, nga binilanggo tungud sa Ginoo, nagapakilooy sa inyo nga maggawi sing takus sa pagtawag nga nabaton ninyo,

2nga may bug-os nga pagpaubus kag pagkamapailubon, nga may pagbatas, nga nagapinaumuray kamo sa gugma,

3nga maukud sa pagtipig sang paghiusa sang Espiritu sa higot sang paghidait.

4May isa ka lawas kag isa ka Espiritu, subong man nga gintawag kamo sa isa ka paglaum sang inyo pagkatinawag,

5isa ka Ginoo, isa ka pagtoo, isa ka bautismo,

6isa ka Dios kag Amay naton nga tanan, nga sa ibabaw sang tanan kag yara sa tanan kag sa sulud sang tanan.

7Apang sa tagsatagsa sa aton ginhatag ang bugay sono sa talaksan sang dolot ni Cristo.

8Busa ginsiling, “Sang pagkayab niya sa hitaas ginbihag niya ang mga bihag, kag naghatag sing mga hiyas sa mga tawo.”

9(Sa pagsiling, “Nagkayab sia,” ano bala ini kondi nga sia man nagpanaug sa naidalum nga mga bahin sang duta?

10Ang nagpanaug amo man ang nagkayab sa ibabaw pa sang tanan nga langit, agud nga mapuno niya ang tanan nga butang.)

11Kag ginhatag niya sa iban nga magpinadala, sa iban nga magmanalagna, sa iban nga mag-evangelista, sa iban nga magpastor kag magmanunudlo,

12nga sa paghimpit sang mga balaan, sa buluhaton sang pagpanghikot, sa pagpalig-on sang lawas ni Cristo,

13tubtub nga makadangat kita tanan sa paghiusa sang pagtoo kag sang pagkilala sang Anak sang Dios, sa isa ka hamtong nga tawo, sa talaksan sang kataason sang kabug-osan ni Cristo;

14agud nga indi na kita magmanginbata, nga ginabolabola kag ginapalidpalid sang tagsa ka hangin sang pagtolon-an, paagi sa pagkaabtik sang mga tawo, sa ila pagkadaya sa mga limbong sang sayup.

15Kondi, sa nagahambal sang kamatooran sa gugma, magtubo kita sa tanan nga butang sa iya nga amo ang olo, si Cristo,

16nga gikan sa iya ang bug-os nga lawas, nahaum sing nagakaigo kag nabilog bangud sang tagsa ka lutalutahan nga nagasangkap sini, kon nagapanghikot sing nagakaigo ang tagsa ka bahin, nagapatubo sang lawas kag nagapalig-on sang iya kaugalingon sa gugma.

17Karon nagasiling ako sini kag nagapamatuud sa Ginoo, nga dili na kamo maggawi subong sang paggawi sang mga Gentil man, sa pagkawalay pulus sa ila mga hunahuna;

18gindulman sila sa ila paghangup, nga nahamulag sa kabuhi sang Dios bangud sang pagkadimaalam nga yara sa ila, bangud sang pagtig-a sang ila tagiposoon;

19nawad-an sila sing ibalatyag kag nagtugyan sang ila kaugalingon sa kaulag, sa pagbuhat sang tanan nga kahigkoan nga may paghamkon.

20Indi amo ang naton-an ninyo kay Cristo!—

21kon matuud nga nakabati kamo nahanungud sa iya kag natudloan sa iya, subong nga ang kamatooran yara kay Jesus.

22Ubaha ninyo ang daan nga kinaugali nga iya sang inyo una nga paggawi kag dunut paagi sa madaya nga mga kailigbon,

23kag magbag-o kamo sa espiritu sang inyo mga hunahuna,

24kag magsuklub sang bag-ong kinaugali, nga gintuga sa kaangay sang Dios sa matuud nga pagkamatarung kag pagkabalaan.

25Busa, sa ginauba ang kabutigan, maghambal kamo sing kamatooran ang tagsatagsa sa iya isigkatawo, kay mga bahin kita ang isa sang isa.

26Magpangakig apang dili magpakasala; dili pagpatunuri sing adlaw ang inyo kaakig,

27kag dili paghatagi sing kahigayonan ang yawa.

28Ang nagpangawat dili na magpangawat, kondi hinonoo magpangabudlay sia, nga nagabuhat sa iya mga kamut sang butang nga maayo, agud nga may ikahatag sia sa mga nawad-an.

29Dili pagpagowaa sa inyo mga baba ang malain nga polong, kondi ang maayo sa pagpalig-on, sono sa kinahanglan, agud nga makahatag sing bugay sa mga nagapamati.

30Kag dili pagpasubu-a ang Espiritu Santo sang Dios, nga sa iya pinat-inan kamo nga sa adlaw sang pagtubus.

31Isikway ninyo ang tanan nga kapaitan kag kasingkal kag kaakig kag sininggitanay kag pagpasipala, upud sa tanan nga kalainan,

32kag magmainayohon kamo ang isa sa isa, malolo, nga nagapinatawaray, subong nga ang Dios man kay Cristo nagpatawad sa inyo.

← Chapter 3 Jump to: Chapter 5 →