Galatians 1

Ilonggo (Ang Biblia (1982))

Jump to: Chapter 2 →

1Si Pablo nga pinadala—indi gikan sa mga tawo ukon paagi sa tawo, kondi paagi kay Jesu-Cristo kag sa Dios nga Amay, nga nagbanhaw sa iya—

2kag ang tanan nga kauturan nga kaupud nakon, Sa mga iglesia sa Galacia:

3Ang bugay sa inyo kag paghidait gikan sa Dios nga Amay kag sa aton Ginoong Jesu-Cristo,

4nga naghatag sang iya kaugalingon tungud sa aton mga sala agud nga maluwas niya kita gikan sini karon nga malaut nga panuigon, sono sa kabubut-on sang aton Dios kag Amay;

5nga sa iya ang himaya sa katuigan sang katuigan. Kabay pa.

6Natingala ako nga nagahalin kamo sing tama kadali gikan sa iya nga nagtawag sa inyo sa bugay ni Cristo kag nagaliso sa tuhay nga maayong balita—

7indi nga may iban nga maayong balita, kondi may pila nga nagagamo sa inyo kag buut magpatiko sang maayong balita ni Cristo.

8Apang bisan kami, ukon ang manugtunda gikan sa langit, magwali sa inyo sing maayong balita nga tuhay sang sa amon ginwali sa inyo, magmanginpinakamalaut sia.

9Subong sang nasiling namon anay, amo man ginasiling ko liwat karon, Kon ang bisan sin-o nga tawo nagawali sa inyo sing maayong balita tuhay sang nabaton ninyo, magmanginpinakamalaut sia.

10Nagapangita bala ako karon sang kahamuut sang mga tawo, ukon sang Dios? Ukon nagahimulat bala ako sa pagpahamuut sa mga tawo? Kon nagapahamuut pa ako sa mga tawo, indi ako kuntani ulipon ni Cristo.

11Kay ginapakilala ko sa inyo, mga kauturan, nga ang maayong balita nga ginwali ko indi sono sa tawo.

12Kay wala ko mabaton ini gikan sa tawo, ukon gintudlo ini sa akon, kondi nag-abut ini paagi sa bugna ni Jesu-Cristo.

13Kay nabatian ninyo ang akon paggawi sang nagtaliwan nga tion sa pagtoloohan sang mga Judio, kon paano nga ginhingabut ko sing lakas ang iglesia sang Dios kag gintinguhaan ang paglaglag sini;

14kag naunhan ko sa pagtoloohan sang mga Judio ang madamu sang katubo nakon sa akon mga kasimanwa, sanglit nga lakas pa ako kakugi sa mga pinanlatonlaton nga sugid sang akon mga ginikanan.

15Apang sang sia nga nagpain sa akon sa wala pa ako matawo kag nagtawag sa akon paagi sa iya bugay,

16nahamuut sa pagpahayag sang iya Anak sa akon, agud nga mawali ko sia sa mga Gentil, wala ako magpakigsapul sa unud kag dugo,

17ukon magtaklad ako sa Jerusalem sa ila nga mga pinadala nga una sa akon, kondi nagkadto ako sa Arabia; kag nagbalik ako liwat sa Damasco.

18Ugaling sa tapus ang tatlo ka tuig nagtaklad ako sa Jerusalem sa pagduaw kay Cefas, kag nagpabilin kaupud niya sing napulog lima ka adlaw.

19Apang wala ko makita ang iban nga mga pinadala luwas kay Santiago nga utud sang Ginoo.

20(Sa mga ginasulat ko sa inyo, sa atubangan sang Dios, wala ako nagabutig!)

21Niyan nagkadto ako sa mga ginsakpan sang Siria kag Cilicia.

22Kag wala pa ako makilal-i sa guya sa mga iglesia ni Cristo sa Judea;

23nakabati lamang sila nga ginsiling, “Sia nga sang una naghingabut sa aton karon nagawali sang pagtoo nga anay iya gintinguhaan sa paglaglag.”

24Kag ginhimaya nila ang Dios bangud sa akon.

Jump to: Chapter 2 →