Galatians 6

Ilonggo (Ang Biblia (1982))

← Chapter 5 Jump to:

1Mga kauturan, kon ang isa ka tawo masapwan sa bisan anong paglapas, kamo nga mga espirituhanon magpasag-uli sa iya sa espiritu nga malolo. Mag-andam sa imo kaugalingon, basi kon ikaw man pagsulayon.

2Magdinalhanay kamo sang inyo mga lulan, kag sa amo matuman ang kasogoan ni Cristo.

3Kay kon ang bisan sin-ong tawo nagapakasin-o, nga indi sia si sin-o, nagadaya sia sa iya kaugalingon.

4Apang ang tagsatagsa magtilaw sang iya buhat, kag niyan ang kabangdanan niya sa pagpabugal manginsa iya kaugalingon lamang kag indi sa iya isigkatawo.

5Kay ang tagsa ka tawo magdala sang iya kaugalingon nga lulan.

6Ang ginaton-an sa polong magpaambit sa nagatudlo sa iya sa tanan nga maayong butang.

7Dili kamo magtalang; ang Dios indi tiliawtiawan, kay bisan ano ang ginasab-ug sang tawo, ina man ang iya anihon.

8Kay ang nagasab-ug sa iya kaugalingon nga unud magaani sing kaduluntan gikan sa unud; apang ang nagasab-ug sa Espiritu magaani sing kabuhi nga dayon gikan sa Espiritu.

9Kag dili kita magpakaluya sa paghimo sing maayo, kay sa nagakaigo nga dag-on magaani kita, kon indi kita pagpunawon.

10Gani niyan, sa may kahigayonan kita, magbuhat kita sang maayo ayon sa tanan nga tawo, kag labi na gid sa mga tagapanimalay sang pagtoo.

11Tan-awa ninyo kon daw ano kadalagku nga mga letra ang ginasulat ko sa inyo sa akon kaugalingon nga kamut.

12Ang nagahandum sang maanyag nga pagpakita sa unud amo ang magapilit sa inyo nga circuncidahon, kag agud lamang nga indi sila paghingabuton tungud sang cruz ni Cristo.

13Kay bisan sila nga nagapacircuncidar wala nagabantay sang kasogoan, apang nagahandum sila nga circuncidahon kamo agud nga magpabugal sila sa inyo unud.

14Apang magmalayo sa akon ang pagpabugal luwas sa cruz sang aton Ginoong Jesu-Cristo, nga paagi sini ang kalibutan nalansang sa cruz sa akon, kag ako sa kalibutan.

15Kay ang circuncision ukon ang dicircuncision walay ano man, kondi ang bag-o nga tinuga.

16Ang paghidait kag kalooy manginsa tanan nga nagalakat sa sining solondan, sa Israel sang Dios.

17Kutub karon walay tawo nga maggamo sa akon; kay ginadala ko sa akon lawas ang mga pat-in ni Jesus.

18Ang bugay sang aton Ginoong Jesu-Cristo manginkaupud sa inyo espiritu, mga kauturan. Kabay pa.

← Chapter 5 Jump to: