Galatians 2

Ilonggo (Ang Biblia (1982))

← Chapter 1 Jump to: Chapter 3 →

1Ugaling sa tapus ang napulog apat ka tuig nagtaklad ako liwat sa Jerusalem kaupud ni Bernabe, nga gin-upud ko man si Tito.

2Nagtaklad ako paagi sa bugna; kag ginpahamtang ko sa atubangan nila (apang sa tago sa atubangan sang mga bantug) ang maayong balita nga ginawali ko sa mga Gentil, basi kon magdalagan ako ukon nakadalagan sa walay pulus.

3Apang bisan pa si Tito nga upud nakon, nga Griego, wala pagpilita nga circuncidahon.

4Apang bangud sang dimatuud nga mga kauturan nga ginpasulud sing tago, nga nagsulud sing tago sa paglampitaw sang aton kahilwayan kay Cristo Jesus, agud nga madala nila kita sa kahiolipnan—

5sa ila wala kami magpasakup bisan isa ka takna, agud nga ang kamatooran sang maayong balita magpadayon sa inyo.

6Kag sa mga ginbantug nga ginpakasin-o (bisan mga ano sila walay ano man sa akon; ang Dios wala nagapasulabi sing tawo)—sila, ginasiling ko, nga mga bantug walay bisan ano nga ginpaambit sa akon;

7apang sa baylo, sang nakita nila nga gintugyanan ako sang maayong balita sa dicircuncidado, subong nga si Pedro sa circuncidado

8(kay ang nagpanghikot paagi kay Pedro nga sa pagkapinadala sa mga circuncidado nagpanghikot man paagi sa akon nga sa mga Gentil),

9kag si Santiago kag si Cefas kag si Juan, sila nga ginbantug nga mga haligi, sang nahantup nila ang bugay nga ginhatag sa akon, naghatag sa akon kag kay Bernabe sang too nga kamut sang pagpakig-ambit, agud nga magkadto kami sa mga Gentil kag sila sa mga circuncidado;

10lamang nga pagdumdumon namon ang mga imol, nga ini gid nga butang makugi man ako sa paghimo.

11Apang sang pag-abut ni Cefas sa Antioquia ginsupukan ko sia sa guya, bangud nga salabdongon sia.

12Kay sang wala pa mag-abut ang pila ka tawo gikan kay Santiago, nagkaon sia upud sa mga Gentil; apang sang pag-abut nila nag-isul sia kag nagbulag, nga nahadluk sa mga taga-circuncision.

13Kag ang iban sang mga Judio nagpakasalimpapaw kaupud niya, sa bagay nga bisan si Bernabe nadala man sa ila pagkasalimpapaw.

14Apang sang nakita ko nga wala sila nagagawi sing matarung sono sa kamatooran sang maayong balita, nagsiling ako kay Cefas sa atubangan sang tanan, “Kon ikaw, nga Judio, nagakabuhi subong nga Gentil kag indi subong nga Judio, paano bala nga ginapilit mo ang mga Gentil sa pagpangabuhi subong sang mga Judio?”

15Kita aton, nga mga Judio sa pagkatawo kag indi mga Gentil nga makasasala,

16nakahibalo nga ang tawo wala ginapakamatarung paagi sa mga buhat sang kasogoan kondi paagi sa pagtoo kay Jesu-Cristo, bisan kita nagtoo kay Jesu-Cristo, agud nga pagpakamatarungon kita paagi sa pagtoo kay Cristo, kag indi paagi sa mga buhat sang kasogoan, kay sa mga buhat sang kasogoan walay bisan sin-o nga pakamatarungon.

17Apang kon, sa naghimulat kita nga pagpakamatarungon kay Cristo, kita sa aton kaugalingon man nasapwan nga mga makasasala, manughikot bala si Cristo sang sala? Malayo ina!

18Apang kon ginatukud ko liwat ang mga butang nga akon ginlaglag, niyan nagapakilala ako sang akon kaugalingon nga malinapason.

19Kay ako paagi sa kasogoan napatay sa kasogoan, agud nga magkabuhi ako sa Dios.

20Ginlansang ako sa cruz kaupud ni Cristo; indi na ako ang nagakabuhi, kondi si Cristo nagakabuhi sa akon; kag ang kabuhi nga ginakabuhi ko karon sa unud ginakabuhi ko sa pagtoo sa Anak sang Dios, nga naghigugma sa akon kag nagtugyan sang iya kaugalingon tungud sa akon.

21Wala ko ginapakawalay pulus ang bugay sang Dios; kay kon ang pagkamatarung paagi sa kasogoan, niyan si Cristo napatay sa walay kapuslanan.

← Chapter 1 Jump to: Chapter 3 →