Galatians 4

Ilonggo (Ang Biblia (1982))

← Chapter 3 Jump to: Chapter 5 →

1Nagasiling ako nga sa bata pa ang manunubli, wala sia sing ginakatuhayan sa ulipon, bisan sia ginoo sang tanan;

2kondi sa idalum sia sang mga manugbantay kag mga tulugyanan tubtub sa adlaw nga gintangdo sang amay.

3Subong man kita; sang mga bata pa, gin-ulipon kita sa idalum sang nahauna gid nga mga pagtolon-an sang kalibutan.

4Apang sang pag-abut sang kabug-osan sang tion, ginpadala sang Dios ang iya Anak, nga natawo sa babayi, natawo sa idalum sang kasogoan,

5sa pagtubus sang mga sa idalum sang kasogoan, agud nga mabaton ta ang pagkaanak.

6Kag bangud nga mga anak kamo, ang Dios nagpadala sang Espiritu sang iya Anak sa aton mga tagiposoon, nga nagasinggit, “Abba! Amay!”

7Gani paagi sa Dios indi na kamo ulipon kondi anak, kag kon anak niyan manunubli.

8Sa sadto nga tion, nga wala kamo makakilala sa Dios, mga ulipon kamo sa ila nga sa kinaugali indi mga dios;

9apang karon nga nakakilala kamo sa Dios, ukon hinonoo nakilala sang Dios, paano bala nga nagabalik kamo liwat sa maluya kag imol nga nahauna gid nga mga pagtolon-an, nga sa ila buut kamo magpaulipon liwat?

10Ginabantayan ninyo ang mga adlaw, kag mga bulan, kag mga panag-on, kag mga tuig!

11Nagakahadluk ako, basi kon nakapangabudlay ako sa inyo sa walay pulus.

12Ginapakilooy ko sa inyo, mga kauturan, nga magmanginsubong kamo sa akon, kay ako man subong sa inyo. Wala kamo sing nahimo nga sayup sa akon;

13nakahibalo kamo nga bangud sang kaluyahon sang unud nagwali ako sa inyo sang maayong balita sing una;

14kag bisan ang akon kahimtangan pagtilaw sa inyo, wala ninyo pag-uligyata ukon pagtamaya ako, kondi ginbaton ninyo ako subong nga manugtunda sang Dios, subong kay Cristo Jesus.

15Diin na bala ang pagpakabulahan ninyo sang inyo kaugalingon? Kay nagapanaksi ako sa inyo nga, kon mahimo, buut ninyo kuntani lukaton ang inyo mga mata kag ihatag sila sa akon.

16Gani niyan nanginkaaway bala ako ninyo tungud sa pagsugid sa inyo sang kamatooran?

17Ginapakadaku gid nila kamo, apang sa indi maayong katuyoan; buut kamo nila isikway, agud nga mapakadaku ninyo sila.

18Sa maayong katuyoan maayo sa gihapon ang pagpakadaku sa inyo, kag indi lamang kon yara ako sa inyo.

19Mga anak ko, nga tungud sa inyo ginasakitan ako liwat tubtub si Cristo mahuman sa inyo!

20Buut ko kuntani nga yara ako sa inyo karon kag magbaylo sang akon tingug, kay ginaligban ako nahanungud sa inyo.

21Sugiri ako, kamo nga buut magpaidalum sa kasogoan, wala bala kamo makabati sang kasogoan?

22Kay nasulat na nga si Abraham may duha ka anak nga lalaki, ang isa sa ulipon nga babayi kag ang isa sa hilway nga babayi.

23Apang ang anak sa ulipon natawo sono sa unud, ang anak sa hilway nga babayi paagi sa saad.

24Karon ini isa ka palaanggiran: ining mga babayi amo ang duha ka katipan. Ang isa gikan sa Bukid nga Sinai, nga nagapanganak nga sa kahiolipnan; sia si Agar.

25Karon si Agar amo ang Bukid nga Sinai sa Arabia; ang naigoan niya Jerusalem nga amo karon, kay yara sia sa kahiolipnan kaupud sang iya mga anak.

26Apang ang Jerusalem nga sa ibabaw hilway, kag sia aton iloy.

27Kay nasulat na, “Magkalipay, O baw-as nga wala nagapanganak; maghugyaw kag magsinggit, ikaw nga wala ginasakiti; kay madamu pa ang mga anak sang binayaan sang sa iya nga may bana.”

28Karon kita, mga kauturan, subong kay Isaac, mga anak sang saad.

29Apang subong sadtong tion ang natawo sono sa unud naghingabut sa iya nga natawo sono sa Espiritu, amo man ini karon.

30Apang ano bala ang ginasiling sang kasulatan? “Sobola ang ulipon nga babayi kag ang iya anak; kay ang anak sang ulipon nga babayi indi magapanubli kaupud sang anak sang hilway nga babayi.”

31Gani, mga kauturan, indi kita mga anak sang ulipon nga babayi kondi sang hilway nga babayi.

← Chapter 3 Jump to: Chapter 5 →