Galatians 3

Ilonggo (Ang Biblia (1982))

← Chapter 2 Jump to: Chapter 4 →

1O buangbuang nga mga Galaciahanon! Sin-o bala ang nagganyat sa inyo, nga sa atubangan sang inyo mga mata ginpahayag si Jesu-Cristo sing dayag nga ginlansang sa cruz?

2Ini lamang ang buut ko masayran sa inyo: Nabaton bala ninyo ang Espiritu paagi sa mga buhat sang kasogoan, ukon paagi sa pagpamati nga may pagtoo?

3Tama bala kamo ka buangbuang? Sa nakasugud sa Espiritu, karon nagahingapus kamo sa unud?

4Nag-antus bala kamo sing madamung butang sa walay pulus?—kon matuud nga walay pulus.

5Ang nagahatag sa inyo sang Espiritu kag nagapanghikot sing mga katingalahan sa tunga ninyo ginahimo bala niya ini paagi sa mga buhat sang kasogoan, ukon paagi sa pagpamati nga may pagtoo?

6Sa amo si Abraham “nagtoo sa Dios, kag gin-isip ini sa iya nga sa pagkamatarung.”

7Gani nakita ninyo nga ang mga tawo nga may pagtoo amo ang mga anak ni Abraham.

8Kag ang kasulatan, nga nagatan-aw nga daan nga ang Dios magapakamatarung sang mga Gentil paagi sa pagtoo, nagwali nga daan sang maayong balita kay Abraham, nga nagasiling, “Sa imo pakamaayohon ang tanan nga pungsud.”

9Gani niyan, ang mga tawo nga may pagtoo ginapakamaayo kaupud ni Abraham nga may pagtoo.

10Kay ang tanan nga nagasalig sa mga buhat sang kasogoan yara sa idalum sang pagpakamalaut; kay nasulat na, “Pinakamalaut ang tagsatagsa nga wala nagapadayon sa tanan nga butang nga nasulat sa tolon-an sang kasogoan, kag wala nagahimo sa ila.”

11Karon ini maathag nga walay tawo nga ginapakamatarung paagi sa kasogoan sa atubangan sang Dios; kay “Ang matarung magakabuhi paagi sa pagtoo”;

12apang ang kasogoan wala napasad sa pagtoo, kay “Ang nagahimo sa ila magakabuhi paagi sa ila.”

13Si Cristo nagtubus sa aton gikan sa pagpakamalaut sang kasogoan, nga ginpakamalaut tungud sa aton—kay nasulat na, “Pinakamalaut ang tagsa nga nabitay sa kahoy” —

14agud nga sa kay Cristo Jesus ang pagpakamaayo ni Abraham maglambut sa mga Gentil, agud nga mabaton ta ang saad sang Espiritu paagi sa pagtoo.

15Mga kauturan, sa paghatag sing tawohanon nga huwaran: bisan katipan sang tawo walay bisan sin-o nga nagasikway, ukon nagadugang sini sa tion napamatud-an ini.

16Karon kay Abraham ginpamolong ang mga saad kag sa iya kaliwat. Wala ini nagasiling, “Kag sa mga kaliwat,” subong nga madamu; kondi, subong nga sa isa, “Kag sa imo kaliwat,” nga si Cristo.

17Karon nagasiling ako sini: ang kasogoan, nga nag-abut sa tapus ang apat ka gatus kag katloan ka tuig, wala nagasikway sang katipan nga ginpamatud-an nga daan sang Dios, agud nga manginwalay pulus ang saad.

18Kay kon ang panublion paagi sa kasogoan, indi na ini paagi sa saad; apang ginhatag ini sang Dios kay Abraham paagi sa saad.

19Niyan ano bala ang kasogoan? Gindugang ini bangud sang mga paglapas, tubtub nga mag-abut ang kaliwat nga sa iya nahimo ang saad; kag gintangdo ini paagi sa mga manugtunda sa kamut sang isa ka manugpatunga.

20Karon ang manugpatunga indi manugpatunga tungud sa isa lamang; apang ang Dios isa lang.

21Niyan ang kasogoan batok bala sa mga saad sang Dios? Malayo ina; kay kon may kasogoan nga nahatag nga makabuhi, niyan ang pagkamatarung nanginpaagi kuntani sa kasogoan gid.

22Apang gintakpan sang kasulatan ang tanan nga butang sa idalum sang sala, agud nga ang saad paagi sa pagtoo sa kay Jesu-Cristo mahatag sa mga nagatoo.

23Karon sa wala pa mag-abut ang pagtoo, ginhuptan kita sa idalum sang kasogoan, nga ginpunggan tubtub ang pagtoo mapahayag sa olihi.

24Sa bagay nga ang kasogoan nanginmanugtuytuy naton tubtub kay Cristo, agud nga mapakamatarung kita paagi sa pagtoo.

25Apang karon nga ang pagtoo nag-abut, wala na kita sa idalum sang manugtuytuy;

26kay kamo tanan mga anak sang Dios, tungud sa pagtoo kay Cristo Jesus.

27Kay ang kapid-an sa inyo nga ginbautisohan kay Cristo nagsuklub kay Cristo.

28Walay Judio ukon Griego, walay ulipon ukon hilway, walay lalaki ukon babayi; kay kamo tanan isa kay Cristo Jesus.

29Kag kon kamo iya ni Cristo, niyan kaliwat kamo ni Abraham, mga manunubli sono sa saad.

← Chapter 2 Jump to: Chapter 4 →