Romans 1

Ilonggo (Ang Biblia (1982))

Jump to: Chapter 2 →

1Si Pablo, nga ulipon ni Jesu-Cristo, nga gintawag nga pinadala, nga ginpain sa maayong balita sang Dios

2nga ginsaad niya nga daan paagi sa iya mga manalagna sa balaan nga mga kasulatan,

3nahanungud sa iya Anak, nga natawo sa kaliwat ni David sono sa unud

4kag gintangdoan nga Anak sang Dios nga may gahum sono sa Espiritu sang pagkabalaan paagi sa pagkabanhaw, si Jesu-Cristo nga aton Ginoo,

5nga paagi sa iya nakabaton kami sang bugay kag pagkapinadala nga sa katumanan sang pagtoo sa tunga sang tanan nga pungsud tungud sa iya ngalan,

6nga sa tunga nila amo man kamo nga gintawag nga iya ni Jesu-Cristo;

7Sa tanan nga yara sa Roma nga mga hinigugma sang Dios, nga gintawag nga mga balaan: Ang bugay sa inyo kag paghidait nga gikan sa Dios nga aton Amay kag kay Ginoong Jesu-Cristo.

8Sa nahauna, nagapasalamat ako sa akon Dios paagi kay Jesu-Cristo tungud sa inyo tanan, bangud nga ang inyo pagtoo ginabantala sa bug-os nga kalibutan.

9Kay saksi ko ang Dios, nga akon gina-alagad sa akon espiritu sa maayong balita sang iya Anak, nga sa walay langan ginasambit ko kamo sa gihapon sa akon mga pangamuyo,

10nga nagapangabay kon sa bisan ano nga bagay karon sa katapusan mapatigayon ako sang kabubut-on sang Dios sa pagkara sa inyo.

11Kay nagahandum ako sa pagpakigkita sa inyo, agud nga mapaambit ko sa inyo ang mga hiyas nga espirituhanon sa pagpalig-on sa inyo,

12nga amo, nga kita paglipayon sang pagtoo sang tagsatagsa, ang inyo kag akon.

13Ako buut, mga kauturan, nga kamo makasayud nga sa masunsun naghumut ako sa pagkara sa inyo (apang tubtub karon ginasablagan ako), agud nga may bunga ako sa inyo man subong sa iban sang mga Gentil.

14May utang ako sa mga Griego kag sa mga barbaro, sa mga maalam kag sa mga buangbuang;

15gani ginahandum ko gid ang pagwali sang maayong balita sa inyo man nga yara sa Roma.

16Kay wala ko ginakahuya ang maayong balita: ini amo ang gahum sang Dios nga sa kaluwasan sa tagsatagsa nga nagatoo, sa Judio sing una kag sa Griego man.

17Kay sa sini ginapahayag ang pagkamatarung sang Dios paagi sa pagtoo nga sa pagtoo; subong nga nasulat na, “Ang matarung magakabuhi paagi sa pagtoo.”

18Kay ang kasingkal sang Dios ginapahayag gikan sa langit batok sa tanan nga pagkadidiosnon kag pagkadimatarung sang mga tawo nga bangud sang ila pagkadimatarung ginapunggan ang kamatooran.

19Bangud nga ang makilala nahanungud sa Dios hayag sa ila, kay ginpahayag ini sang Dios sa ila.

20Ang dimakita nga mga pagkahimpit niya, nga amo, ang iya walay katapusan nga gahum kag pagkadios, kutub sa pagtuga sang kalibutan nahantup sing maathag sa mga butang nga nahimo. Gani wala sila sing balibad;

21kay bisan nakakilala sila sa Dios wala nila paghimayaa sia subong nga Dios ukon nagpasalamat sa iya, kondi nanginwalay pulus sa ila mga hunahuna kag ang ila mga painoino nga pakok gindulman.

22Sa ila pagpadayag nga mga maalam, nanginbuangbuang sila,

23kag nagbaylo sang himaya sang Dios nga dimadinulunton sa kaanggid sang mga larawan sang tawo nga madinulunton ukon mga pispis ukon mga sapat nga apat sing tiil ukon mga sapat nga nagasaug.

24Busa ginpatumbayaan sila sang Dios sa mga kailigbon sang ila mga tagiposoon sa kahigkoan, sa pagpakahuya sang ila mga lawas sa tunga nila,

25kay ginbaylo nila sa butig ang kamatooran sang Dios kag nagsimba kag nag-alagad sang tinuga sa baylo sang Manunuga, nga dalayawon sa gihapon! Kabay pa.

26Sa sining kabangdanan ginpatumbayaan sila sang Dios sa mga balatyagon nga makahuluya. Ang ila kababayin-an nagbaylo sang mga paggamit nga kinaugali sa mga batok sa kinaugali,

27kag sa amo man nga bagay ang kalalakin-an nagabiya sang kinaugali nga mga paggamit sang mga babayi kag nasonog sa ila kailigbon sa isa kag isa, ang mga lalaki sa mga lalaki nagabuhat sang makahuluya kag nagabaton sa ila mga kaugalingon sang silot nga nagakaigo sa ila sayup.

28Kag sanglit nagdumili sila sa pagkilala sa Dios, ginpatumbayaan sila sang Dios sa panghunahuna nga dunut kag sa paggawi nga dinagakaigo.

29Napun-an sila sang tanan nga pagkadimatarung, pagkamalaut, pagkamahamkonon, pagkamalain. Puno sang kahisa, pagpatay, pinuyas, limbong, kadaut, mga palakutsokutso sila,

30mga malibakon, madinumuton sa Dios, matampalason, palabilabihon, hagakan, mga manugpatok sang malaut nga mga butang, dimatinumanon sa mga ginikanan,

31mga walay paghangup, dimasaligan, walay gugma, dimaloloy-on.

32Bisan sila nakahibalo sang pagsolondan sang Dios nga ang mga nagahimo sang amo nga mga butang takus sa kamatayon, indi lamang nagahimo sila sang amo kondi man nagapahanugut sa nagahimo sini.

Jump to: Chapter 2 →