Romans 9

Ilonggo (Ang Biblia (1982))

← Chapter 8 Jump to: Chapter 10 →

1Nagasiling ako sang kamatooran kay Cristo, wala ako nagabutig; ang akon kaisipan nagasaksi sa akon sa Espiritu Santo,

2nga may daku ako nga kasubu kag kasakit nga walay langan sa akon tagiposoon.

3Kay makahandum ako nga ako gid manginpinakamalaut kag ginpabulag kay Cristo tungud sa akon mga kauturan, nga akon mga kasimanwa sono sa kaliwat.

4Sila mga Israelnon, kag ila ang pagkaanak, ang himaya, ang mga katipan, ang paghatag sang kasogoan, ang panimbahon, kag ang mga saad;

5naigo sa ila ang mga patriarca, kag sa ila kaliwat, sono sa unud, amo ang Cristo. Ang Dios nga labaw sa tanan, dalayawon gihapon. Kabay pa.

6Apang indi nga ang polong sang Dios daw nanginwalay pulus. Kay indi tanan nga nagikan kay Israel mga taga-Israel,

7kag indi sila tanan mga anak ni Abraham bangud nga kaliwatan sila niya; apang “Paagi kay Isaac tawgon ang imo mga kaliwatan.”

8Kon sayoron indi ang mga anak sang unud ang mga anak sang Dios, kondi ang mga anak sang saad ginaisip subong nga mga kaliwatan.

9Kay amo ini ang polong sang saad, “Sa sining panag-on ako magakari kag si Sara magaanak sing lalaki.”

10Kag indi lamang ina, kondi si Rebeca man sang nagpanamkon tungud kay Isaac nga aton amay,

11bisan wala pa sila matawo kag wala nakahimo sing maayo ukon malain, agud nga ang tinutuyo sang Dios sono sa pagpili magpadayon, indi bangud sang mga buhat kondi bangud sang iya pagtawag,

12ginsiling sa iya, “Ang magulang magaalagad sa manghud.”

13Subong sang nasulat na, “Ginhigugma ko si Jacob, apang gindumtan ko si Esau.”

14Niyan ano bala ang isiling ta? May pagkadimatarung bala sa Dios? Malayo ina!

15Kay nagasiling sia kay Moises, “Magakalooy ako sa kalooyan ko, kag magakaawa ako sa kaawaan ko.”

16Gani indi sa pagbuut ukon pagpanikasug sang tawo, kondi sa kalooy sang Dios.

17Kay ang kasulatan nagasiling kay Faraon, “Sa sini gid nga katuyoan ginbangon ko ikaw, agud nga sa imo mapakita ko ang akon gahum kag nga ang akon ngalan mapalapnag sa bug-os nga duta.”

18Gani nagakalooy ang Dios sa buut niya kalooyan, kag sa buut niya patig-ahon ginapatig-a niya ang tagiposoon.

19Niyan magasiling ka sa akon, “Ngaa bala nga nagapangita pa sia sing sayup? Kay si sin-o bala ang makasumpung sang iya kabubut-on?”

20Apang, O tawo, sin-o ka bala nga nagasabat batok sa Dios? Magasiling bala ang gindihon sa nagdihon sa iya, “Ngaa bala nga ginhimo mo ako sing subong?”

21Wala bala sing gahum sa lunang ang maninihon, sa paghimo gikan sa amo nga linamas sing isa ka suludlan nga sa katahum kag sing isa nga sa manubo nga paggamit?

22Ano bala kon ang Dios, nga buut magpakita sang iya kasingkal kag magpakilala sang iya gahum, nagbatas sing dakung pagpailub sing mga suludlan sang kasingkal nga takus sa kalaglagan,

23agud nga mapakilala niya ang kamanggaran sang iya himaya sa mga suludlan sang kalooy, nga gin-aman niya nga daan nga sa himaya,

24bisan kita nga iya gintawag, indi gikan sa mga Judio lamang kondi sa mga Gentil man?

25Subong gid sang ginasiling sa Oseas, “Tawgon ko nga ‘akon katawohan’ ang indi ko anay katawohan, kag nga ‘akon hinigugma’ ang indi ko anay hinigugma.”

26“Kag sa duug diin ginsiling sa ila, ‘Indi kamo akon katawohan,’ didto tawgon sila nga ‘mga anak sang Dios nga buhi.’”

27Kag si Isaias nagasinggit nahanungud sa Israel: “Bisan ang kadamuon sang mga anak sang Israel subong sang balas sa dagat, ang nabilin sa ila lamang amo ang luwason;

28kay ang Ginoo magatuman sang iya polong sa duta nga may kaid-id kag pagdali.”

29Kag subong sang nasiling ni Isaias, “Kon ang Ginoo sang mga kasoldadosan wala makabilin sa aton sing kaliwat, nanginsubong kita kuntani sa Sodoma kag nanginkaangay sa Gomorra.”

30Niyan ano bala ang isiling ta? Nga ang mga Gentil nga wala magsonod sang pagkamatarung nakadangat sini, nga amo, ang pagkamatarung nga paagi sa pagtoo;

31apang ang Israel nga nagasonod sang kasogoan sang pagkamatarung wala makadangat sa pagtuman sinang kasogoan.

32Ngaa bala? Bangud nga wala nila pagpangitaa ini paagi sa pagtoo, kondi nga daw napasad ini sa mga buhat. Nasandad sila sa bato nga kasandaran,

33subong sang nasulat na, “Yari karon nagabutang ako sa Sion sing bato nga kasandaran sang mga tawo, isa ka igang nga magapukan sa ila; kag ang nagatoo sa iya indi pagpakahuy-an.”

← Chapter 8 Jump to: Chapter 10 →