Romans 5

Ilonggo (Ang Biblia (1982))

← Chapter 4 Jump to: Chapter 6 →

1Busa, sanglit ginpakamatarung kita paagi sa pagtoo, may paghidait kita sa Dios paagi sa aton Ginoong Jesu-Cristo.

2Paagi sa iya man makapalapit kita [paagi sa pagtoo] sa sining bugay diin nagatindug kita, kag nagahimaya kita sa aton paglaum sa pag-ambit sang himaya sang Dios.

3Indi lamang ina, kondi nagahimaya man kita sa mga pag-antus, nga nakahibalo nga ang pag-antus nagapatubas sing pagbatas,

4kag ang pagbatas sing panagibuut, kag ang panagibuut sing paglaum,

5kag ang paglaum wala nagapakahuya sa aton, bangud nga ang gugma sang Dios napasagahay sa aton mga tagiposoon paagi sa Espiritu Santo nga ginhatag sa aton.

6Sang mga maluya pa kita, si Cristo napatay sa nagakaigo nga panag-on tungud sa mga didiosnon.

7Kay halus nga may manginmatay tungud sa matarung nga tawo—kay ayhan tungud sa maayong tawo may mangahas bisan sa pagpanginmatay.

8Apang ang Dios nagapakilala sang iya kaugalingon nga gugma sa aton nga sang mga makasasala pa kita si Cristo napatay tungud sa aton.

9Busa, sanglit karon ginpakamatarung kita paagi sa iya dugo, labi pa nga maluwas kita sa kasingkal sang Dios paagi sa iya.

10Kay kon sang mga kaaway pa kita ginpasag-uli kita sa Dios paagi sa kamatayon sang iya Anak, labi pa, karon nga ginpasag-uli kita, nga maluwas paagi sa iya kabuhi.

11Indi lamang ina, kondi kita man nagahimaya sa Dios paagi sa aton Ginoong Jesu-Cristo, nga paagi sa iya nabaton ta karon ang pagpasag-uli.

12Busa subong nga paagi sa isa ka tawo nagsulud ang sala sa kalibutan kag paagi sa sala ang kamatayon, kag gani ang kamatayon naglaton sa tanan nga tawo kay ang tanan nakasala—

13sa wala pa mahatag ang kasogoan ang sala yari sa kalibutan, apang ang sala indi maisip kon walay kasogoan.

14Walay sapayan ang kamatayon naghari kutub kay Adam tubtub kay Moises, bisan sa mga wala makasala sa kaangay sang paglapas ni Adam, nga amo ang dagway sang isa nga magaabut.

15Apang ang bunayag nga dolot tuhay sa paglapas. Kay kon paagi sa paglapas sang isa napatay ang madamu, labi pa ang bugay sang Dios kag ang bunayag nga dolot sa bugay sinang isa ka tawo nga si Jesu-Cristo nagbugana sa madamu.

16Kag ang bunayag nga dolot tuhay sa bunga sang sala sinang isa ka tawo. Kay ang paghukom nga nagaabut tungud sa isa ka paglapas nagdala sing katagudilian, apang ang bunayag nga dolot nga nagaabut tungud sa madamung paglapas nagadala sing pagpakamatarung.

17Kon, bangud sa paglapas sang isa, naghari ang kamatayon paagi sinang isa ka tawo, labi pa ang mga nagabaton sang kabugana sang bugay kag sang bunayag nga dolot sang pagkamatarung magahari sa kabuhi paagi sa isa nga si Jesu-Cristo.

18Niyan subong nga tungud sa paglapas sang isa ka tawo nag-abut ang katagudilian sa tanan nga tawo, gani sa buhat nga sa pagkamatarung sang isa ka tawo nagaabut ang pagpakamatarung kag kabuhi sa tanan nga tawo.

19Kay subong nga paagi sa pagkadimasinolondon sang isa ka tawo ang madamu ginpakamakasasala, subong man paagi sa pagkamasinolondon sang isa ang madamu pakamatarungon.

20Ang kasogoan nag-abut man, agud nga magbugana ang paglapas; apang diin ang sala nagbugana, ang bugay nagbugana sing labi pa,

21agud nga, subong nga naghari ang sala sa kamatayon, amo man maghari ang bugay paagi sa pagkamatarung nga sa kabuhi nga walay katapusan paagi kay Jesu-Cristo nga aton Ginoo.

← Chapter 4 Jump to: Chapter 6 →