Amos 1

Ika 2018 Bible

Jump to: Chapter 2 →

1Ọnwan wụ ihiẹn Emọsụ ku. Emọsụ wụ onyẹ ohu imẹ ndị e du anụ imẹ obodo Tẹkụa. Ihiẹn Osolobuẹ ghọsị a banyeni Izrẹlụ k'o ku. Ogẹn ahụn, Uzịa wụ eze Juda, Jerobụam nwa Jụashị wụ eze Izrẹlụ. Ọ rị ahụa ẹbụọ o ku ihiẹn ndịnị nị alị hụ mẹhunmẹni d'e mẹhunmẹ.

2Emọsụ sị, “Osolobuẹ gha Zayọnụ e bigbọ! Ọ gha Jerusalẹm a ban mban! Irurue jun ebe ile wẹ n'a zụn anụ hụ a kpọpụ nkụn; ẹfịfịa jun elu ugu Kamẹlụ hụ a kpọ nkụn!”

3Osolobuẹ sị: “Makẹ njọ ẹtọ hụn obodo Damaskọsụ alị Aram mẹ, njọ ẹnọ dẹ, erohutọkọ m, m k'e yerịrị wẹ afụnfụn: makẹni e mẹshigụọ wẹ ndị rị ẹgbẹrẹ Gilẹdị ikẹn nọkẹ ebe wẹ nọ gi igwe kụkpọ ọka.

4M jẹnkọ nwan d'e zi ọkụn ye ikpụlọ Hazaẹlụ eze wẹ. Ọkụn ahụn k'e ripụ ụlọ-agha ile zegbu enwẹn wẹ hụn Bẹn-Hadadị eze wẹ gi dọn ẹnya.

5M k'e tikpọ ọnụ-mgbọn Damaskọsụ, gbu ndị bi alị wẹ wụ Aram: kẹ ndị bi Ọdanmgbugbu Avẹni kẹ onyẹ rị a kị obodo Bẹt-Idẹni. Wẹ k'a kpụn ndị Aram shi alị Kiri.” Osolobuẹ e kugụọ a!

6Osolobuẹ sị, “Makẹ njọ ẹtọ obodo Gaza rị alị Filistia mẹ, njọ ẹnọ dẹ, erohutọkọ m; m k'e yerịrị wẹ afụnfụn makẹ alị ahụn wẹ kpụnrụn ndị ile rịn'a reye ndị alị Ẹdọm.

7M jẹnkọ nwan d'e zi ọkụn ye mgbọn Gaza; ọkụn hụn k'e ripụ ụlọ-agha ile zegbu enwẹn ẹ rị Gaza.

8M k'e gbu ndị rị obodo Ash'dọdụ Filistia lẹ eze rị a kị obodo Ash'kẹlọnụ Filistia; m k'e mẹshi ndị rị obodo Ẹkrọnụ Filistia ikẹn; ndị Filistia họdụnị jẹnkọ d'a nwụnzị. Osolobuẹ wụ Chuku e kugụọ a!”

9Osolobuẹ sị, “Makẹ njọ ẹtọ obodo Taya mẹ, njọ ẹnọ dẹ, erohutọkọ m; m k'e yerịrị wẹ afụnfụn makẹ alị ahụn wẹ kpụnrụn ndị ile rịn'a reye ndị alị Ẹdọm. Anyanhandẹni mẹ obi nwẹnẹ.

10M sikọ nwan d'e zi ọkụn ye mgbọn Taya; ọkụn hụn k'e ripụ ụlọ-agha ile zegbu enwẹn ẹ rị Taya.”

11Osolobuẹ sị: “Makẹ njọ ẹtọ ndị alị Ẹdọm mẹ, njọ ẹnọ dẹ, erohutọkọ m, m k'e yerịrị wẹ afụnfụn: makẹni o gi ọpịa-agha chụ umunẹ ẹ ndị Izrẹlụ, o mẹdẹni omikẹn wẹ, kama, o gi olulu mẹ wẹ ihiẹn, mẹru ẹ alị.

12M jẹnkọ nwan d'e zi ọkụn ye obodo wẹ wụ Tẹmanị. Ọkụn ahụn k'e ripụ ụlọ-agha ile zegbu enwẹn wẹ hụn rị isi alị wẹ wụ Bozra.”

13Osolobuẹ sị: “Makẹ njọ ẹtọ ndị Amọnụ mẹ, njọ ẹnọ dẹ, erohutọkọ m, m k'e yerịrị wẹ afụnfụn makẹni wẹ bụọ ikpoho Gilẹdị rị imẹ, kẹni wẹ weri alị wẹ cheni nke wẹ.

14M jẹnkọ d'a mụ nwan ọkụn ye mgbọn obodo wẹ wụ Raba. Ọkụn ahụn k'e ripụ ụlọ-agha ile zegbu enwẹn ẹ rịn'a, ya lẹ oro-agha lẹ agha k'a wị, ya lẹ eje ẹbi k'a kpọnị k'a wịzị.

15Ogẹn ahụn, a nwụnrụn wẹ eze wẹ, we ẹ shi alị ọzọ, kẹ ịya kẹ ndị-isi sọn ẹ kị.” Osolobuẹ e kugụọ a.

Jump to: Chapter 2 →