Amos 3

Ika 2018 Bible

← Chapter 2 Jump to: Chapter 4 →

1Ndị Izrẹlụ, nụ nị ihiẹn Osolobuẹ sị nị ịya kẹ ụnụ mẹ, “Ihiẹn alị Izrẹlụ ile m gha alị Ijiptu wepụha mẹ hụn rị e ze m ize:

2Imẹ alị ile rị elu ụwa ụnụ sụọ kẹ m họrị; m sikọ nwan d'e yerịrị ụnụ afụnfụn makẹ njọ ile ụnụ mẹ.”

3Nị madụ ẹbụọ sa ẹka jẹngbama ijẹn bụ ekutọnị wẹ ebe wẹ jẹnkọ?

4Nị ẹwọrọ dẹn imẹ ẹgboko bụ onwọnni anụ ọ hụn? Nị nwa-ẹwọrọ gha ebe o bi yi oro omẹni onwọnni ihiẹn o nwụndọn?

5Nị nnụnụ dan ọnyan omẹni onwọnni ọnyan wẹ shitọn'a? Nị ọnyan tifie omẹni onwọnni ihiẹn dann'a?

6Nị wẹ gbu opi-agha imẹ obodo egun atụnị ndị rịn'a? Nị eje-ihiẹn kunrun obodo omẹni ẹlẹ Osolobuẹ mẹ ẹ?!

7Ezioku-ezioku, Di-nwọnni-ẹnyi wụ Osolobuẹ ara mẹ ihiẹn-anaị bụ ọ ghọsịgụnị idibo ẹ ndị-amụma ihiẹn o bu obi.

8Ẹwọrọ e dẹngụọ; onyẹ kẹ egun jẹnkọlẹni d'a tụ?! Di-nwọnni-ẹnyi wụ Osolobuẹ e kuọlẹ oku; onyẹ jẹnkọlẹni d'e bu amụma gwa wẹ ihiẹn o ku?!

9D'a gwa nị wẹ ya ebe ile rị mkpa imẹ Ash'dọdụ alị Filistia; gwazịkwọnị wẹ ya ebe ile rị mkpa imẹ Ijiptu: sị nị wẹ, “Gbakikomẹ ni elu Ugu Sameria, nị ụnụ hụn okẹn isusu rị imẹ ẹ, hụnzị mmẹgbu rị imẹ ẹ!”

10Osolobuẹ sị: “Ama wẹ mẹ ihiẹn rị mma, ihiẹn junsọnmẹ okẹn ụlọ wẹ gichanrịn egbu-lẹ-egbu lẹ ohin bịa.”

11Ufiri ẹ, Di-nwọnni-ẹnyi wụ Osolobuẹ sị, “Eṅẹnrẹn sikọ d'e fihunmẹ alịnị, gbukpọchanrịn ihiẹn ile ụnụ gi e che ẹhụ, kpọnchanpụ ihiẹn ile ụnụ kpọnjun ụlọ uku ụnụ ndị ahụn.”

12Osolobuẹ sịzị: “Ụkụ atụnrụn ẹbụọ sụọ mọbụ mkpikpi ntịn kẹ onyẹ e du anụ a saẹka a napụha ẹwọrọ. Ẹrịra kẹ wẹ k'a zụọpụha ndị wẹ k'a zụọpụha imẹ ndị Izrẹlụ bi Sameria, ibe bẹdi lẹ ibe oche sụọ k'a họdụnị wẹ.

13“Di-nwọnni-ẹnyi wụ Osolobuẹ, Chuku ihiẹn ile rị okpuru ẹ, sị: Nụ nị ihiẹnni, gi ẹ gwa ikpụlọ Jekọpụ, ihiẹn m jẹnkọ d'e mẹ wẹ:

14Nị ụhụọhịn ahụn m k'e ye Izrẹlụ Ẹbamịn-ugu afụnfụn njọ ndị wẹ rị e mẹ, m jẹnkọ d'e mẹ ẹ ru ukpo mmọn rịsọnmẹ Bẹtẹlụ: wẹ k'e bepụsọnmẹ mpịn ukpo mmọn, a dantọ wẹ alị.

15M k'e tikpọ ụlọ ọma wẹ ile, kẹ ụlọ oyi kẹ ụlọ uwowo; ndị ahụn wẹ gi ihiẹn eze-enyi tụn jẹnkọ d'a la iwi; okẹn ụlọ wẹ rị ichẹn-ichẹn arịkọzị. Osolobuẹ e kugụọ a.”

← Chapter 2 Jump to: Chapter 4 →