Amos 6

Ika 2018 Bible

← Chapter 5 Jump to: Chapter 7 →

1Nsọngbu rị Ugu Zayọnụ ẹhụ fu lẹ ndị rị Ugu Sameria obi ru alị; ndị wẹ marịn-amarịn imẹ Izrẹlụ alị nwẹn ka alị, ndị hụn Izrẹlụ ile e buruhẹ!

2Jẹn ni nwan Kal'nẹ d'a hụn ihiẹn mẹn'ẹ! Jẹnzụkazị nị d'a hụn Hamatị Uku! D'a hụnzịkwọ nị Gatị alị Filistia! Ụnụ ka alị-eze ndịnị mma? Ra alị wẹ ka nke ụnụ?

3Euu! Ndị rị a sị nị nsọngbu eke bịakọ, a kwadọn ọkịkị-nkịgbu!

4O k'a jọ ụnụ njọ, ụnụ ndị rị e ri ụwa — e dinẹ bẹdi magbu enwẹn ẹ mma wẹ gi eze ẹnyi rụn, a danchanpụ elu oche wẹ rụn kẹ bẹdi, e ri anụ efin lẹ anụ atụnrụn wẹ zụntọ, e rijun ẹfọ;

5a kpọ ụbọ nọkẹ Defidi, e ropụha egu a kpọ ye isi;

6e gidẹ afẹrẹ e lura manya, a kwọ udẹn kachanrịn mma — kanị, ara fụ wẹ nị Izrẹlụ, ụmụ Josẹfụ, rị a la iwi.

7Uwẹ kẹ wẹ k'e bu nwan ụzọ kpụnshi alị ọzọ, e ribehi wẹ ụwa, danchanpụbehi.

8Osolobuẹ, Onyẹ ahụn nwọn ihiẹn ile e kungụọ enwẹn ẹ, sị, “Mmẹ wụ Osolobuẹ, Chuku ihiẹn ile rị okpuru ẹ, sị, ‘Mpache ụmụ Jekọpụ e ze m ize! Ebe mgbaban ile wẹ tụn wẹ gi e dọn ẹnya e zezi m ize! M k'e we obodoni wụ Sameria lẹ ihiẹn ile rị n'a ye ndị k'e tikpọn'a.’ ”

9Omẹni madụ iri họdụ imẹ ezi-lẹ-ụlọ, uwẹ ile sikọ d'a nwụn.

10Onyẹ nke wẹ hụn k'e lin'ẹ bịa, o bupụhagụ ozun ezi, ọ jụma onyẹ ọ hụn ebẹhụ hụn rị imẹ-imẹ ụlọ, “O nwọnzi onyẹ yụ lẹ ịya rị ebẹhụ?” Hụnyẹ a sị a “Mba!” Ọ sị hụnyẹ, “Dodo, gbakwọ nkịtịn! Ẹnyi akpọkọkwọ ẹfan Osolobuẹ!”

11Osolobuẹ e kuọl'a: o k'e tikpọpụchanrịn kẹ ụlọ uku kẹ ụlọ nta!

12Nị ẹshin saẹka gba ọsọ elu ọmụma? Nị ịhịan gi efin dụkpọ alị-ọmụma? Kanị ụnụ e bugụọ ezioku isi kpọma alị imẹ ọgwa, gi e họnrin nshi, gi ezi-omumẹ lẹ ihiẹn ile furuni họnrin eje-ihiẹn e lugbu enwẹn ẹ ilu;

13ụnụ ndị gi alị Lo-Dẹba wụlẹni alị a ghọghọ, a sị “Ẹlẹ ikẹn hi ogbe ẹnyi nwọn kẹ ẹnyi gi mẹri alị Kanaịm a kpa ikẹn?”

14Osolobuẹ, Chuku ihiẹn ile rị okpuru ẹ, sị: Ndị Izrẹlụ, m rị a kwademẹ alị k'e mẹshi ụnụ ikẹn. Wẹ sikọ d'a bịangbu ụnụ ebe ile alị ụnụ ru gha Lebo-Hamatị d'e ru Ọdanmgbugbu Araba.

← Chapter 5 Jump to: Chapter 7 →