Amos 2

Ika 2018 Bible

← Chapter 1 Jump to: Chapter 3 →

1Osolobuẹ sị: “Makẹ njọ ẹtọ ndị alị Mụabụ mẹ, njọ ẹnọ dẹ, erohutọkọ m, m k'e yerịrị wẹ afụnfụn: makẹni wẹ kpọ ọkpụkpụ eze alị Ẹdọm ọkụn, o họnrin ntụn.

2M sikọ nwan d'e zi ọkụn ye alị Mụabụ. Ọkụn ahụn k'e ripụ ụlọ-agha ndị ahụn zegbu enwẹn ẹ rị Kẹriọtụ. Wẹ k'e tikpọ alị Mụabụ. Nkpọtụ lẹ oro-agha lẹ opi-agha k'a rị ụhụọhịn wẹ k'e tikpọ alị Mụabụ.

3M k'e gbu onyẹ kị alị Mụabụ, ịya lẹ ndị-isi ile rị alị ahụn.” Osolobuẹ e kugụọ a.

4Osolobuẹ sị: “Makẹ njọ ẹtọ ndị Juda mẹ, njọ ẹnọ dẹ, erohutọkọ m, m k'e yerịrị wẹ afụnfụn: makẹni a jụgụọ wẹ Iwu Osolobuẹ, e dọnmẹni wẹ ụmụ-iwu rịn'a; e giziọlẹ wẹ mmọn ndị ahụn wụlẹni Chuku dufie wẹ, mmọn ndị nẹdi wẹ kanị sọnkọ kpahu.

5M jẹnkọ d'e zi ọkụn ye Juda. Ọkụn ahụn jẹnkọ d'e ripụ ụlọ-agha ile zegbu enwẹn ẹ rị Jerusalẹm.”

6Osolobuẹ sị: “Makẹ njọ ẹtọ ndị Izrẹlụ mẹ, njọ ẹnọ dẹ, erohutọkọ m, m k'e yerịrị wẹ afụnfụn: makẹni wẹ rị e gi ufiri egho e re ndị ezi-omumẹ, e redẹ ndị-igbẹnnyẹ ọnụ-egho akpụkụ.

7Wẹ hụ a zọ ndị igbẹnnyẹ ụkụ isi, a zọdẹ wẹ e ye imẹ uzunzun; e nu ndị rị e ri ụya e ye ụsụọ; nẹdi lẹ nwa hụ e mẹ mgba okpoho ohu, e gi ẹ e wiwi ẹfan-nsọ m.

8W'e gidẹ ẹkwa wẹ gi fieri ụgwọ e dinẹ, e dinẹdẹ ẹhụ ukpo mmọn; a nọ imẹ ụlọ-mmọn wẹ a ra manya manya wẹ be ịhịan.

9Kanị, mmẹ gbupụnị wẹ ndị Amọ, hụn sue kẹ osisi sida, hụn ze kẹ osisi okuu; e gbuchanrịn m kẹ mkpụrụ osisi rị elu kẹ mkpọgụn a rị alị.

10Mmẹ wepụhazịkwọ ụnụ imẹ alị Ijiptu, du ụnụ imẹ atụ ahụa ọgụnnaị, we alị ndị Amọ ye ụnụ weri.

11E mẹ m ụfọdụ ụmụ ụnụ wụrụ ndị-amụma, mẹ ụfọdụ ikorọbịa ụnụ wụrụ ndị-nazịraịtị. Gwanị m ndị Izrẹlụ, ẹlẹ ẹrịra k'o mẹ? Ya kẹ Osolobuẹ ku.

12“Kanị, ụnụ e mẹ ndị-nazịraịtị m ra manya m sị wẹ sọ, ụnụ a jụgbọ ndị-amụma, sị wẹ, ‘Ebukwọlẹ ni amụma!’

13Lee nwan, m k'a bịantu ụnụ ebẹhụ ụnụ rị, ụnụ a nyụnlụa kẹ trọkụ bu okẹn ibu ibu ọka hụn nyịngbu enwẹn ẹ.

14Ọgba-ọsọ a hụnkọ ụkụ gbapụ ụhụọhịn ahụn; dikẹn ahụnkọ ndụn mẹ ihiẹn ọwụlẹ; odogun-agha asakọdẹ ẹka zụọpụha enwẹn ẹ;

15ọgba-ụta asakọ ẹka wuzo; ụkụ-ọsọ agbanahịnkọ ọnwụn; onyin-ẹshin egikọ a wanahịn ọnwụn;

16odogun-agha ka ibe ẹ obi e nwọn k'e gidẹ ọtọ gbapụ ụhụọhịn hụ.” Osolobuẹ e kugụọ a.

← Chapter 1 Jump to: Chapter 3 →