Deuteronomy 14

Ika 2018 Bible

← Chapter 13 Jump to: Chapter 15 →

1Ụmụ Osolobuẹ wụ Chuku ụnụ kẹ ụnụ wụ, egilẹ ni nwan ufiri onyẹ nwụnnị be enwẹn ụnụ ihiẹn mọbụ kọpụ ntutu ụnụ ibe ihun,

2makẹni ụnụ wụ ndị Osolobuẹ wụ Chuku ụnụ họpụha, dọn ụnụ nsọ. Imẹ alị ile rị ichẹn-ichẹn rị elu-ụwa, Osolobuẹ a họrịgụọ ụnụ nị ụnụ wụrụ ndị nke ẹ pụ-ichẹn.

3Erikwọlẹ ni ihiẹn ọwụlẹ Osolobuẹ sị ụnụ sọ.

4E lee ni anụ ndị ụnụ k'e ri: efin, atụnrụn lẹ ewu;

5ele, mgbadan, ele-jaki, ewu-ọfịa, ewu-ugu, mgbadan mpịn a sue lẹ atụnrụn-ugu.

6Ri ni anụ ọwụlẹ ụkụ a wachanrịn ẹbụọ hụn e rizi ọnụ.

7Kanị, imẹ anụ ndị ahụn e ri ọnụ mọbụ ndị ụkụ wẹ wachanrịn, erilẹ ni ndịnị: anyịnyan-mkpukpuke, oke-ebo lẹ ẹlẹtu-ọmụma, makẹni ọsụọn'a nị w'e ri ọnụ, ụkụ wẹ awabeni; wẹ wụrụnị ụnụ ihiẹn rụnị;

8ezin rụzịkwọ arụ: ụkụ a a waghọ kanị ara rị ọnụ. Erikwọlẹ ni anụ wẹ mọbụ mẹtụ ozun wẹ ẹka.

9Imẹ ihiẹn ile rị imẹ mirin, ụnụ nwọn ikẹn ri hụn ọwụlẹ nwọn ẹzuzu o gi e gu mirin lẹ okpukpu —

10ka erikwọlẹ ni ihiẹn ọwụlẹ nwọnlẹni wẹ ẹbụbụọ; wẹ wụrụnị ụnụ ihiẹn rụnị.

11Ụnụ nwọn ikẹn ri nnụnụ ọwụlẹ rụlẹni.

12Ka erikwọlẹ ni ndịnị: ugọn, udele, udele-ogi,

13egbe-ufie, egbe-ogi, ụdị egbe ọwụlẹ,

14nnụnụ-ogi ọwụlẹ e yi oro kẹ uroko,

15ozuzu kpụ mpịn, “amisu”, nnụnụ-ohimin nwọn ụkụ ọdọgụnma, anwụnkwọ ile,

16ozuzu-nta, ozuzu-uku, ozuzu-ọchan,

17ozuzu atụ, anwụnkwọ e ri azụn rị imẹ mirin, ọdọgụnma e ri azụn rị mirin sụọ,

18stọkụ, ụdị ụgbala ile, hupo ugbele-isi ẹ sueshi azụụn lẹ ụsụ.

19Otutu ile a rị igwee e fe, wẹ wụrụnị ụnụ ihiẹn rụnị; erilẹ ni wẹ.

20Ka, ri ni otutu ọwụlẹ rụlẹni.

21Ụnụ hụn ozun anụ, erilẹ n'ẹ. Ụnụ nwọn ikẹn w'ẹ ye abịamabịa bi imẹ igunrun ụnụ: ya nwẹn nwọn ikẹn ri ẹ; ụnụ nwọnzikwọ ikẹn re ẹ ye abịamabịa. Ụnụ nwẹn wụ ndị Osolobuẹ wụ Chuku ụnụ wepụha; ụnụ wụ ndị nke ẹ pụ ichẹn. Egilẹ ni mirin-ẹran ewu shi nwa a.

22Hụnkwọ n'a nị ụnụ e wepụha ohu-imẹ-iri ihiẹn-ugbo ụnụ ahụa-ahụa.

23We ni ụzọ-ohu-imẹ-ụzọ-iri hụ jẹn ebe Osolobuẹ wụ Chuku ụnụ k'a họrị nị ya kẹ Ẹfan a k'a rị, ụnụ a nọ ihun ẹ ebẹhụ ri ụzọ-ohu-imẹ-ụzọ-iri hụ — ọka lẹ manya-ọhụn lẹ ofigbọn-olivu ụnụ lẹ okẹn ibuzọ efin lẹ atụnrụn lẹ ewu ụnụ, kẹni ụnụ hụn ụzọ gi ẹ mụnrụn ịgbaye Osolobuẹ wụ Chuku ụnụ ogẹn ile.

24Kanị, omẹni ebahụn e tekẹ, nị y'a sakọ ẹka bujẹn ụzọ-ohu-imẹ-ụzọ-iri ihiẹn Osolobuẹ wụ Chuku ụnụ gi gọz'i (makẹni ebe hụn Osolobuẹ wụ Chuku ụnụ họrị nị ya kẹ Ẹfan a k'a rị e tekẹ),

25y'a gwarị re ụzọ-ohu-imẹ-ụzọ-iri ahụn, weri egho ẹ shi ebahụn Osolobuẹ wụ Chuku ụnụ k'a họrị.

26Gi egho ahụn ṅọnrin ihiẹn ọwụlẹ sụọn'ị. Ọsụọn'a efin mọbụ atụnrụn mọbụ manya nkpụrụ-osisi mmaka mọbụ manya wẹ bama — ihiẹn ọwụlẹ ị chọ. Ịyụ lẹ ezi-lẹ-ụlọ ị a nọ ihun Osolobuẹ wụ Chuku ụnụ ebahụn gi ẹ ri oriri, ghọghọ.

27Azọkwọlẹ ni ndị Livaị bi imẹ obodo ụnụ, makẹni onwọnni alị mọbụ ukuu wẹ keye wẹ.

28Njẹndemẹ ahụa ẹtọ ọwụlẹ, wẹhẹ ni ụzọ-ohu-imẹ-ụzọ iri ihiẹn-ugbo ahụa nke ẹtọ rịn'a, dọnmẹsọnmẹ imẹ obodo rị ichẹn-ichẹn ụnụ bi,

29nị ndịnị wẹ hụn bi imẹ obodo ụnụ bịa d'e ri, rijun ẹfọ: ndị Livaị (makẹni ekeyeni wẹ ndị Livaị alị mọbụ ukuu nke ẹka wẹ), ndị abịamabịa, ndị nwọnlẹni nẹdi lẹ ikpoho di wẹ nwụn; lẹzi kẹni Osolobuẹ wụ Chuku ụnụ hụn ụzọ a gọzi ihiẹn ile ụnụ buche ẹka.

← Chapter 13 Jump to: Chapter 15 →