Deuteronomy 26

Ika 2018 Bible

← Chapter 25 Jump to: Chapter 27 →

1Ụnụ banyegụ alị ahụn Osolobuẹ wụ Chuku ụnụ rị e ye ụnụ n'ọ wụrụ ukuu ụnụ, werigụ a, biri imẹ ẹ,

2y'a gha imẹ ihiẹn-ugbo ibuzọ ile alị ahụn Osolobuẹ wụ Chuku ụnụ rị e ye ụnụ mịpụha weberi, buche imẹ ụkpalị, bujẹn ebahụn Osolobuẹ k'a họrị nị Ẹfan a rị,

3sị onyẹ nchụn-ẹjan hụn rị ọrụn ogẹn ahụn, “M rị e gi ihiẹnni m wẹhẹ tannị a gwa Osolobuẹ wụ Chuku, hụn ị rị a nọkin ẹnya a, n'e rugụọ m alị ahụn Osolobuẹ kun enwẹn ẹ kwe ndị nẹdi ẹnyi nkwa n'o k'e ye ẹnyi.”

4Onyẹ nchụn-ẹjan ahụn k'a narịn ị ụkpalị hụ rị ị ẹka, bu ẹ che ihun ukpo nchụn-ẹjan Osolobuẹ wụ Chuku ụnụ;

5y'a nọ ihun Osolobuẹ wụ Chuku i ebẹhụ sị, “Nẹdi m kanị wụ onyẹ Aram te rị a kwahunmẹni; omẹgụ ọ nọ shi alị Ijiptu, ya lẹ ndị bulẹni ọda, wẹ nọ biri ebahụn, họnrin okẹn alị hụn shi ikẹn, bu ọda.

6Kanị ndị Ijiptu nọ mẹja ẹnyi, mẹshi ẹnyi ikẹn, ye ẹnyi okẹn ọrụn rụnma.

7Ya ẹnyi nọ kwanghọsị Osolobuẹ, Chuku ndị nẹdi ẹnyi, Osolobuẹ nọ nụ olu ẹnyi, hụn ụya ẹnyi rị e ri, okẹn ọrụn ẹnyi rị a rụn lẹ ọbịangbu wẹ rị a bịangbu ẹnyi.

8Ya Osolobuẹ nọ gi ẹka zeni lẹ ikẹn ọ kpa wepụha ẹnyi imẹ Ijiptu hụ, wẹ lẹ okẹn ihiẹn-egun lẹ ọrụn-atụmẹnya ọ rụn hụn o gisọnmẹ ghọsị ikẹn ẹ lẹ ahụnlele ile o rụn.

9Ọ nọ wẹhẹ ẹnyi ebeni, ye ẹnyi alịnị, alị hụn mirin-ẹran anụ lẹ mirin-ẹnwụn jun, e hu.

10M wẹhẹ nwan ihiẹn-ugbo ibuzọnị alị ahụn wepụha, alị hụ ịyụ wụ Osolobuẹ ye m.” I kugụ, y'e bu ụkpalị ahụn che ihun Osolobuẹ wụ Chuku i, kụn'a isi alị.

11Yụ lẹ ndị Livaị lẹ itumunyẹ bi imẹ obodo ụnụ e ri oriri, ghọghọ, makẹ ihiẹn-ọma ile Osolobuẹ wụ Chuku i ye yụ lẹ ezi-lẹ-ụlọ ị.

12Ahụa ẹtọ-ẹtọ k'a wụrụnị ụnụ ahụa ụzọ-ohu-imẹ-ụzọ iri hụn pụ-ichẹn. Ahụa hụ, ụnụ k'a gha e wepụha ụzọ-ohu-imẹ-ụzọ-iri ihiẹn ile ụnụ rụnpụha imẹ ugbo, we ẹ ye ndị Livaị, ndị ọbịa, ndị nwọnlẹni nẹdi lẹ nnẹ lẹ ikpoho di wẹ nwụnhụn, ni wẹ hụn ụzọ ri, rijun ẹfọ imẹ obodo ụnụ.

13I mẹgụ a, y'a sị Osolobuẹ wụ Chuku i, “A ghagụọ m iwe m wepụ azụụn ahụn rị nsọ; e wegụọ m'a ye ndị Livaị, itumunyẹ, ndị nwọnlẹni nẹdi lẹ nnẹ lẹ ikpoho di wẹ nwụn: e mẹgụọ m k'i dọnchanrịn gwa m. Efieni m oku i mọbụ zọ hụn ọwụlẹ imẹ wẹ.

14Emẹrụnị m ụzọ-ohu-imẹ-ụzọ-irini rị nsọ: erini m hụn ọwụlẹ rịn'a ogẹn m gi rị achọ mọbụ wepụha hụn ọwụlẹ ogẹn m gilẹni rị ọchan mọbụ we hụn ọwụlẹ kwanị ndị nwụnnị. E humẹgụọnị m Osolobuẹ wụ Chuku m isi; e mẹgụọ m ihiẹn ile ị sị m mẹ.

15Gha nwan elu-igwee, ebe obibi i rị nsọ, lee ẹnya alị, n'ị gọzi ndị nke i wụ Izrẹlụ lẹ alị ahụn i ye ẹnyi kẹ i dọn kun enwẹn i kwe ndị nẹdi ẹnyi kanị nkwa, alị ahụn mirin-ẹran anụ lẹ mirin-ẹnwụn jun, e hu.”

16Osolobuẹ wụ Chuku i rị a gwa ị tannị yụ sọn uhi lẹ iwu ndịnị; dọnrin ẹnya gi obi i ile lẹ umẹ-ndụn ị ile dọnmẹ wẹ.

17Y'e kugụọ a tannị nị Osolobuẹ wụ Chuku i, n'i k'e sọn ụzọ a, nị i k'e sọn uhi ẹ lẹ ihiẹn ọ s'ị mẹ lẹ iwu ẹ ile, lẹni i k'e humẹn'ẹ isi.

18Osolobuẹ nkẹ e kugụọ a tannị nị ụnụ wụ ndị nke ẹ pụ-ichẹn, k'o dọn kwe nkwa, lẹni ọ chọ nị ụnụ mẹchanrịn ihiẹn ile ọ sị ụnụ mẹ.

19O kugụọ a n'o k'e bu ụnụ che ọnọdị wẹ k'e gi ja ụnụ mma, a nụ otiti ụnụ, ọnọdị ụnụ a nọ nwọn ọghọ karị ndị ile o ke, lẹni ụnụ k'a wụ ndị-nsọ Osolobuẹ wụ Chuku ụnụ, k'o dọn kwe nkwa.

← Chapter 25 Jump to: Chapter 27 →