Ecclesiastes 11

Ika 2018 Bible

← Chapter 10 Jump to: Chapter 12 →

1Buye wẹ ọka ị fetudẹ ohimin; ọsụọn'a n'o bie ebie, ị k'a hụnrịrị erere ẹ.

2Yebeyedẹ madụ ẹsa mọbụ ẹsatọ ihiẹn i, nị y'a marịn ihiẹn k'e kunrun alị.

3Mirin rugụ ihiẹn ile o ru, o zueye alị. Azụụn ọwụlẹ osisi danshi — ọsụọn'a ẹka-nni, ọsụọn'a ẹka-ekpẹn, ebẹhụ ọ dantọ k'o fiẹnrin.

4Onyẹ lemẹ ufere, ọ kụnkọ ihiẹn-ugbo; onyẹ lemẹ igwere, ọ ghọkọ ihiẹn-ugbo.

5K'i dọnlẹni marịn ote ufere a gha mọbụ kẹ nwa dọn a hama imẹ ẹfọ-nnẹ ẹ, ẹrịra k'i dọnlẹni ghọta ọrụn Chuku, Onyẹ hụn mẹmẹ ihiẹn ile.

6Kụn mkpụrụ ị ụtụntụn, y'a rụnsọnmẹ ọrụn ị d'e ru ẹnyasị, makẹni y'a marịn hụn k'a ghanị — kẹ hụnnị rọ kẹ hụn ahụn, ra wẹ ẹbụbụọ k'e mẹ ọhụnma — y'a marịn.

7Ukpẹ a sụọka ụsụọ; ukpẹ ẹnyanwụn a sụọka ụsụọ olegha.

8Ahụa ole-lẹ-ole ịhịan k'a tọ, ya nwọn anwịnrịn imẹ wẹ ile. Ka ya nyanhankwọ nị ụhụọhịn ishi k'a gha a rịzịkwọ, a rị ọda-ọda. Ihiẹn ile lalanị wụchanrịn ihiẹn ọlaliwi.

9Okoro, e nwọn nwan anwịnrịn n'ị rị okoro; obi ya sụọma ị ụsụọ hụnnị ị rị okoro. Sọnmẹ ihiẹn ọwụlẹ obi i ye i lẹ ihiẹn ọwụlẹ ẹnya ị legha; ka nyanhankwọ nị Chuku jẹnkọ d'a ju ị ukwere ihiẹn ndịnị ile.

10Ma nwan uhue tuhu, y'a mahuchanrịn ihiẹn ọwụlẹ ẹhụ ị chọlẹni, makẹni okoro lẹ ndụn ile rị okoro ẹhụ ghafekọ aghafekọ — wẹ wụchanrịn ihiẹn ọlaliwi.

← Chapter 10 Jump to: Chapter 12 →