Ecclesiastes 8

Ika 2018 Bible

← Chapter 7 Jump to: Chapter 9 →

1Onyẹ nọ kẹ onyẹ marịn ihiẹn? Onyẹ marịn alị ihiẹn? Amamihiẹn e mẹ ihun ịhịan e fọn, e mẹ ihun ẹ a lụlụa.

2M rị a sị ị mẹ ihiẹn eze ku, makẹni y'e kungụọ ẹfan Chuku n'i jẹnkọ d'e mẹ ẹ.

3Ahụhụkwọlẹ n'ị gha ihun eze pụ, abanlẹni ndị rị e zun'ẹ eje-umẹ, makẹni ihiẹn ọwụlẹ sụọn'a k'o mẹkwọ.

4Ebe o mẹni eze wụ okusị-ọgụ, onyẹ k'a sa nwan ẹka sị a, “K'ị rịdẹ e mẹ?”

5Onyẹ mẹ ihiẹn o ku, onwọnni ihiẹn jẹnkọ d'e mẹn'ẹ, onyẹ marịn ihiẹn a marịngụọ ezigbo ogẹn lẹ usọnrọn ihiẹn eze.

6Makẹni ihiẹn ọwụlẹ nwọn ezigbo ogẹn ẹ lẹ usọnrọn ẹ — ọsụọn'a nị ihiẹn rị e sọngbu ịhịan ọda-ọda imẹ obi.

7Ebe o mẹni onwọnni onyẹ marịn eki, onyẹ k'a sa ẹka gwa ịhịan ihiẹn lalanị?

8Onwọnni onyẹ a saẹka e gbọndọn ufere; onwọnni onyẹ a saẹka a wanahịn ụhụọhịn ọnwụn. Onwọnni onyẹ w'a hapụ ọnụ agha; ẹrịrazịkwọ, eje-ihiẹn azụọpụhakọ ndị e mẹn'ẹ.

9Ihiẹn ndịnị ile kẹ m hụn ogẹn m gi rị e ro ihiẹn ile w'e mẹ elu-ụwanị: O nwọnghọ mgbe ịhịan gi a kịgbu ndị ọzọ, gi ẹ e mẹ enwẹn ẹ eje-ihiẹn.

10A hụnzịghọ m ebe wẹ nọ li ndị eje-ịhịan ọhụnma — ndị nwẹn te e mẹ eje-ihiẹn; wẹ e jẹndẹ Ụlọ-nsọ a lụaha, wẹ hụ a ja wẹ mma imẹ obodo ahụn wẹ nọ e mẹ eje-ihiẹn. Ọnwan wụzịkwọ ihiẹn ọlaliwi.

11Wẹ biekẹ d'e ye ịhịan afụnfụn eje-ihiẹn o mẹ, ịhịan ile a tụma iroro eje-ihiẹn wẹ k'e mẹ.

12Ọsụọn'a nị eje-ịhịan mẹ njọ ọgụn-isẹn, e nwọnzikwọ ụtọmị, a marịnghọ m nị ndị a tụ egun Chuku k'o k'a rịnị mma, makẹni wẹ rị e gi egun Chuku e bi.

13Kanị ọ rịkọnị ndị eje-ịhịan mma makẹni w'a ra tụ egun Chuku, ẹlẹ wẹ k'a tọcheni kẹ onyinyọn e suecheni ogẹn ẹnyasị.

14O nwọnghọzị ihiẹn ọlaliwi ọzọ rị elu-ụwa: ebe ihiẹn te furu eje-ịhịan nọ mẹ ndị ezi-omumẹ lẹ ebe ihiẹn te furu ndị ezi-omumẹ nọ mẹ eje-ịhịan. M sị nị ọnwan wụzịkwọ ihiẹn ọlaliwi.

15Ya wụ, m rị nwan a sị ịhịan e ri ụwa — makẹni onwọnzini ihiẹn ka mma ịhịan e mẹ elu-ụwa karị oriri lẹ ọrịra lẹ inwọn anwịnrịn — ịghọghọ e sọnmẹ ẹ imẹ ọrụn ile ọ rụn ebe ọ rị ndụnnị Chuku ye ẹ bi elu-ụwanị rị okpuru ẹnyanwụn.

16Ogẹn m gi rị e shi ọnwụn nị m marịn ihiẹn amamihiẹn wụ lẹni m ghọta ihiẹn ịhịan a rụn elu-ụwa — hụn e chu ẹ ụran kẹ uhinhin kẹ efinaị —

17ya m nọ hụn ihiẹn ile Chuku mẹ. Onwọnni onyẹ k'a as'ẹka ghọta ihiẹn e mẹ enu-ụwanị rị okpuru ẹnyanwụn. K'ọ nwanlẹ ikẹn ẹ n'ọ ghọta a, ịhịan asakọ ẹka ghọta a ru alị a. Ọsụọn'a nị onyẹ marịn ihiẹn sị n'ọ marịnghọ, ọ sakọ ẹka ghọta a ru alị.

← Chapter 7 Jump to: Chapter 9 →