Ecclesiastes 3

Ika 2018 Bible

← Chapter 2 Jump to: Chapter 4 →

1Ihiẹn ọwụlẹ nwọn ogẹn ẹ; ihiẹn ọwụlẹ w'e mẹ emẹ elu-ụwanị rị okpuru ẹnyanwụn nwọn ogẹn ẹ:

2ogẹn ọmụmụ lẹ ogẹn ọnwụn; ogẹn ịkụn ihiẹn lẹ ogẹn ihuepụ ihiẹn;

3ogẹn ogbugbu lẹ ogẹn ọzụzụọ; ogẹn itikpọ-ihiẹn lẹ ogẹn ịtụn-ihiẹn;

4ogẹn ẹkwan lẹ ogẹn ẹmụ; ogẹn ịsụkụrụ (igbusuru) lẹ ogẹn itẹn-egu;

5ogẹn inuyịya ọmụma lẹ ogẹn ikpọnkikomẹni wẹ; ogẹn idide ịhịan lẹ ogẹn wẹ gilẹni e dide ịhịan;

6ogẹn ịchọkpọ ihiẹn lẹ ogẹn ịlatọ ihiẹn tuhuni; ogẹn idọnmẹ lẹ ogẹn ituhuni;

7ogẹn itika ihiẹn lẹ ogẹn ịkwakin ihiẹn; ogẹn ịgba-nkịtịn lẹ ogẹn iku-oku;

8ogẹn ihiẹn e gi sụọ ịhịan lẹ ogẹn ihiẹn gi e ze ịhịan ize, ogẹn agha lẹ ogẹn udọn.

9Kị ịhịan e nwọnhẹnzi nwan imẹ ihiẹn ile ọ rị a rụn?

10A hụnọlẹ m okẹn ibu Chuku buye ịhịan.

11O mẹgụọ ihiẹn ile a rị mma ogẹn wẹ ru. O bugụọ iroro ihiẹn ile rị ihun che ịhịan obi bụ ịhịan asakọ ẹka ghọtachanrịn ihiẹn Chuku rụn gha mbidọn d'e ru ọgụgụ.

12Ya wụ, a marịnghọ m nwan nị onwọnzini ihiẹn ka ịhịan mma karị nị ẹfọ hụ a sụọ ịhịan ụsụọ lẹni ịhịan hụ e mẹ mma ebe ịhịan rị ndụn —

13nị onyẹ-onyẹ hụ e ri, a ra, a hụn ihiẹn ẹfọ e gi a sụọ a ụsụọ imẹ ihiẹn ile ọ rụn: ọnwan wụ oyiye Chuku.

14A marịnzịghọ m nị ihiẹn ile Chuku rụn k'a rị jẹnrin ejẹn; nị onwọnni ihiẹn w'a saẹka e wecheni ẹ, onwọnzikwọnị ihiẹn w'a saẹka e wepụ imẹ ẹ. Ẹrịra kẹ Chuku mẹmẹ ẹ kẹni ịhịan a tụ egun ẹ.

15Ihiẹn ọwụlẹ rịnị a rịgụọlẹ mbụ; ihiẹn k'a rịnị a rịgụọlẹ mbụ; Chuku e mẹ ihiẹn hụn mẹgụ mbụ e mẹdọnzi.

16A hụnzịghọ m ihiẹn ọzọ elu-ụwanị rị okpuru ẹnyanwụn: ebe w'a nọ e kin ikpe ọhụnma — w'e mẹzikwọ eje-ihiẹn ebẹhụ; ebe wẹ nọ a han eṅẹn rị mma — w'e mẹzikwọ eje-ihiẹn ebẹhụ.

17M nọ sị enwẹn m, “Chuku jẹnkọ d'e kin kẹ ndị ezi-omumẹ kẹ ndị-ejẹ ikpe, makẹni ihiẹn ile sikọ d'e mẹ o ru ogẹn ẹ, ọrụn ile nwọn ogẹn wẹ gi a rụn a.”

18M nọzị sị enwẹn m, “O mẹ nke ịhịan, Chuku e lele ịhịan kẹni wẹ hụn a nị wẹ rịhụ kẹ anụmanụ.

19Ihiẹn ohu ahụn e mẹ ịhịan, e mẹ anụmanụ; ihiẹn ohu ahụn rị e che wẹ ẹbụbụọ: hụnnị a nwụn anwụn, hụn ẹbọ a nwụnzịkwọ anwụn. Uzun ohu ahụn kẹ wẹ ile e kun; ịhịan akanị anụmanụ mma. Ihiẹn ile wụ ihiẹn-ọlaliwi.

20Ụzọ ohu ahụn kẹ wẹ ile a la; ẹjan kẹ wẹ ile gha bịa, ẹjan kẹ wẹ ile a la.

21Onyẹ ma kẹ elu kẹ mmọn ịhịan e shi, mmọn anụmanụ e shi imẹ anị?”

22Ya wụ, a hụngụọ m'a nị onwọnni ihiẹn ka mma karị nị ọrụn ịhịan hụ a sụọ a, makẹni ya wụ ihiẹn run'ẹ. Onyẹ ka saẹka mẹ ịhịan marịn ihiẹn jẹnkọ d'e mẹni ọ nwụnhụngụ?

← Chapter 2 Jump to: Chapter 4 →