Ecclesiastes 5

Ika 2018 Bible

← Chapter 4 Jump to: Chapter 6 →

1Kpachanpụ ẹnya ogẹn ọwụlẹ i jẹn ụnọ Chuku. Ọ ka mma n'ị jẹn ebẹhụ d'e gọn ntịn karị n'ị jẹn d'a chụn ẹjan ndị-nzuzu — hụn ghalẹni a marịn wẹ mẹfie.

2Anịlẹ ọnụ kẹrẹ i, ahụhụlẹ imẹ obi i n'i ku ihiẹn ọwụlẹ ihun Chuku. Makẹni Chuku rị elu-igwee kanị yụ nwẹn rị elu-ụwa, ekulẹ nwan ọtụtụ oku.

3Kẹ okẹn iroro dọn e buhẹ okẹn-nrọ, ẹrịra kẹ ọtụtụ oku e buhẹ oku onyẹ-nzuzu.

4Omẹni y'e kwe Chuku nkwa, ebielẹ d'e mẹ ẹ. Ihiẹn ndị nzuzu ara sụọ Chuku; mẹzu nkwa ị.

5Ọ ka mma nị y'e kweni nkwa, karị n'ị kwe nkwa bụ y'e mẹn'ẹ.

6Anịkwọlẹ ọnụ ị dọ ị ye imẹ njọ. Ẹlẹkwọ hụn ị k'a sị onyẹ-ozi ụlọ-nsọ, “Omẹni m te marịn m'e ke kwe nkwa hụ.” Kị i k'e gini ihiẹn i ku kpasu Chuku iwe, o wiwi ihiẹn ị rụn?

7Okẹn-nrọ lẹ ọtụtụ oku wụ ihiẹn ọlaliwi. Tụkwọ nwan egun Chuku.

8Ị hụn alị wẹ nọ a bịangbu ogbẹnnyẹ, e mẹgbu ịhịan, a napụ wẹ ihiẹn runi wẹ, ya atụlẹ i ẹnya; makẹni onyẹ ọrụn rị e mẹn'ẹ rị e lee onyẹ-isi ẹ; onyẹ-isi rịzịkwọ e lee onyẹ hụn ka ya nwẹn.

9Kanị erere gha alị pụha wụ nke ịhịan ile; ugbo alị haịn wẹ gi tumẹ eze.

10Ẹfọ egho ara jun onyẹ egho a sụọ; ẹfọ akụ-lẹ-ụba ara jun onyẹ akụ-lẹ-ụba a sụọ. Ọnwan wụzịkwọ ihiẹn ọlaliwi.

11Ihiẹn gha a bawaye, ndị k'e rin'ẹ hụ a bawaye. Kị wụ nwan erere onyẹ-nwọnn'ẹ karị igi ẹnya ri ẹ?

12Ụran onyẹ-ọrụn a sụọ ụsụọ, ọsụọn'a n'o ri ẹkẹrẹ ọsụọn'a n'o ri ọda; kanị ọda hụn ọdanfịn nwọn e chu ọdanfịn ụran.

13O nwọn ihiẹn ohu jọgbu enwẹn ẹ m hụn elu-ụwanị rị okpuru ẹnyanwụn: onyẹ dọnmẹtọ ẹfe (akụ-lẹ-ụba), gi ẹ wiwi enwẹn ẹ ihiẹn —

14ọ kpatọgụ a, afịa a narịn a ya; ọ mụghọ nwa, bụ onwọnni ihiẹn ọ natọn'a.

15Ịhịan gba ọtọ pụha ẹfọ-nnẹ ẹ — k'o dọn bịa k'o k'a la. O wekọ ihiẹn ọwụlẹ ọ rụn la, o burukọ ihiẹn ọwụlẹ ẹka.

16Ọnwan wụzịkwọ ihiẹn jọgbu enwẹn ẹ: kẹ ịhịan dọn bịa k'o dọn a la; kị wụzị nwan erere ẹ, ebe o mẹni uforo k'ọ rị a lụgbuni enwẹn ẹ?

17Ọhịhị a kpọsọnmẹzi ẹ ihun o we nwụn, ya lẹ ihiẹn ndụn gi a gụ a lẹ afụnfụn lẹ olulu.

18Ya m nọ ghọha n'ọ hụ mma lẹn'o furughọ nị ịhịan e ri, a ra, a nị ọlụgbu ọ rị a lụgbu enwẹn ẹ enu-ụwa a sụọ a ụsụọ ẹkẹrẹ ogẹn Chuku ye ẹ gi bi — makẹni ọnwan wụ ihiẹn runi ẹnyi.

19Chuku ye ịhịan ẹfe, o mẹzi ẹ a saẹka e ri ẹ, e weri elu k'ọ hụn a, a nị ọrụn a a sụọ a ụsụọ; oyiye Chuku rọ.

20Ọ ra saẹka a nyanhan oku elu ẹ, makẹni ẹfọma hụn Chuku rị e mẹn'ẹ a sụọ a ụsụọ, ara nị a nyanhan oku elu ẹ.

← Chapter 4 Jump to: Chapter 6 →