Exodus 21

Ika 2018 Bible

← Chapter 20 Jump to: Chapter 22 →

1“Ndịnị wụ iwu i k'e yesọnmẹ wẹ:

2“I ṅọn onyẹ Hibru ibe ụnụ igbọn, ahụa isin k'o jẹnkọ d'e fe i. Hụn mẹ ahụa ẹsa y'a ha a ye n'o weri enwẹn ẹ; onwọnni ihiẹn o k'a kụ.

3Omẹni ya sụọ wị bịa, ya sụọ k'a na; omẹni o nwọngụọ nwunyẹ n'o d'a bịa, nwunyẹ ẹ jẹnkọ d'e sọn ẹ la.

4Omẹni di-nwọnn'ẹ lụye ẹ nwunyẹ, nwunyẹ ahụn a mụn'a ikẹnnyẹ mọbụ ikpoho, nwunyẹ ẹ ahụn lẹ ụmụ a k'a wụrụ nkẹ di-nwọnn'ẹ; okẹnnyẹ hụ wụ igbọn sụọ k'e weri enwẹn ẹ.

5“Kanị igbọn ahụn sị, ‘Ihiẹn di-nwọnni m lẹ nwunyẹ m lẹ ụmụ m a sụọka m, achọnị m nị m weri enwẹn m.’

6Di-nwọnn'ẹ k'e werịrị a jẹnni ndị ọka-ikpe Osolobuẹ tumẹ, we ẹ jẹn ẹhue mọbụ amanran-ụzọ, gi aha ha a ntịn, o họnrin igbọn ẹ o we nwụn.

7“Omẹni ịhịan re nwa a okpoho ye ọnọdị igbọn, o werikọ enwẹn ẹ kẹ igbọn-ikẹnnyẹ dọn e weri enwẹn wẹ.

8Omẹni ihiẹn ẹ asụọnị di-nwọnn'ẹ hụn họtọ a n'o k'a lụ a, ọ k'a nịrịrị wẹ gbarị a. Ọ sakọ ẹka re ẹ ye onyẹ alị ọzọ, makẹni omẹzinin'ẹ ihiẹn ọ sị o k'e mẹn'ẹ.

9Omẹni nwa a okẹnnyẹ k'ọ họtọn'a, o k'e mẹrịrị a k'o mẹ nwa ẹfọ a.

10Ọ nụrụ okpoho ọzọ, y'e belụakwọlẹ ihiẹn-oriri lẹ ẹkwa lẹ ihiẹn ọwụlẹ ru hụn ibuzọ.

11Omẹni o mẹnin'ẹ ihiẹn ẹtọnị, okpoho ahụn ya weri enwẹn ẹ, y'a kụlẹ ụgwọ ọwụlẹ.

12“Onyẹ fịan ịhịan ihiẹn fịangbu ẹ, wẹ k'e gburịrị a.

13Kanị omẹni ẹlẹ ọ kpachanpụ ẹnya gbu ẹ, bụ Osolobuẹ a nị a mẹ, y'a gbashi ebe m k'e dọnmẹ hụn onyẹ gbu ịhịan a gbaban.

14Kanị omẹni ịhịan e rotọgụ a, kpachanpụ ẹnya gbu ịhịan, ọsụọkwọn'a n'ọ gbaban ukpo nchụn-ẹjan m, ghakwọ nị ebahụn dọkpụnrụn a d'e gbu.

15“Onyẹ maye nẹdi ẹ mọbụ nnẹ ẹ, wẹ k'e gburịrị a.

16“Onyẹ nwụnrụn ịhịan, k'o repụgụọ a kẹ ọ hụkwọ a ẹka ogẹn wẹ gi kwọndọn ẹ, wẹ k'e gburịrị a.

17“Onyẹ kpọ nẹdi ẹ mọbụ nnẹ ẹ iyi, wẹ k'e gburịrị a.

18“Omẹni ịhịan lẹ ibe ẹ rị e kpe, ohu e weri ọmụma mọbụ ihiẹn ọwụlẹ kụ hụn ẹbọ, bụ hụnyẹ anwụnnị kanị ọ rụ ẹhụ hụn o gi dinẹ,

19ekwọndọnkọ wẹ hụn kụ a ihiẹn omẹni o lihi ọtọ sadẹ ẹka gi ọkpọ jẹnhunmẹ ezi, kanị o k'a kụrịrị a ụgwọ ogẹn ẹ hụn o tuhu, ọ hụnzị a n'ọ dịhịnchanrịn.

20“Omẹni ịhịan rị a fịan igbọn ẹ okẹnnyẹ mọbụ okpoho ihiẹn, nke wụnị igbọn hụ a nwụnhụn yeni ihiẹn ọ fịan a, wẹ k'e yerịrị a afụnfụn;

21kanị, omẹni igbọn ahụn a tọzịghọ ihiẹn nọkẹ akpọhịn ohu mọbụ ẹbụọ, eyekọ w'a afụnfụn, makẹni egho ẹ rọ.

22“Ndị rị a nụ ọgụn fịan okpoho rị imẹ ihiẹn, ọ mụ ebe ọmụmụ kelẹni ru ẹ, bụ onwẹni ihiẹn mẹ kẹ nnẹ kẹ nwa, onyẹ hụ kụ a ihiẹn k'a kụrịrị ihiẹn di okpoho ahụn sị a kụ hụn ndị oku rị ẹka kwadọn.

23Kanị omẹni wẹ rụ wẹ ẹhụ, ụnụ k'e gbugwarịrịrị onyẹ gbu ịhịan;

24ẹnya ya lanị ẹnya; eze ya lanị eze; ẹka ya lanị ẹka; ụkụ ya lanị ụkụ,

25ịhụụn ọkụn ya sọn ịhụụn ọkụn; onyẹ fịan ịhịan ihiẹn wuni, wẹ fịangwarị a hụn wuni, onyẹ rụ ịhịan ẹhụ wẹ rụgwarị a.

26“Onyẹ fịan igbọn ẹ okẹnnyẹ mọbụ okpoho ihiẹn ẹnya fịankpọ a ẹnya, o k'a nịrịrị a weri enwẹn ẹ: ịya k'o k'e gi kụ a ụgwọ ẹnya hụ.

27O tikwọn igbọn ẹ okẹnnyẹ mọbụ okpoho eze, o k'a nịrịrị a weri enwẹn ẹ: ịya k'o k'e gi kụ a ụgwọ eze hụ.

28“Efin gi mpịn sụngbu okẹnnyẹ mọbụ okpoho, wẹ k'a magburịrị efin ahụn; w'e rikwọlẹ anụ a. Kanị, ekwọndọnkọ wẹ di-nwọnn'ẹ.

29Kanị, o mẹni efin ahụn hụ a sụn ịhịan mpịn mbụ, omẹni a gbagụọ wẹ di-nwọnn'ẹ mkpịnsịn-ẹka, bụ o limẹkwọn'a, efin ahụn gbu okẹnnyẹ mọbụ okpoho, wẹ k'a magburịrị efin hụ; wẹ k'e gbuzirịrị di-nwọnn'ẹ.

30K'osilẹrị, omẹni nhan kẹ wẹ be ẹ, ya kụ ihiẹn ọwụlẹ wẹ be ẹ, gi ẹ gbarị ndụn a.

31Ịya wụ iwuni kẹ w'e gi sọn oku omẹni nwa ẹfọ ịhịan kẹ efin ahụn sụngbu — kẹ okpoho kẹ okẹnnyẹ;

32kanị, omẹni igbọn rọ, kẹ igbọn-okẹnnyẹ kẹ igbọn-okpoho, onyẹ nwọn efin hụ k'a kụ onyẹ nwọn igbọn ahụn akpụrụ egho siva iri kwasị ọgụn; kanị wẹ k'e girịrị ọmụma magbu efin hụ.

33“Onyẹ kpupụ mgbugbu tọ oghe mọbụ gu mgbugbu bụ o kpumẹn'ẹ, nị efin mọbụ jaki a danban a,

34onyẹ nwọn mgbugbu ahụn k'a kụrịrị ụgwọ ihiẹn mgbugbu hụ gbu; o k'a kụrịrị onyẹ nwọnn'ẹ ụgwọ, ozun-anụ e họnrin nke ẹ.

35“Efin ịhịan rụ efin onyẹ ọzọ ẹhụ, nị hụn ọ rụ ẹhụ a nwụnhụn, wẹ repụ hụn rị ndụn, ke egho ẹ ahanmahan, kezi anụ hụ nwụnnị ahanmahan.

36Kanị, o mẹ nị efin wẹ marịn n'ọ sụn mpịn mbụ rọ, bụ di-nwọnn'ẹ e limẹn'ẹ, di nwọnn'ẹ ka kụrịrị ụgwọ, gi efin kụ ụgwọ efin, anụ ahụn nwụnnị e họnrin nke ẹ.

← Chapter 20 Jump to: Chapter 22 →