Exodus 23

Ika 2018 Bible

← Chapter 22 Jump to: Chapter 24 →

1“Ekulẹ ihiẹn ẹnya hụnlẹn'i. Ashịakwọlẹ ẹri-ntụ gi kwadọn eje-ịhịan.

2“Emẹkwọlẹ eje-ihiẹn makẹni ndị bu ọda rị e mẹ ẹ. Ashịakwọlẹ ẹri ntụ nuzụka ezioku makẹni ị chọkọ nị oku yụ lẹ ndị ka ọda dangbama;

3egbeyekwọlẹni ịhịan yeni n'ọ wụ ogbẹnnyẹ.

4“Ị hụn efin mọbụ jaki eṅẹnrẹn i k'ọ kpahukọ, wekinn'ẹ ya azụụn.

5Ị hụn jaki onyẹ ize i e ze ebe ibu o bu ziẹnkwasị a, alakwọl'a tọ ebẹhụ; hụnkwọ a n'i yen'ẹ ẹka weli ẹ.

6“Egikwọlẹ nị ịhịan wụ ogbẹnnyẹ hangbu ẹ eṅẹn.

7Egikwọlẹ eṅẹn-ntụ mẹ ẹhụ — egbukwọlẹ onyẹ nwọnlẹni ihiẹn o mẹ mọbụ onyẹ mẹ ihiẹn furuni — makẹni i mẹ ẹ, onwẹni ogẹn m'e gi nị onyẹ ikpe ma la mmaka.

8“Anakwọlẹ ọgị-azụụn, makẹni ọgị-azụụn a nyụn ndị e legha ụzọ ẹnya, e mẹ ndị ezi-omumẹ e kuhutọ ọnụ.

9“Abịangbukwọlẹ abịamabịa; ụnụ lẹ enwẹn ọnụ a marịnghọ k'ọ rị abịamabịa, makẹni ụnụ te wụ abịamabịa imẹ alị Ijiptu.

10“Gi ni ahụa isin kụn ihiẹn ugbo ụnụ, ghọrị mkpụrụ a;

11kanị hụn mẹ ẹ ahụa ẹsa ụnụ a nị alị zu ikẹn: arụnlẹn'a ugbo, kẹni ndị igbẹnnyẹ rị imẹ igunrun ụnụ a nọ a chọrị ihiẹn-oriri, anụ-ọfịa e ri hụn wẹ rihọdụ. E mẹzikwọ nị alị vaịnị lẹ alị olivu ụnụ ẹrịra.

12“Gi akpọhịn isin rụn ọrụn ị, ka arụnkwọlẹ ọrụn nke akp'ọhịn ẹsa — kẹni efin i lẹ jaki i hụn ụzọ zu ikẹn, kẹ igbọn rị iwe i kẹ onyẹ ọrụn ị a kụ ndụn.

13“Dọnrinkwọ nị ẹnya e mẹ ihiẹn ile m sị ụnụ e mẹ. Akpọkwọlẹ ni ẹfan mmọn-lẹ-iyi ọwụlẹ; anịkwọlẹ ni ẹfan wẹ ghadẹ ụnụ ọnụ pụha.

14“Mgbe ẹtọ ahụa kẹ ụnụ k'a gha e mẹni m mmẹmmẹ.

15“E mẹ ni Mmẹmmẹ Brẹdi Nwẹlẹni Yisti o gi a fụ; ri ni brẹdi wẹ gilẹni yisti mẹmẹ akpọhịn ẹsa, nọkẹ kẹ m dọn gwa ọnụ. Gi ni ogẹn ahụn wẹ tumẹn'ẹ imẹ ifọn ibuzọ wụ Abibu e mẹ ẹ, makẹni ogẹn ahụn kẹ ụnụ gi gha Ijiptu pụha. “Onyẹ ọwụlẹ agbakwọlẹ ẹka bịa ihun m.

16“E mẹzikwọ nị Mmẹmmẹ Mkpụrụ-ibuzọ: ihiẹn ibuzọ ụnụ ghọ imẹ ugbo ụnụ kẹ ụnụ e gi e mẹ ẹ. “E mẹ ni Mmẹmmẹ Ịghọkwanma Ihiẹn-ugbo: njẹndemẹ ahụa kẹ ụnụ e gi e mẹ ẹ, ụnụ ghọchanrịngụ ihiẹn ugbo ụnụ.

17“Mgbe ẹtọ ahụa kẹ ikẹnnyẹ ụnụ ile k'a gha a zu ihun Osolobuẹ, Onyẹ nwọn ihiẹn ile.

18“Yisti ya arịkwọlẹ ihiẹn ọwụlẹ i jẹnkọ d'e wecheni anụ i k'e gi ẹdeke ẹ chụnyeni m ẹjan. “Anịkwọlẹ ni eki fọnkunrun ụtọrọ anụ wẹ gi chụnyeni m ẹjan wẹ gha e mẹ mmẹmmẹ ndịnị.

19“Wẹhẹ mkpụrụ kachanrịn mma imẹ mkpụrụ ibuzọ ihiẹn ugbo i mịpụha ụlọ Osolobuẹ wụ Chuku i. “Egikwọlẹ mirin-ẹran ewu shi nwa a.

20“Lee n'ẹ, m zila mmọn-ozi n'o burun'i ụzọ, e che i nche ụzọ lẹ n'o wẹhẹ i ebe m kwademẹ.

21Gọnkwọ a ntịn, e mẹ ihiẹn ọ sị ị mẹ. Agbakwọlẹn'a isi-akwanran. Ị gba isi-akwanran, ọ gbagharịkọkwọ ị, ebe o mẹni Ẹfan m k'o gi.

22I gọn ẹ ntịn ọhụnma-ọhụnma, mẹchanrịn ihiẹn ile m ku, m k'a wụ eṅẹnrẹn ndị iṅẹnrẹn i, wụrụ onyẹ iwe ndị iwe i.

23Mmọn-ozi m k'e burun'i ụzọ, duban ị alị ndị Amọ, ndị Hẹti, ndị Pẹrẹzi, ndị Kenaanị, ndị Hivu lẹ ndị Jebusu; m k'e kpọnchanpụ wẹ.

24Akụkwọlẹni mmọn wẹ isi alị mọbụ fe mmọn ndị ahụn mọbụ mẹ kẹ ndị alị wẹ e mẹ. I sikọkwọ d'a kụtuchanrịn wẹ, tigungwọn ọmụma-nsọ wẹ.

25Fe ni Osolobuẹ wụ Chuku ụnụ, nị ngọzi ẹ hụn ụzọ rị imẹ ihiẹn-oriri lẹ mirin ụnụ. M k'e wepụ emu imẹ igunrun ụnụ,

26onwọnni onyẹ imẹ k'e kwọn mọbụ onyẹ k'a wụ agan alị ụnụ. M k'e ye ụnụ ụtọmị.

27“M k'e zi egun m buruni ụnụ ọzọ, bu isusu che anị ọwụlẹ ụnụ k'a banye. M k'e mẹ ndị iṅẹnrẹn ụnụ gbehutọ gbama ọsọ.

28M k'e zi ebu buruni ụnụ ụzọ d'a chụpụnị ụnụ ndị Hivu, ndị Kenaanị lẹ ndị Hẹti ụzọ.

29Kanị egikọ m ahụa ohu sụọ chụpụchanrịn wẹ makẹ alị ahụn gha a gba okpokoro hụn anụ-ọfịa e gi barahị, karị ụnụ ẹka.

30M k'a gha a chụpụnị ụnụ wẹ ẹrẹtẹ-ẹrẹtẹ d'e ru mgbe ọnụ baru hụn k'e bigbarị alị ahụn.

31“M k'e mẹ alị ụnụ gha ohimin-ufie d'e ru ohimin ndị Filistia, gha atụ d'e ru Iyi-Yufretisi. M k'e bu ndị bi alị hụ che ụnụ ẹka, ọnụ a chụpụ wẹ.

32Ụnụ lẹ wẹ mọbụ mmọn w'e fe enwọnkwọlẹ nkwerigbama.

33A nịkwọlẹni wẹ bi alị ụnụ amamgbe w'a han ụnụ mẹ m njọ, makẹni ife-mmọn wẹ k'a wụrịrịnị ọnụ ọnyan.”

← Chapter 22 Jump to: Chapter 24 →