Exodus 28

Ika 2018 Bible

← Chapter 27 Jump to: Chapter 29 →

1“Gha imẹ ndị Izrẹlụ weri Ẹrọnụ nwẹnẹ i tumẹ, n'ọ hụn ụzọ rụnmanị m ọrụn ịchụn-ẹjan, ya lẹ ụmụ a ikẹnnyẹ, Nadabụ lẹ Abihu, lẹ Ẹliẹza lẹ Itama.

2“I jẹnkọ d'e mẹmẹni Ẹrọnụ nwẹnẹ i ẹwuru-nsọ pụ-ichẹn hụn k'e ye ẹ ọghọ lẹ ikpẹn.

3Gwa ndị ọkaa ile, ndị m ye akọ-lẹ-uche w'e gi mẹ ihiẹn ndị nọ ẹnịna, wẹ k'e mẹmẹni Ẹrọnụ ẹkwa ndị w'e gi dọn ẹ nsọ, n'ọ hụn ụzọ rụnmanị m ọrụn ịchụn-ẹjan.

4Lee ẹkwa ichẹn-ichẹn wẹ jẹnkọ d'a kwa: Ẹkpa Elu-obi, ẹfọdụ w'e yiyechanrịn elu ẹ, ẹwuru tueghafe mkpụkụ, ẹwuru ọrụn nchụn-ẹjan tueru alị wẹ kpa, okpu isi ohu lẹ eriri ohu. Ẹrọnụ nwẹnẹ i lẹ ụmụ a ikẹnnyẹ kẹ wẹ k'a kwanị ẹkwa-nsọ ndịnị, nị wẹ hụn ụzọ a rụnnị m ọrụn ndị a chụn ẹjan.

5Wẹ sikọ d'e weri goru lẹ oruru bru lẹ nke pọpụ lẹ nke ododo lẹ ẹkwa-linẹni riẹnni gi kwa wẹ.

6“Wẹ gi ẹkwa-linẹni riẹnni kwa ẹwuru ẹfọdụ, kpayesọnmẹ ẹ ihiẹn goru lẹ oruru bru lẹ nke pọpụ lẹ nke ododo, kpayesọnmẹ wẹ ọhụnma.

7O sikọ d'a wụ ibe-ẹkwa ihun lẹ ibe-ẹkwa azụụn hụn rusọnmẹ isi-uvun azụụnnị lẹ azụụnnị; wẹ sikọ d'e nwọn ebe rị isi-uvun wẹ gi e wegbama wẹ.

8Ẹwuru-ẹfọdụnị jẹnkọ d'e nwọn nfifie-ukun nke ẹ wẹ kpa n'ọ ma mma, hụn k'a wụzị ẹkwa-linẹni wẹ kpayesọnmẹ ihiẹn-goru lẹ oruru bru lẹ nke pọpụ lẹ nke ododo.

9“Weri ọmụma ọnik'si ẹbụọ, y'a tụ ẹfan ebọn ichẹn-ichẹn rị Izrẹlụ ye elu wẹ:

10tụ ẹfan isin imẹ wẹ ye ọmụma ohu, y'a tụ ẹfan isin họdụnị ye hụn ẹbọ; tụyesọnmẹ wẹ kẹ wẹ dọnsọnmẹ dịan.

11Tụ ẹfan ebọn Izrẹlụ ndị ahụn ye enu ọmụma ẹbụọ hụ kẹ w'a tụ ihiẹn wẹ gi e biye ẹka; gi goru mẹmẹni wẹ akpa nọsọnmẹ kẹ ẹru w'e gi kwọndọn wẹ;

12y'a kpa wẹ ye isi-uvun ẹfọdụ azụụnnị lẹ azụụnnị, a wụrụ wẹ ọmụma w'e gi a nyanhan ebọn Izrẹlụ ile. Ẹrọnụ k'a gha e bu ẹfan ndị hụ isi-uvun ihun Osolobuẹ, e gi ẹ a nyanhann'a ndị Izrẹlụ.

13“Gi goru mẹmẹ akpa nọsọnmẹ kẹ ẹru;

14y'e gi ezigbo goru wẹ buchelẹni ihiẹn ọzọ kpa eriri ẹbụ, y'a kụnma wẹ ohu-ohu ye akpa goru ndị ahụn nọ kẹ ẹru.

15“Mẹmẹ Ẹkpa Elu-obi w'e gi a chọ uche Osolobuẹ. Ọkaa jẹnkọ d'e mẹmẹ ẹ. Gizi ẹkwa-linẹni riẹnni wẹ kpaye ihiẹn-goru lẹ oruru bru lẹ nke pọpụ lẹ nke ododo mẹmẹ ẹ, ihiẹn i gi mẹmẹ Ẹwuru Ẹfọdụ ahụn.

16Usue ẹ lẹ ụshịa a k'a han, wẹ magigụ a n'o họnrin ẹkpa. O k'a shịahan kẹ ubẹka ẹtọ.

17Kpa ọmụma pụ-ichẹn ye ogele ẹnọ elu ẹ. Ọmụma ẹtọ hụn k'a rị ogele ibuzọ wụ rubi, tọpazị lẹ berilu;

18ogele nke ẹbụọ wụ tọkwọịzị, safaya lẹ ẹmaradị;

19ogele nke ẹtọ wụ jasịntị, ageti lẹ amitisti;

20ogele nke ẹnọ wụ krisolaịtị, ọnik'si lẹ jaspa. Gi akpa goru nọsọnmẹ kẹ ẹru kpadọn wẹ.

21“Ọmụma ndịnị sikọ d'e bu ẹfan ebọn mmẹbụọ Izrẹlụ; wẹ k'a tụyesọnmẹ wẹ ẹfan ebọn nọkẹ ihiẹn wẹ gi e biye ẹka; ebọn-ebọn ohu-ohu.

22Gi ezigbo goru wẹ buchelẹni ihiẹn ọzọ kpa eriri ẹbụọ w'e gi kọnye Ẹkpa Elu-obi hụ.

23Gizi goru mẹmẹ ẹgba ẹbụọ k'a rị Ẹkpa Elu-obi ahụn, y'e bu ẹgba ndị ahụn che ntịn a ẹbụọ rị ibe elu.

24Gan eriri goru ẹbụọ hụ ye ẹgba ẹbụọ ahụn rị ntịn ẹbụọ elu Ẹkpa Elu-obi hụ,

25y'e we isi ẹbụọ họdụ eriri goru ndị ahụn ganyesọnmẹ isi-uvun ẹfọdụ.

26Y'e gi goru mẹmẹ ẹgba ẹbụọ, gba wẹ ye isini lẹ isini ibe azụụn Ẹkpa Elu-obi, ẹhụ ntịn a ẹbụbụọ rị ibe alị, ọ nọkunmẹ Ẹwuru ẹfọdụ.

27Gizi goru mẹmẹ ẹgba ẹbụọ kwayesọnmẹ azụụnnị lẹ azụụnnị ibe alị ihun ẹwuru-ẹfọdụ hụ, kanị o rugụkọ nfifie-ukun ẹfọdụ.

28Wẹ sikọ d'e gi eriri bru kẹn ẹgba ndị rịsọnmẹ azụụn Ẹkpa Elu-obi ye ndị rị ibe alị ihun ẹwuru-ẹfọdụ, ẹkpa elu-obi a nọkwasịchanrịn eriri-ukun Ẹfọdụ, makẹ Ẹkpa Elu-obi gha e mẹhunmẹ.

29“Ogẹn ọwụlẹ Ẹrọnụ banye Ebe rị Nsọ, o buhụ ẹfan ebọn Izrẹlụ ile elu obi ẹ, enu Ẹkpa Elu-obi ahụn, n'ọ hụn ụzọ wụrụ ihiẹn w'e gi a nyanhansọnmẹ wẹ ihun Osolobuẹ.

30Buzikwọ utẹn Osolobuẹ wụ Urim lẹ Tumim hụ wẹ gi a jụ a uche ẹ che imẹ Ẹkpa Elu-obi, kẹni wẹ hụn ụzọ a rị Ẹrọnụ elu obi ọ banye ebe Osolobuẹ rị, Ẹrọnụ a hụn ụzọ e buni ndị Izrẹlụ ihiẹn wẹ gi a chọ uche Osolobuẹ ebe Osolobuẹ rị ogẹn ile.

31“Gi ẹkwa bru sụọ kwazị ẹwuru tueghafe mkpụkụ w'e yiye ẹfọdụ elu ẹ;

32oghe wẹ gha e woye ẹ isi k'a rị ahanmahan a, e gbihunmẹ wẹ olu ẹ hụ makẹ ọ gha a dọka.

33Gi oruru bru lẹ nke pọpụ lẹ nke ododo kpa ogbe pomegraneti ghahunmẹchanrịn ntịn ẹwuru hụ, y'e bu mgbịrịgban-goru mẹsọnmẹ ẹkẹrẹ-ẹkẹrẹ, chesọnmẹ ẹgbata pomegraneti:

34mgbịrịgban-goru nta ndị hụ lẹ mkpụrụ-osisi pomegraneti ndị ahụn a dugwasọnmẹ ibe wẹ.

35Ẹrọnụ k'e yirịrị a ọ gha a rụn ọrụn onyẹ nchụn-ẹjan. K'ọ bankọ ihun Osolobuẹ imẹ Ebẹhụ rị Nsọ abankọ k'ọ pụkọ apụkọ, wẹ k'a gha a nụ ukwere mgbịrịgban-goru ndị hụ mẹsọnmẹ ẹkẹrẹ-ẹkẹrẹ, makẹ ọ gha a nwụnhụn.

36“Gi goru wẹ buchelẹni ihiẹn ọzọ mẹmẹ ibe-goru, y'a tụye ẹ ihiẹnni: ‘Hụn Wẹ Gi Kwanị Osolobuẹ’. Tụ a kẹ w'a tụ ihiẹn wẹ gi e biye ẹka.

37Gi eriri bru wẹ kpa kẹn ẹ ye okpu ẹ. Ihun okpu hụ k'o sikọ d'a rị.

38O k'a rị Ẹrọnụ ezimezi ihun, o gi e bupụ ihiẹn ile ikpe e gi ma ndị Izrẹlụ ebe oyiye nsọ ile w'e ye rị. O k'a rịsọnmẹ Ẹrọnụ ezimezi ihun kẹni Osolobuẹ hụn ụzọ a narịn wẹ oyiye ndị ahụn.

39“Gi ẹkwa-linẹni riẹnni kpa ẹwuru ọrụn nchụn-ẹjan tueru alị, y'e gizi ẹkwa-linẹni kwa okpu; kpazịnị hụnnị nfifie shịanị ma mma.

40“Kwanị ụmụ-ikẹnnyẹ Ẹrọnụ ẹwuru ọrụn nchụn-ẹjan tueru alị lẹ nfifie shịanị lẹ okpu, kẹni ọghọ lẹ ikpẹn hụn ụzọ a rị wẹ ẹhụ.

41I jẹnkọ d'e yimẹ Ẹrọnụ nwẹnẹ i lẹ ụmụ a ikẹnnyẹ ẹkwa ndịnị, y'e hukpu wẹ udẹn wẹ gi e tumẹ ịhịan, tumẹ wẹ. Y'e wepụha wẹ nị wẹ rụnmanị m ọrụn ịchụn-ẹjan.

42“Gi ẹkwa-linẹni mẹmẹni wẹ apa tueru ọgbọdọgbọ nị w'e gi ẹ e kpumẹ ẹhụ.

43Ẹrọnụ lẹ ụmụ a ikẹnnyẹ k'e yirịrị a ogẹn ile wẹ sikọ d'a banye Ọdụ-ozuzu mọbụ nọkunmẹ ukpo-nsẹnsị imẹ Ebe Rị Nsọ d'a rụn ọrụn ofufe, makẹ ikpe gha a ma wẹ, a nwụnhụn wẹ. Ẹrọnụ lẹ ụmụ a k'e dọnmẹ iwuni jẹnrin-ejẹn.

← Chapter 27 Jump to: Chapter 29 →