Ezekiel 14

Ika 2018 Bible

← Chapter 13 Jump to: Chapter 15 →

1O nwọn ndị-isi Izrẹlụ bịa d'a hụnnị m nọkẹ onyẹ amụma; e weri wẹ oche ihun m,

2Osolobuẹ nọ gwa m oku, sị,

3“Nwa-ịhịan, ikẹnnyẹ ndịnị e bugụọ obi wẹ che mmọn wẹ rị a rụa, e bugụọ wẹ mmọn ndị hụ rị e mẹ wẹ a kpọgburu che enwẹn wẹ ihun. Nanị m'a dọn nwan nị wẹ jụ m ihiẹn ọwụlẹ?

4“Ị k'a sị wẹ nwan, ‘Osolobuẹ nwọn ihiẹn ile sị: Onyẹ Izrẹlụ ọwụlẹ hụn k'e bu obi ẹ che mmọn, gi njọ a gbọnkin enwẹn ẹ ụzọ, bịa d'e kunrun onyẹ-amụma, mmẹ lẹ enwẹn m wụ Osolobuẹ k'a zazịkwọ hụnyẹ nọkẹ onyẹ rị e fe mmọn ndị hụ ile ọ rị e fe.

5M k'e mẹ ẹ kẹni m gi ẹ nwụndọn ndị Izrẹlụ, mẹ ihiẹn rị wẹ obi pụha ifọn, makẹni obi wẹ ile a pụgụọ ebe m rị yeni mmọn ile wẹ rị e fe.’

6“Gwa nwan ndị Izrẹlụ nị Osolobuẹ Nwọn Ihiẹn Ile sị, Bihutọ nị ẹka! La nị mmọn ndị hụ ụnụ rị e fe tọ; wepụ nị ẹnya arụ ile ụnụ rị e mẹ!

7“Onyẹ Izrẹlụ ọwụlẹ mọbụ abịamabịa ọwụlẹ bi alị Izrẹlụ hụn k'a gbakitọ m azụụn, bu obi ẹ che mmọn ndị hụ wẹ rị e fe, gi njọ a gbọnkin enwẹn ẹ ụzọ, bịa d'e kunrun onyẹ-amụma n'ọ jụ a uche m, mmẹ wụ Osolobuẹ k'e gi ẹka m za a.

8“M k'e bu ẹnya zinmẹ onyẹ hụ, gi ẹ họnrin ihiẹn-nghọsị lẹ ihiẹn w'e kuja oku ẹ. M k'e bepụ a imẹ ndị nke m, ụnụ e gi ẹ marịn nị mmẹ wụ Osolobuẹ.

9“Omẹni onyẹ-amụma amarịn n'e dufiegụọ w'a, o ku ihiẹn ọwụlẹ, mmẹ dufie ẹ. M k'e tikpọ a, wepụ a imẹ ndị nke m Izrẹlụ;

10e gi wẹ isi wẹ buru eje-ihiẹn wẹ mẹ: kẹ onyẹ amụma wẹ bịa d'a jụ uche Osolobuẹ kẹ onyẹ bịa d'a jụnị.

11Ogẹn hụ, ndị Izrẹlụ agbakịtọkọzị m azụụn, egikọzị wẹ njọ wẹ mẹrụ enwẹn wẹ. A wụrụ wẹ ndị nke m, a wụrụ m Chuku wẹ. Ya kẹ Osolobuẹ Nwọn Ihiẹn Ile ku.”

12Osolobuẹ gwa m oku, sị m,

13“Nwa-ịhịan, alị mẹ m njọ ghahanị itikpọ nkwa wẹ gi Ẹfan m kwe, n'e bu m nụmanị alị hụ, mẹ wẹ ahụnzịlẹ ihiẹn w'e ri, zihẹni wẹ ụnwụn, gbu ịhịan lẹ anụmanụ rịn'a,

14ọsụọkwọn'a nị madụ ẹtọnị rị alị hụ, Nụa lẹ Danẹlụ lẹ Jobu, enwẹn wẹ sụọ kẹ ezi-omumẹ wẹ k'a saẹka zụọpụha. Ya kẹ Osolobuẹ Nwọn Ihiẹn Ile ku.

15“Omẹni m zi eje-anụ ye imẹ alị hụ ile, n'e gbusọnmẹ wẹ ịhịan imẹ ẹ d'e runi ọ gba okpokoro, nke wụnị onwọnzini onyẹ a ghan'a yeni eje-anụ ndị hụ,

16ma isi m, mmẹ wụ Osolobuẹ Nwọn Ihiẹn Ile rị e ku ẹ nị ọsụọn'a nị ikẹnnyẹ ẹtọnị rị imẹ alị hụ, asakọ wẹ ẹka zụọpụhadẹ ụmụ wẹ ikẹnnyẹ mọbụ ikpoho. Uwẹ sụọ k'a rị ndụn, kanị alị hụ k'a gba okpokoro.

17“Omẹni ọpịa-agha kẹ m zihẹ alị hụ, sị, ‘Ọpịa-agha ya ghakwama alịnị’, n'e gi m'ẹ gbupụ ịhịan lẹ anụmanụ imẹ ẹ,

18ma isi m, mmẹ wụ Osolobuẹ nwọn Ihiẹn Ile rị e ku ẹ nị ọsụọn'a nị ikẹnnyẹ ẹtọnị rị imẹ alị hụ, asakọ wẹ ẹka zụọpụhadẹ ụmụ wẹ ikẹnnyẹ mọbụ ikpoho. Uwẹ sụọ k'a rị ndụn.

19“Ikẹnkwọ eje-emu e gbuni kẹ m zijẹn imẹ alị hụ, gi ọnụma sọn alị hụ, gbumẹ ịhịan lẹ anụmanụ rịn'a.

20Ma isi mmẹ wụ Osolobuẹ Nwọn Ihiẹn Ile, ọsụọn'a nị Nụa lẹ Danẹlụ lẹ Jobu rị imẹ alị ahụn, asakọ wẹ ẹka zụọpụhadẹ ụmụ wẹ ikẹnnyẹ mọbụ ikpoho. Enwẹn wẹ sụọ kẹ ezi-omumẹ wẹ k'a saẹka zụọpụha.

21“Mmẹ wụ Osolobuẹ Nwọn Ihiẹn Ile sị ẹrịra k'o k'a rị ogẹn m'e gi zihẹni Jerusalẹm eje-ihiẹn ẹnọnị m gi e ye afụnfụn — ọpịa-agha, ẹgụn, eje-anụ lẹ eje-emu, gi wẹ gbu ịhịan lẹ anụmanụ rị imẹ ẹ!

22“K'osilẹrị, o nwọnghọkwọ ndị wẹ k'e gbuhọdụ — kẹ ikẹnnyẹ kẹ ikpoho; wẹ k'a gha imẹ Jerusalẹm dupụha wẹ; wẹ lala d'e kunrun ụnụ imẹ Babilọnụ. Ụnụ sikọ d'a hụn eje-agụngụn wẹ lẹ obibi wẹ, obi e ru ụnụ alị nị emẹni m Jerusalẹm okẹn ihiẹn ile m mẹ lẹ nsọngbu ile m wẹhẹn'ẹ mmakalaka.

23Ụnụ hụn kẹ wẹ nọ obi e ru ụnụ alị, makẹni ụnụ sikọ d'a hụn eje-agụngụn wẹ lẹ obibi wẹ; ogẹn ahụn ụnụ a marịn nị emẹni m Jerusalẹm ihiẹn ile m mẹ ẹ mmaka. Ya kẹ Osolobuẹ Nwọn Ihiẹn Ile ku.”

← Chapter 13 Jump to: Chapter 15 →