Ezekiel 5

Ika 2018 Bible

← Chapter 4 Jump to: Chapter 6 →

1“Osolobuẹ sị m, ‘Nwa-ịhịan, weri ọpịa-agha tụ nkọ nọkẹ ẹbeke-isi wẹ gi a kọ ntutu: gi ẹ kọ isi lẹ ẹtu, y'e gi ihiẹn wẹ gi a ma ihiẹn kebe ntutu ị kọpụha ụzọ ẹtọ.

2Ị nọzugụ akpọhịn ole hụ y'e gi ghọsị okehunmẹ wẹ sikọ d'e kehunmẹ Jerusalẹm, y'e weri ụzọ ohu imẹ ntutu hụ ị kọpụha, dụn a ọkụn etintinnaị Jerusalẹm hụ i seye elu ụrụa. Y'e weri ụzọ ohu, gi ọpịa-agha beyịya wẹ imẹ obodo hụ; y'a bụọ ụzọ ohu họdụnị ye imẹ ufere, m jẹnkọ d'e sepụha ọpịa-agha chụ wẹ.

3Nọ imẹ ndị ahụn ị k'a bụọyịya weri ẹkẹrẹ kẹnmẹye ẹwuru i yi;

4y'e werizi ndị i k'e weri imẹ wẹ tụye ọkụn, kẹni wẹ dụn ọkụn. Ọkụn jẹnkọ d'a gha ebẹhụ nwunrun, ghagbarị Izrẹlụ ile.

5“ ‘Osolobuẹ nwọn ihiẹn ile sị: Ọnwan wụ Jerusalẹm hụn m bu che ọnọdị rị mkpa ahanmahan alị ile, hụn m we alị ichẹn-ichẹn fihunmẹ.

6Kanị, Jerusalẹm e nupụgụọ isi okpuru iwu m, mẹkarị alị ndị ọzọ njọ, dan iwu m karị alị ndị ile nọkunmẹn'ẹ — makẹni ndị Jerusalẹm a jụgụọ iwu ile m ye wẹ, egini wẹ wẹ bi.

7Mmẹ, Osolobuẹ hụn nwọn ihiẹn ile, rị nwan a sị: Ebe o mẹ ni ụnụ e nupụgụọ isi karị alị ndị nọkunmẹni ụnụ, nke wụnị ụnụ egini iwu m bi, ụnụ ara mẹ ihiẹn m sị ụnụ mẹ, ụnụ asadẹni nwan ẹka biru obibi alị ndị nọkunmẹni ụnụ,

8mmẹ wụ Osolobuẹ nwọn ihiẹn ile rị nwan a gwa yụ wụ Jerusalẹm nị mmẹ lẹ yụ rọ! M jẹnkọ d'e mẹshi i ikẹn idẹnya alị ndị ọzọ.

9M k'e gi ufiri arụ ndị hụ wẹ rị e mẹ imẹ i mẹ i ihiẹn m mẹtulẹni, ihiẹn hụn o mẹ ni m mẹgụ ị ya, emẹkọzị m'a.

10Ndị nẹdi k'a gha e ri ụmụ wẹ imẹ i, ụmụ hụ e ri ndị nẹdi wẹ. M k'e ye i afụnfụn, e feyịya m ndị k'a họdụ imẹ i ye alị ichẹn-ichẹn rị ẹbamịn ile.

11“ ‘Mmẹ, Osolobuẹ nwọn ihiẹn ile rị nwan e kun enwẹn m, a sị ị nị ebe o mẹni y'e gigụọ mmọn ndị hụ ile rụnị ị kpụ lẹ arụ ile ị rị e mẹ mẹrụ Ụlọ-nsọ m, mmẹ lẹ enwẹn k'a kpụnpụ ị ntutu; elekọ m'ị ẹnya ihun, emẹkọnị m'ị omikẹn.

12M sikọ d'e kebe ndị nke i ụzọ ẹtọ, gi ẹgụn lẹ eje-emu gbu ụzọ ohu tọ imẹ i, gi ọpịa-agha gbu ụzọ ohu kanị ẹlẹ imẹ obodo, e fe m ụzọ ohu ye alị ndị ọzọ rị ẹbamịn ile, gi ọpịa-agha chụ wẹ.

13“ ‘Ogẹn ahụn, olulu m a rọ, ọnụma m a kụsị; ẹfọ e jun m. Ya wụ, m mẹchanrịngụ wẹ ihiẹn m k'e gi ọnụma m mẹ wẹ, a marịn wẹ nị mmẹ wụ Osolobuẹ rị nwan e gi ẹnya rị a fụnị m a gwa wẹ ihiẹnni.

14“ ‘M k'e mẹ i wụrụ mkpọkọ-ụlọ mkpọkọ-ụlọ lẹ ihiẹn-ifẹnrẹn ẹnya alị ndị nọkunmẹn'i lẹ ẹnya onyẹ ọwụlẹ sikọ d'a ghafeni.

15Ị k'a wụrụ ihiẹn-ifẹnrẹn lẹ ihiẹn-ẹmụ lẹ ihiẹn w'e gi a dọ ẹka-ntịn lẹ ihiẹn-egun ẹnya alị ndị nọkunmẹn'i, ogẹn m'e gi gi olulu lẹ ọnụma ye i afụnfụn. Mmẹ wụ Osolobuẹ e kuọl'a.

16Ogẹn m'e gi zihẹn'i ẹgụn hụ e gbuni, gba ị ya nọkẹ eje-ụta, m k'a gba a hụn m'e gi tikpọ ị. M k'e mẹ ụnwụn mụ ọda-ọda imẹ i, mẹ ihiẹn-oriri kọ imẹ i ọda-ọda.

17M k'e zihẹn'i ẹgụn lẹ eje-anụ ichẹn-ichẹn, a napụ wẹ i ụmụ. Emu lẹ ọnwụn k'a rị imẹ i; m k'e zihẹn'i agha. Mmẹ wụ Osolobuẹ e kuọl'a!’ ”

← Chapter 4 Jump to: Chapter 6 →