Galatians 3

Ika 2018 Bible

← Chapter 2 Jump to: Chapter 4 →

1Euu ndị Galeshịa, ndị-nzuzu! Onyẹ mẹ ụnụ ihiẹnni? Idẹnya ụnụ kẹ wẹ nọ ghọsịchanrịn nị wẹ kpọgbu Jizọsị Kraịstị elu obe.

2Ihiẹn ohuni sụọ kẹ m chọ nị m marịn: gwadẹleni m, nanị kẹ ụnụ dọn nwọnhẹn Mmọn-nsọ? Ghahanị idọnmẹ Iwu ra ghahanị ikweri oziọma ụnụ nụ?

3Ẹrịra kẹ ụnụ e zuzuhan? Ẹka Mmọn-nsọ kẹ ụnụ gha bidọn; ụnụ rị nwan a lịlịma nị ụnụ gi ikẹn ụnụ, ikẹn ịhịan, mẹchanrịn a?

4Nị m jụlele ụnụ: afụnfụn ahụn ile ụnụ ta a lagụọ iwi? Mba nụ — ra ọ lagụọdẹ iwi?

5Osolobuẹ hụn e ye ụnụ Mmọn-nsọ a, a rụn ọrụn atụmẹnya imẹ igunrun ụnụ, o ye ụnụ ya nị ụnụ rị e dọnmẹ Iwu Mozizi ra makẹni ụnụ hụ a nụ e gi ihiẹn ụnụ nụ e dọn?

6Nke Ebraham, Ẹkụkwọ-nsọ sị, “O kweyeni Osolobuẹ, Osolobuẹ nọ gụn a yen'ẹ, kpọ a onyẹ ezi-omumẹ.”

7Gi ni ọnwan marịn nị ndị hụn wụ ezigbo ụmụ Ebraham wụ ndị kwerini.

8Ẹkụkwọ-nsọ e kutọgụọ a nị Osolobuẹ jẹnkọ d'e gi okukwe ndị wụlẹni ndị Ju kuni wẹ ọhụnma; ọ sị nị Chuku zi Ebraham oziọma ẹdẹi, sị, “Ẹka ị kẹ Osolobuẹ k'a gha gọzi ndị alị ile.”

9Ya wụ, ndị hụn kwerini k'e sọn Ebraham hụn kwerini wụrụ ndị wẹ gọzi.

10Ndị hụ gi idọnmẹ Iwu e dọn ẹnya a wụrụọlẹ ndị wẹ bụ ọnụ. Makẹni, Ẹkụkwọ-nsọ sị, “Onyẹ ọwụlẹ ghalẹni e dọnmẹ ihiẹn ile wẹ de imẹ ẹhụhụọ Iwu e họnringụọ onyẹ wẹ bụ ọnụ!”

11O wegụọ nwan ẹnya n'o nwọnni onyẹ Osolobuẹ jẹnkọ d'e kuni ọhụnma makẹni o dọnmẹ Iwu. Ezioku rọ, makẹni Ẹkụkwọ-nsọ sị, “Okukwe kẹ onyẹ ezi-omumẹ k'e gi rị ndụn,”

12bụ ẹlẹ okukwe kẹ Iwu gi a rụn, makẹni, Iwu lẹ enwẹn ẹ e kugụọ nị, “Onyẹ e mẹ ihiẹn Iwu ku k'e gi wẹ rị ndụn.”

13Kraịstị gbapụha ẹnyi imẹ abụmọnụ rị imẹ Iwu ghahanị igi ufiri ẹnyi wụrụ onyẹ wẹ bụ ọnụ. Makẹni, Ẹkụkwọ-nsọ sị, “Onyẹ ọwụlẹ wẹ hogbu elu osisi a wụrụọlẹ onyẹ wẹ bụ ọnụ.”

14Ọ gbapụha ẹnyi kẹni ngọzi Osolobuẹ gọzi Ebraham hụn ụzọ ruzi ndị alị ndị ọzọ wụlẹni ndị Ju ẹka, ghahanị Kraịstị wụ Jizọsị, kẹni ẹnyi hụn ụzọ gi okukwe nwọnhẹn Mmọn-nsọ ahụn Osolobuẹ kwe nkwa a.

15Umunẹ m, nị m gi ihiẹn w'e mẹ ụhụọhịn ile kọwa ihiẹnni: madụ ẹbụọ kwerigbamaọlẹ biye ẹka, onwọnni onyẹ k'a saẹka kagbu ẹ mọbụ wechen'ẹ.

16Ogẹn Osolobuẹ gi kwe Ebraham lẹ nwa a nkwa hụ, Ẹkụkwọ-nsọ asịnị “Ụmụ ị” ya wụ, hụn karị onyẹ ohu; kanị ọ sị “nwa ị” ya wụ onyẹ ohu sụọ — hụn wụ Kraịstị.

17Ihiẹn m gi ẹ e ku wụ nị Osolobuẹ e biyegụọ nkwerigbama hụ ẹka, tumẹ ẹ; Iwu wẹ webanhan kẹ ọrọgbọ ahụa iri-kwasị-ọgụn kwasị nnụ (430) gharịgụ asakọ nwan ẹka kagbu nkwerigbama Osolobuẹ biyegụ ẹka lẹ nkwa o kwe imẹ nkwerigbama ahụn.

18Makẹni, omẹni idọnmẹ Iwu kẹ wẹ gi e nwọnhẹn ihiẹn Osolobuẹ kwe nkwa a, ya wụ nị ẹlẹzi nkwa a haịn wẹ gi e nwọnhẹn ẹ. Kanị, ezioku-ezioku, Osolobuẹ ye Ebraham ya ọfẹ gi ẹ mẹzu nkwa a.

19Kị Osolobuẹ webanhannị nwan Iwu? Njọ haịn. O webanhan a n'ọ rụn d'e ru ogẹn nwa ahụn wẹ kwe nkwa hụ e gi bịa. Wẹ gha ẹka ndị mmọn-ozi tumẹ Iwu hụ, we ẹ ye ụkọ ye wẹ.

20Kanị w'a ra chọ ụkọ ebe onyẹ ohu sụọ nọ e mẹ ihiẹn: Osolobuẹ aghanị ẹka ụkọ kwe Ebraham nkwa ahụn.

21Arị m e ku nị Iwu lẹ nkwa Osolobuẹ wụ eṅẹnrẹn. Kaka akpohu! Makẹni, omẹni wẹ te ye iwu hụn a saẹka e ye ndụn, nkẹ ọ wụrụ nị, ezioku-ezioku, onyẹ dọnmẹ ẹ, ọ wụrụ onyẹ ezi-omumẹ.

22Kanị Ẹkụkwọ-nsọ e kugụọ a nị ịhịan ile rị ẹgbụn njọ, ndị kwerini nwan Jesu Kristi kẹ Osolobuẹ e ye ihiẹn Osolobuẹ kwe nkwa a.

23Kẹ ẹnyi kelẹni kweri ni Kraịstị, Osolobuẹ bu ẹnyi dọnmẹ okpuru Iwu, kpọkin ẹnyi ye, nọkẹ ndị ngan, e che ogẹn okukwe e gi bịa.

24Ya wụ, Osolobuẹ tumẹ Iwu n'ọ wụrụnị ẹnyi onyẹ bu mkpịnsịn e lepụ ẹnyi ẹnya d'e ru ni Kraịstị a banhan, kẹni o gi okweri ẹnyi jẹnkọ d'e kwerini Kraịstị kpọ ẹnyi ndị ezi-omumẹ.

25Kanị, hụnnị ẹnyi kwerigụnị Kraịstị, ẹnyi arịzị okpuru onyẹ nlepụ-ẹnya.

26Ụnụ ile wụ ụmụ Osolobuẹ ghahanị okweri ụnụ kwerini Kraịstị wụ Jizọsị,

27makẹni, ụnụ ile wẹ gi mirin-Chuku lẹ Mmọn-nsọ buche imẹ Jesu Kristi e yirigụọ Kraịstị.

28Ya wụ nị onwọnzini ihiẹn rị ichẹn ẹgbata ndị Ju lẹ ndị wụlẹni ndị Ju; ẹgbata igbọn lẹ onyẹ nwọn enwẹn ẹ; ẹgbata ikẹnnyẹ lẹ ikpoho: ẹnyi ile wụ ohu imẹ Kraịstị wụ Jizọsị.

29O mẹ nwan nị ẹnyi wụ nke Kraịstị, ụmụ Ebraham kẹ ẹnyi wụ, ndị sikọ nwan d'e nwọnhẹn ihiẹn Osolobuẹ kwe nkwa a.

← Chapter 2 Jump to: Chapter 4 →