Galatians 4

Ika 2018 Bible

← Chapter 3 Jump to: Chapter 5 →

1Ihiẹn m rị e ku wụ nị, ebe nwa jẹnkọ d'a kwarị ukuu nẹdi ẹ kelẹni ru ogo, ọ rịhụ kẹ igbọn, ihiẹn ichẹn arịa, ọsụọn'a nị ihiẹn ile wụ nke ẹ:

2ọ rịsọnmẹ okpuru ndị e dun'ẹ lẹ ndị e lepụ a ẹnya d'e ru ogẹn nẹdi ẹ kaye.

3Ẹrịra kẹ ẹnyi nọ kẹ ẹnyi rị ụmụẹka, ẹnyi wụsọnmẹ igbọn okpuru mmọn lẹ iwu lẹ ihiẹn ile wẹ gi e dọn ẹnya elu-ụwa.

4Kanị ogẹn e zu, Osolobuẹ nọ zihẹ Nwa a: okpoho mụ a; wẹ mụ a ye okpuru Iwu.

5Osolobuẹ zihẹ ẹ n'ọ hụn ụzọ gbarị ndị rị okpuru Iwu, kẹni ẹnyi họnrin ụmụ Osolobuẹ.

6Makẹni ụnụ wụ ụmụ, Osolobuẹ nọ zihẹ Mmọn Nwa a ye imẹ obi ẹnyi; ọ hụ imẹ ẹnyi a hị, “Baba! Baba nẹdi m!”

7Ya wụ nwan nị y'ẹlẹzi igbọn; nwa kẹ ị wụ. Ebe o mẹ ni nwa k'ị wụ, Osolobuẹ k'e keye i ihiẹn ẹ.

8Mgbe mbụ, ogẹn ụnụ kelẹni marịn Osolobuẹ, ụnụ te wụ igbọn ihiẹn ichẹn-ichẹn furulẹni w'e fe hụn ụnụ e fe.

9Kanị hụnnị ụnụ marịngụ Osolobuẹ, mba, hụnnị Osolobuẹ marịngụ ụnụ, kị ụnụ burukọzịnị mmọn lẹ iwu lẹ ihiẹn ndị ahụn nwọnlẹni isi ndụn rịlẹni hụn ịhịan mmaka gi e dọn ẹnya nị ụnụ d'e họnrinzi igbọn wẹ?

10Ụnụ rị nwan a gbaye ụhụọhịn lẹ ifọn lẹ ogẹn lẹ ahụa ichẹn-ichẹn!

11Egun ụnụ rị a tụ m, nị ikẹnkwọ ọrụn ile m rụn ebe ụnụ rị a lagụọ iwi!

12M rị a rịọ ụnụ umunẹ m, rị nị kẹ mmẹ, makẹni a rịgụọ m kẹ ụnụ, etuni m. Ụnụ nwẹn etuzikwọnị, ụnụ emẹni m njọ.

13Ụnụ a marịnghọ nị emu rị a kụnị m ogẹn ahụn wẹhẹni m oghere m gi zi ụnụ oziọma isi-ibuzọ ahụn.

14Kanị, ụnụ etuni ụya rị m ẹhụ hụn mẹ ụnụ ibu, ụnụ elegberini m, ụnụ ajụnị m; kama, ụnụ nabanhan m nọkẹ sị m wụ mmọn-ozi Osolobuẹ, nọkẹ sị m wụ Kraịstị Jizọsị lẹ enwẹn ẹ.

15Kị mẹzi ịghọghọ hụ ile ụnụ nwọn ogẹn hụ?! M rị a shịa ẹri nị, omẹni ọ te rị nfe, nkẹ ụnụ a gụye m akp'ẹnya ụnụ, omẹni o te k'e yeni m ẹka!

16Kị m họnrinni nwan eṅẹnrẹn ụnụ, makẹni m gwa ụnụ ezioku?

17Wẹ rị nwan e mẹ oku ụnụ, kanị ẹlẹ ihiẹn rị mma kẹ wẹ bu obi! Wẹ chọhụ nị wẹ wepụ ụnụ ebe ụnụ rị, kẹni ụnụ bu ẹnya zinmẹ wẹ.

18Ọ hụghọkwọ mma nị w'e mẹ oku ịhịan, omẹni ufiri ihiẹn rị mma rọ, omẹni w'e mẹ ẹ ogẹn ile, ẹlẹni mmẹ lẹ ụnụ nọdị sụọ.

19Ụmụ m, imẹ ụnụ e mẹmẹzi m kẹ okpoho rị imẹ, imẹ hụn sikọ d'e mẹ m d'e ru ni ndụn Kraịstị a gbọrị imẹ ndụn ụnụ,

20k'ọ rị m m rị imẹ igunrun ụnụ kikẹnni, kẹni m hụn ụzọ gbehutọ ẹka, makẹni amarịnzị m hụn ụnụ rị!

21Gwadẹ ni m, ụnụ ndị chọkọ nị ụnụ rị okpuru Iwu, ụnụ anụnị ihiẹn Iwu Mozizi ku?

22Wẹ de ẹ imẹ Iwu nị Ebraham mụ ikẹnnyẹ ẹbụọ: Haga nnẹ ohu wụ igbọn; Sẹra nnẹ hụn-ẹbọ ẹlẹ igbọn.

23Hụn nnẹ ẹ wụ igbọn bịa kẹ nwa dọn a bịa; kanị hụn nnẹ ẹ nwọn enwẹn ẹ bịa ghahanị nkwa Osolobuẹ kwe.

24Ẹnyi k'a s'ẹka gi ihiẹn ndịnị ghọsị ihiẹn: wẹ gi ikpoho ẹbụọnị e ku oku nkwerigbama ẹbụọ. Ohu wụ hụn wẹ nọ elu Ugu Saịnaị mẹmẹ. Ọhụn kẹ Haga nọkin ẹnya a; ọ mụ ụmụ, a wụrụ wẹ igbọn.

25Haga nọkin ẹnya Ugu Saịnaị hụn rị imẹ atụ alị Arebịa. Ọ ghọsị obodo Jerusalẹm hụn rị ogẹnni, makẹni Jerusalẹm lẹ ụmụ a wụ igbọn kikẹnni.

26Kanị Jerusalẹm rị elu-igwee ẹlẹ igbọn; ịya wụ nnẹ ẹnyi.

27Makẹni Ẹkụkwọ-nsọ sị, “Ghọghọma nwan! Ịyụ wụ agan, hụn mụtulẹni nwa! Kwankpọma ẹbụ! Yimẹ oro! Ịyụ, imẹ mẹtulẹni! Makẹni, ụmụ okpoho hụ wẹ jụtọ a karịgụọ nke okpoho hụ ya lẹ di ẹ bichanrịn!”

28Umunẹ m, ụnụ wụ ụmụ wẹ kwe nkwa a nọkẹ Aziki.

29Kanị, ọ rị nwan k'ọ rị ogẹn ahụn: nwa wẹ mụ kẹ ịhịan a mụ nwa kpokpo hụn wẹ mụ ghahanị Mmọn Osolobuẹ.

30Kanị, kị Ẹkụkwọ-nsọ ku? Ọ sị, “Chụpụ igbọn ahụn lẹ nwa a; makẹni onwọnni ogẹn nwa igbọn hụ e gi sọn nwata ahụn nnẹ ẹ wụlẹni igbọn keri ukuu.”

31Umunẹ m, ẹnyi ẹlẹ nwan ụmụ okpoho hụ wụ igbọn, kama, ụmụ okpoho ahụn wụlẹni igbọn kẹ ẹnyi wụ.

← Chapter 3 Jump to: Chapter 5 →