Galatians 6

Ika 2018 Bible

← Chapter 5 Jump to:

1Umunẹ m, omẹni o nwọn onyẹ mẹ njọ, ụnụ ndị Mmọn-nsọ rị a kị, gi ni nwayọ wekinhẹn ẹ. Ka kpachanpụ nị ẹnya amamgbe ọnwụnwan a bịanị ụnụ nwẹn.

2E bu ni ibu ibe ụnụ, e gi ẹ e mẹzu iwu Kraịstị.

3Onyẹ rị e ro n'o nwọnghọ ihiẹn ọ wụ bụ onwọnni ihiẹn ọ wụ, ọ rị e dufie enwẹn ẹ.

4Onyẹ-onyẹ ya lele ihiẹn ọ rị e mẹ. Omẹni ọ hụghọ mma, ya gi ihiẹn ya lẹ nwẹn mẹ nyan isi, ẹlẹ makẹni o mẹkarịgụọ onyẹ ọzọ,

5makẹni onyẹ-onyẹ nwọn ibu o k'e bu.

6Ndị wẹ rị a kuzi oku-Chuku wẹ keye ndị rị a kuzi wẹ oku-Chuku ihiẹn ọwụlẹ rị mma wẹ nwọn.

7Edufiekwọlẹ ni enwẹn ụnụ: Osolobuẹ anịkọkwọ wẹ lelịa a; ihiẹn onyẹ kụn k'o k'a ghọrị.

8Onyẹ kụnye ihiẹn rị a gụn ẹhụ, ọ ghọrị ntikpọ; onyẹ kụnye ihiẹn Mmọn-nsọ chọ, ọ ghọrị ndụn-itẹbitẹ.

9Ya wụ, ndụn imẹ-mma y'a gụkwọlẹ ẹnyi. Makẹni, omẹni ẹnyi anịnị ndụn gụ ẹnyi, ogẹn ru, ẹnyi jẹnkọ d'e ri erere ẹ.

10Ya wụ, nị ẹnyi e gini oghere ọwụlẹ bịanịnị ẹnyi e mẹni nwan ịhịan ile ihiẹn rị mma, tụmadụ ndị ezi-lẹ-ụlọ ofufe-Kraịstị.

11Lee ni akpụrụ-ẹkụkwọ ndịnị nọ jakpo-jakpo m gi ẹka m deni ụnụ.

12Ndị rị a chọ nị wẹ gi ihiẹn ẹnya e legha dụ ẹka obi, uwẹ rị nwan a chọ nị wẹ wa ịkwa-ugun ye ụnụ olu. Wẹ rị e mẹ ẹ amamgbe wẹ e gi ufiri obe Kraịstị kpokpo wẹ.

13Ndị kwadẹ nwan ugun arị e dọnmẹ Iwu, bụ wẹ hụ a chọ nị ụnụ kwa ugun kẹni wẹ gi ihiẹn rị ụnụ ẹhụ nyan isi.

14O bugharị m! Egikọ m ihiẹn ọwụlẹ nyan isi wezụka obe Di-nwọnni-ẹnyi wụ Jesu Kristi. E gigụọ wẹ obe hụ kpọgbu ụwanị, ọ nọ wụrụ ihiẹn nwụnhụnnị ebe m rị, gizikwọ obe hụ kpọgbu m, m nọ wụrụ ihiẹn nwụnhụnnị ebe ụwa rị.

15Kẹ ịkwa-ugun kẹ akwanị-ugun arịnị mkpa, kaka! Ihiẹn rị mkpa wụ nị ịhịan a wụrụọlẹ onyẹ wẹ kedọnzi.

16Udọn lẹ omikẹn ya rịnị ndị ile gi okuni e bi, ya rịnị ndị wụ Izrẹlụ Osolobuẹ nke-esi!

17Gha ogẹnni e jẹn, ịhịan ya eyezilẹ m nsọngbu, makẹni apa (aparị) wẹ gi a marịn onyẹ wụ nke Jesu hụsọnmẹ m ẹhụ.

18Umunẹ m, ẹfọma Onyẹ-nwọnni-ẹnyi wụ Jesu Kristi ya nọyeni mmọn ụnụ ile. Isẹẹ.

← Chapter 5 Jump to: