Galatians 5

Ika 2018 Bible

← Chapter 4 Jump to: Chapter 6 →

1Kraịstị gbapụha ẹnyi kẹni ẹnyi wụrụ ndị nwọn enwẹn wẹ. Wuzokẹnmẹ ni nwan kẹ ndị werigụ enwẹn wẹ! Anịkwọlẹ ni wẹ kpọmazị ụnụ ẹgan igbọn!

2Gọn ni ntịn! Mmẹ wụ Pọlụ rị a gwa ụnụ nị ụnụ nị wẹ kwa ụnụ ugun, ya wụ nị onwọnni erere Kraịstị k'a bannị ụnụ.

3M rị a gwazị okẹnnyẹ ọwụlẹ hụn k'a nị wẹ kwa a ugun ya kwademẹkwọ n'o dọnmẹchanrịn Iwu ile.

4Onyẹ ọwụlẹ rị e dọnmẹ Iwu n'o gi ẹ wụrụ onyẹ ezi-omumẹ ẹnya Osolobuẹ a ghagụọ imẹ Kraịstị pụ; ọ ghagụọkwọ imẹ ẹfọma Osolobuẹ mẹ danpụ.

5Kanị, okukwe lẹ ikẹn Mmọn-nsọ kẹ ẹnyi nwẹn rị e gi che nị Osolobuẹ kuni ẹnyi ọhụnma ahụn ẹnyi rị a tụ ẹnya a.

6Makẹni, imẹ Kraịstị wụ Jizọsị, ịkwa-ugun lẹ akwanị-ugun enwọnni ihiẹn ọ wụ. Ihiẹn rị mkpa wụ okukwe rị e gi ihiẹn-ọsụsụọ a ghọsị enwẹn ẹ.

7Ụnụ te hụ a gba ọsọ elu-igwee ọhụnma! Onyẹ bu uke cheni ụnụ, ụnụ gizilẹni e sọn ezioku?

8Ẹlẹkwọ Osolobuẹ hụn kpọ ụnụ nu ụnụ d'e mẹ ihiẹnni ụnụ rị e mẹ!

9Ọ nọhụ kẹ wẹ e ku ẹ, “Ẹkẹrẹ yisti sụọ kẹ w'e buche, ọ ghagbarị brẹdi wẹ rị a gwọ.”

10Kanị obi ru m alị imẹ Di-nwọnni-ẹnyi nị ụnụ erokọ ihiẹn ichẹn, sọnmẹ nkuzi ọzọ. Onyẹ hụ rị e nuhunmẹni ụnụ — onyẹ ọwụlẹ ọ wụ — k'a narịnrịrị afụnfụn rịn'a.

11Umunẹ m, omẹni echẹn kẹ m rị e mẹ oku ịkwa-ugun, kị wẹ rị e kpokpozini m? Ẹlẹ nkẹ obe Kraịstị e sebehi oku?

12K'ọ rị m, ndị hụ rị e ye ụnụ nsọngbu e jẹn d'a waradẹ enwẹn wẹ, ẹlẹdẹ ịkwa-ugun sụọ!

13Ụnụ nwẹn, Osolobuẹ kpọ ụnụ d'e weri enwẹn ụnụ, umunẹ m, ka egikwọlẹ ni nị ụnụ nwọn enwẹn ụnụ mẹmẹ k'ọ rị ụnụ; ka gi ni ihiẹn-ọsụsụọ e fetarị ibe ụnụ.

14Makẹni, wẹ wegbamachanrịn Iwu ile imẹ iwu ohu hụn wụ “Ihiẹn ibe i k'a sụọrịrị ị kẹ ihiẹn enwẹn i dọn a sụọ ị.”

15Kanị, omẹni ụnụ hụ a tagbu ibe ụnụ e ri, kpachanpụkwọ nị ẹnya, amamgbe ụnụ e gbupụ ibe ụnụ!

16M sị ụnụ, a nị nị nwan Mmọn-nsọ a kị ụnụ, makẹ ụnụ gha e mẹ kẹ ịhịan-mmaka.

17Makẹni, ihiẹn ịhịan-mmaka a chọ ẹlẹ ihiẹn Mmọn-nsọ a chọ; ihiẹn Mmọn-nsọ a chọ ẹlẹ ihiẹn ịhịan-mmaka a chọ. Wẹ ẹbụbụọ a lụsọn ibe wẹ ọgụn e gbọndọn i emẹlẹ ihiẹn ị chọ n'ị mẹ.

18Kanị, omẹni Mmọn-nsọ rị a kị ụnụ, ya wụ nwan nị ụnụ arịzị okpuru iwu.

19Ihiẹn ịhịan-mmaka e mẹ pụhachanrịn ifọn; wẹ wụ ihiẹn ndịnị: ughẹrẹ, ibi obibi ru unyin, imẹ ihiẹn-ifẹnrẹn,

20ịrụa-mmọn, ịgwọ-ọgụn lẹ ịgba-ẹfa, idu-eṅẹnrẹn, ikpe, ẹnya-ụfụ, eje-olulu, ịchọ nke-i nke-i, nkebe, ịzụọ ẹka-nke,

21iwe-ẹnya, igbu-ọchụn, ịra-manya tụ, eje-mmẹmmẹ lẹ ihiẹn ndị ọzọ nọ ẹrịra. M rị nwan a gba ụnụ mkpịnsịn-ẹka ẹnya kẹ m dọn gba ụnụ ya mbụ, nị ndị hụn e mẹ ihiẹn nọ ẹrịra abankọ Alị-eze Osolobuẹ.

22Kanị, mkpụrụ Mmọn-nsọ a mịpụha wụ: ihiẹn-ọsụsụọ, ịghọghọ, udọn, ndidin, ẹfọma, imẹ-mma, ịwụ onyẹ wẹ gi e dọn ẹnya,

23imẹ-jụụ, ikwọndọn-enwẹn ịhịan. Onyẹ e mẹ ihiẹn ndịnị adannị iwu ọwụlẹ.

24Ndị hụn wụ nke Kraịstị Jizọsị a kpọgbugụọ ịhịan-mmaka wẹ te wụ lẹ ihiẹn a gụnn'a lẹ ihiẹn a sụọn'a elu obe Kraịstị.

25Ebe o mẹ ni Mmọn-nsọ e ye ẹnyi ndụn, nị ẹnyi e bi ni nwan kẹ ndị Mmọn-nsọ rị a kị.

26Ẹlẹ hụn ẹnyi e gi pachemẹ — a kpasu ibe ẹnyi iwe mọbụ e weni ibe ẹnyi iwe-ẹnya.

← Chapter 4 Jump to: Chapter 6 →