Joshua 16

Ika 2018 Bible

← Chapter 15 Jump to: Chapter 17 →

1Alị wẹ keye Ifrem lẹ Manasẹ hụn wụ ụmụ Josẹfụ gha ebe Iyi Jọdanị nọ ghafe Jẹriko, ẹbamịn ọwụwa-ẹnyanwụn mirin Jẹriko, ọ nọ ghasọnmẹ alị ọkpọ-nkụn rị ebẹhụ, d'a pụ alị ugu Bẹtẹlụ,

2gha Bẹtẹlụ (hụn wụ Luzu), gha ebahụn shi alị ndị Aki rị Atarọtụ,

3kpọtu, dọn ihun ẹbamịn ọdịdan-ẹnyanwụn, pụha alị ndị Jaf'lẹti, ghasọnmẹ ebẹhụ d'e ru ẹgbẹrẹ Bẹt-Họrọnụ Rị Mkpọtu oke, gha ebẹhụ shi Gẹza, pụha Ohimin-uku Mẹditerenia hụn ọ nọ kụsị.

4Ụmụ Josẹfụ wụ Manasẹ lẹ Ifrem nọ nwọnhẹn alị wẹ.

5Hụn ru ebọn Ifrem lẹ ikpụlọ ndị rịn'a ẹka wụ ndịnị: nkọ ọwụwa-ẹnyanwụn, ebe alị wẹ keye wẹ gha wụ gha Atarọtụ-Ada d'e ru Bẹt-Họrọnụ Rị Ugu,

6gbasọnmẹ d'e ru Ohimin Uku Mẹditerenia. Mik'mẹtatị k'ọ gha nkọ ẹbamịn-ugu, gha ebahụn gbegi shi ẹbamịn ọwụwa-ẹnyanwụn, pụha Taanatị-Shilo, fetu ẹ pụha Janụa rị ẹbamịn ọwụwa-ẹnyanwụn;

7ọ nọ gha Janụa kpọtu d'e ru Atarọtụ lẹ Naara, gha Jẹriko d'a pụha Iyi Jọdanị.

8Gha Tapụa shi ẹbamịn ọdịdan-ẹnyanwụn, pụha Ọdanmgbugbu Kana. Ohimin Mẹditerenia k'o ru, ọ ghagụ Kana pụha Mik'mẹtatị. Ọhụn wụ alị wẹ keye ebọn Ifrem lẹ ikpụlọ ndị rịn'a.

9O nwọnghọzị obodo lẹ ụmụ-alị ndị wẹ butọnị ebọn Ifrem imẹ hụn wẹ keye ebọn Manasẹ.

10Kanị, ndị Ifrem achụpụnị ndị Kenaanị bi Gẹza: ndị Kenaanị bikwọ imẹ igunrun ndị Ifrem d'e ru tannị, kanị wẹ wụ nwan igbọn a rụnnị wẹ ọrụn.

← Chapter 15 Jump to: Chapter 17 →