Joshua 17

Ika 2018 Bible

← Chapter 16 Jump to: Chapter 18 →

1Ọnwan kẹ wẹ keye ebọn Manasẹ, makẹni ịya wụ nwa-ibuzọ Josẹfụ. Ụmụ Makiri nwa-ibuzọ Manasẹ wụkwasị ndị wẹ keye ẹ. Makiri wụ nẹdi Gilẹdị. E keyegụọ wẹ ụfọdụ ụmụ a ẹgbẹrẹ Gilẹdị lẹ Bashanị makẹni wẹ wụ ezigbo ndị-agha.

2Hụnnị wụ nwan hụn wẹ keye ebọn Manasẹ họdụnị, hụn wụ ụmụ Abiẹza, Hẹlẹki, Asriẹlụ, Shẹkẹm, Hẹfa lẹ Shẹmida, ikẹnnyẹ ebọn Manasẹ nwa Josẹfụ; wẹ keye wẹ ya ikp'ụlọ-ikp'ụlọ.

3Zẹlofẹhadị nwa Hẹfa nwa Gilẹdị nwa Makiri nwa Manasẹ amụnị okẹnnyẹ; ikpoho sụọ k'ọ mụ; ẹfan wẹ wụ Mala, Nụa, Họg'la, Mil'ka lẹ Tẹza.

4Wẹ jẹn d'e kunrun onyẹ nchụn-ẹjan wụ Ẹliẹza lẹ Joshụa nwa Nọnụ lẹ ndị-isi, sị, “Osolobuẹ gwa Mozizi keye ẹnyi ukuu imẹ hụn ru ikẹnnyẹ ebọn ẹnyi.” Ya kẹ Joshụa nọ keye wẹ alị k'o dọn keye umunẹ nẹdi wẹ ikẹnnyẹ, kẹ Osolobuẹ dọn ku.

5Ya alị wẹ ye Manasẹ nọ nwan mẹ ụzọ iri, wezụka ẹgbẹrẹ Gilẹdị lẹ Bashanị, hụn rị nfetu Iyi-Jọdanị,

6makẹni wẹ ye ikpoho Manasẹ ndị ahụn alị kẹ wẹ dọn ye ikẹnnyẹ wẹ. Alị Gilẹdị kẹ wẹ ye ndị Manasẹ họdụnị.

7Alị Manasẹ gha Asha d'e ru Mik'mẹtatị hụn rị ẹbamịn ọwụwa-ẹnyanwụn Shẹkẹm. Alị hụ ruzi ebe ndị bi Ẹni-Tapụa rị ẹbamịn ẹka-ekpẹn ẹnyanwụn.

8(Alị Tapụa wụ nke Manasẹ, kanị obodo Tapụa lẹ enwẹn ẹ hụn rị ebe Manasẹ ru wụ nke ebọn Ifrem.)

9Alị Manasẹ ghasọnmẹ ẹbamịn ndịdan-mirin hụ, pụha Ọdanmgbugbu Iyi udu-mirin Kana. Ifrem nwọnsọnmẹzi obodo imẹ alị Manasẹ, kanị Ọdanmgbugbu Kana ahụn kẹ alị Ifrem ru. Nke Manasẹ rị ẹbamịn-ugu Ọdanmgbugbu hụ, ghasọnmẹ ebahụn d'a pụha Ohimin Uku Mẹditerenia.

10Ya wụ, alị Ifrem rị Manasẹ ẹbamịn ndịdan-mirin; Ohimin rị a ẹbamịn ọdịdan-ẹnyanwụn; Asha rị a ẹbamịn-ugu; Isaka rị a ẹbamịn ọwụwa-ẹnyanwụn.

11Manasẹ nwọnzi ndịnị rị imẹ alị Isaka lẹ Asha: Bẹt-Shanị lẹ Ibliam lẹ ndị bi Dọ, Ẹndọ, Taanakị lẹ Mẹgido, uwẹ ile lẹ ụmụ-alị wẹ. Dọ hụn mẹ wẹ ẹtọ wụzị Nafọtụ.

12Kanị ndị Manasẹ asanị ẹka weri obodo ndị ahụn, makẹni ndị Kenaanị bu isi-ikẹn nọdị ẹgbẹrẹ hụ.

13K'osilẹrị, mgbe ndị Izrẹlụ gi kẹnrẹn, wẹ nọ gi ndị Kenaanị họnrin igbọn a rụnnị wẹ ọrụn, kanị achụpụchanrịnnị wẹ wẹ.

14Ụmụ Josẹfụ wụ ebọn Ifrem lẹ ebọn Manasẹ sị Joshụa, “Kị haịn i gi ye ẹnyi alịnị sụọ — bụ ẹnyi e bukẹmẹkẹ ọda makẹni Osolobuẹ a gọzigụọ ẹnyi ọda-ọda?”

15Joshụa nọ sị wẹ, “Omẹni ụnụ e bukẹ ọda, nị alị-ugu Ifrem a ehini ụnụ, shi ni nwan ẹgboko, d'a sụnrụn alị imẹ alị hụ ndị Pẹrẹzi lẹ ndị adụn-aran Rẹfa bi.”

16Ụmụ Josẹfụ nọ sị, “Alịnị lẹ ugu ẹ ndịnị ehini ẹnyi. Kanị ndị Kenaanị ile bi alị-aradan nwọn ụgbọ-ẹshin igwe wẹ gi a lụ agha, kẹ ndị bi Bẹt-Shanị lẹ ụmụ-alị Bẹt-Shanị kẹ ndị bi Ọdanmgbugbu Jezriẹlụ.”

17Kanị Joshụa nọzị sị ikpụlọ Josẹfụ wụ ndị Ifrem lẹ ndị Manasẹ, “Ezioku-ezioku, ụnụ bu ọda, nwọn ndụn ọda-ọda, ụnụ ẹlẹ ndị w'e ye alị ohu sụọ;

18werizi ni alị-ugunị. Ọ sụọn'a nị o mẹ ẹgboko-ẹgboko, sụnchanpụ n'a werichanrịn, d'e ru ebe o ru; ọ sụọn'a ndị Kenaanị rịn'a ze eze, nwọn ụgbọ-ẹshin igwe, ụnụ k'a s'ẹka chụpụ wẹ.”

← Chapter 16 Jump to: Chapter 18 →