Joshua 18

Ika 2018 Bible

← Chapter 17 Jump to: Chapter 19 →

1Ya ndị Izrẹlụ ile nọ zu imẹ Shilo, nọ ebẹhụ tumẹ Ọdụ Osolobuẹ wụ Ọdụ-ozuzu. E bugụọ wẹ alị ile che okpuru wẹ;

2kanị, ebọn ẹsa imẹ Izrẹlụ eke nwọnhẹn alị.

3Ya Joshụa nọ sị ndị Izrẹlụ, “Elee ogẹn kẹ ụnụ k'a nọru d'e werisọnmẹ alị hụn Osolobuẹ wụ Chuku ndị nẹdi ụnụ kanị ye ụnụ?

4Wepụha nị ikẹnnyẹ ẹtọ-ẹtọ imẹ ebọn ọwụlẹ. M jẹnkọ d'e zipụ wẹ d'a ghahunmẹ alị họdụnị, detuchanrịn k'ọ nọ lẹ hụn sikọ d'e ru onyẹ-onyẹ ẹka. O mẹgụ e kinhẹn wẹ d'e kunrun m.

5Ụzọ ẹsa kẹ ụnụ sikọ d'e kebe ẹ; Juda sikọ d'a nọsọnmẹ hụn rugụ wẹ ẹka nkọ ẹbamịn ẹka-ekpẹn ẹnyanwụn, ndị ikpụlọ Josẹfụ a nọsọnmẹ hụn rugụ wẹ ẹka nkọ ẹbamịn-ugu.

6Ụnụ kebegụ alị họdụnị ụzọ ẹsa, detu, ụnụ e wẹhẹni m'ẹ ebeni; m sikọ d'a nọ ihun Osolobuẹ wụ Chuku ẹnyi nyan utẹn ẹ gi keni ụnụ ya.

7Ndị Livaị esọnkọ ụnụ keri, makẹni ọrụn nchụn-ẹjan wẹ rị a rụn nị Osolobuẹ wụ ukuu wẹ; Gadị lẹ Rubẹni lẹ mgbube ebọn Manasẹ e nwọnringụọ alị wẹ nfetu Jọdanị, ẹbamịn ọwụwa-ẹnyanwụn Iyi Jọdanị, alị hụ odibo Osolobuẹ wụ Mozizi ye wẹ.”

8Ogẹn ikẹnnyẹ ndị ahụn Joshụa zi gi pụkọ, Joshụa nọ sị wẹ, “Ghahunmẹchanrịn nị alị hụ ile, ụnụ e detu k'ọ nọ, ụnụ e kinhẹn d'e kunrun m, nị m nọ ihun Osolobuẹ imẹ Shilo ebeni nyan utẹn Osolobuẹ gi keni ụnụ ya.”

9Ya ikẹnnyẹ ndị ahụn nọ ghahunmẹchanrịn alị hụ, kebe ya lẹ obodo ndị rịn'a ụzọ ẹsa, detuchanrịn kẹ wẹ nọ; wẹ nọ kinhẹn d'e kunrun Joshụa imẹ Shilo ebe ndị Izrẹlụ ziẹntọ.

10Ya Joshụa nọ nọ Shilo nyannị wẹ utẹn Osolobuẹ idẹnya Osolobuẹ, keyesọnmẹ ndị Izrẹlụ alị ebọn, ebọn.

11Ebọn Bẹnjamini lẹ ikpụlọ ndị rịn'a kẹ wẹ bu ụzọ keye alị ogẹnni. Alị wẹ keye wẹ rị ẹgbata nke Juda lẹ nke ụmụ Josẹfụ.

12Nkọ shi ẹbamịn-ugu, Iyi Jọdanị kẹ alị Bẹnjamini gha bidọn, pụha nkpọtu Jẹriko rị ẹbamịn-ugu; gha ebẹhụ shi alị-ugu ẹbamịn ọdịdan ẹnyanwụn, ghasọnmẹ ẹrịra d'a pụ alị ọkpọ-nkụn Bẹt-Avẹni.

13Ọ nọ gbegi shi ẹbamịn ndịdan-mirin, ghasọnmẹ ẹrịra d'a pụha nkpọtu Luzu (Luzu wụ Bẹtẹlụ), shi Atarọtụ-Ada, elu ugu rị ẹbamịn ndịdan-mirin Bẹt-Họrọnụ Rị Ndịdan.

14Ọ nọ ẹbamịn ọdịdan-ẹnyanwụn ugu ahụn rị ihun Bẹt-Họrọnụ Rị Ndịdan gbegi, dọn ihun ẹbamịn ndịdan-mirin, pụha Kiriatị-Baalụ (hụn wụ Kiriatị-Jiarim), obodo ndị ebọn Juda. Ebeni k'o ru nkọ shi ọdịdan-ẹnyanwụn.

15Ẹbamịn ndịdan-mirin, alị ebọn Bẹnjamini gha mkpẹnrẹn Kiriatị-Jiarim bidọn, ghasọnmẹ d'a pụha isi-mirin Nẹf'tụa;

16gha ebẹhụ kpọtu, shi ukun Ugu hụn bu ihun zinmẹ Ọdanmgbugbu Bẹn-Hinọm, hụn rị ẹbamịn-ugu Ọdanmgbugbu ndị Rẹfa; ọ nọ nwan ghasọnmẹ Ọdanmgbugbu Bẹn-Hinọm, ghakọ nkpọtu obodo ndị Jebusu (wụ Jerusalẹm) d'e ru Ẹn-Rogẹlụ.

17Ọ nọ dọn ihun ẹbamịn-ugu, pụha Ẹn-Shẹmẹshi, gha ebẹhụ shi Gẹlilọtụ hụn bu ihun zinmẹ ebe wẹ gha e fetu ugu Adumim, ghasọnmẹ ẹrịra d'e ru Ọmụma Bohanị nwa Rubẹni,

18ghapụha nkpọtu ugu bu ihun zinmẹ Araba, gha a ẹbamịn-ugu kpọtu, pụha nwan Araba.

19Ọ nọ gha Araba pụha nkpọtu Bẹt-Họg'la ebe ọ nọ bu ihun zinmẹ ẹbamịn-ugu, pụha ebẹhụ ngugu-mirin rị Ohimin Nnu, ebẹhụ Iyi Jọdanị nọ kunrun Ohimin ahụn. Ebeni k'ọ gha ẹbamịn ndịdan-mirin.

20Iyi Jọdanị k'o ru ẹbamịn ọwụwa-ẹnyanwụn. Ebẹhụ kẹ alị wẹ keye ebọn Bẹnjamini lẹ ikpụlọ ndị rịn'a ghasọnmẹ azụụn ile.

21Obodo ndịnị wụ nke ebọn Bẹnjamini lẹ ikpụlọ ndị rịn'a: Jẹriko, Bẹt-Họg'la lẹ Ẹmẹki-Kẹzizi;

22Bẹt-Araba, Zẹmaraịm lẹ Bẹtẹlụ;

23Avim, Para lẹ Ọfra;

24Kẹfa-Amọni, Ọfni lẹ Gẹba — obodo mmẹbụọ lẹ ụmụ-alị wẹ;

25Gibiọnụ, Rama lẹ Biẹrọtụ;

26Mizpa, Kẹfira lẹ Moza;

27Rẹkẹm, Ẹpilu lẹ Tarala;

28Zẹla, Hẹlẹfụ, obodo ndị Jebusu (wụ Jerusalẹm), Gibia lẹ Kiriatị — obodo mmẹnọ lẹ ụmụ-alị wẹ. Ọnwan wụ ukuu ndị ebọn Bẹnjamini lẹ ikpụlọ ndị rịn'a.

← Chapter 17 Jump to: Chapter 19 →