Joshua 23

Ika 2018 Bible

← Chapter 22 Jump to: Chapter 24 →

1O tebe ọda-ọda, ogẹn Osolobuẹ gi mẹrigụnị ndị Izrẹlụ ndị iṅẹnrẹn wẹ ile fihunmẹni wẹ, yegụ wẹ ezumikẹn, ogẹn Joshụa nkẹ gi kagụ ẹgẹdi ọda-ọda,

2Joshụa nọ kpọ ndị Izrẹlụ ile — ndị-ichẹn lẹ ndị-isi lẹ ndị a han eṅẹn lẹ ndị gisọnmẹ ọkwa imẹ Izrẹlụ, sị wẹ, “A kagụọ m nwan ẹgẹdi ọda-ọda.

3Ụnụ lẹ enwẹn ụnụ a hụngụọ ihiẹn ile Osolobuẹ wụ Chuku ụnụ gi ufiri ụnụ mẹ ndị alị ndịnị wẹ; Osolobuẹ wụ Chuku ụnụ wụ onyẹ hụn lụnị ụnụ ọgụn.

4Lee ẹ, e keyegụọ m ebọn-ebọn imẹ ụnụ ukuu ụnụ, alị ndị Kenaanị wẹ kelẹni chụpụ lẹ alị ndị ahụn m mẹrigụ: ẹgbata Iyi Jọdanị lẹ Ohimin-Uku Mẹditerenia rị ẹbamịn ọdịdan-ẹnyanwụn.

5Osolobuẹ wụ Chuku ụnụ lẹ enwẹn ẹ sikọ d'a chụpụnị ụnụ wẹ. O jẹnkọ d'e nupụnị ụnụ wẹ, ụnụ e weri alị wẹ kẹ Osolobuẹ wụ Chuku ụnụ dọn kwe ụnụ nkwa.

6“Kakẹnmẹkwọ nị nwan; dọnrinkwọ nị ẹnya mẹchanrịn ihiẹn ile wẹ de imẹ Ẹkụkwọ iwu Mozizi, alatọkwọlẹ n'a kụye ẹka-nni mọbụ ẹka-ekpẹn.

7Esọnkwọlẹ ni alị ndịnị họdụ imẹ igunrun ụnụ kpa; akpọkwọlẹ ni ẹfan mmọn-lẹ-iyi wẹ mọbụ kun wẹ. Efekwọlẹ ni wẹ mọbụ kpọnị wẹ isi alị.

8Ka kwọnkẹnmẹkwọ nị Osolobuẹ wụ Chuku ụnụ kẹ ụnụ dọn kwọndọn ẹ d'e ru ogẹnni.

9“Osolobuẹ a chụpụgụọnị ụnụ alị rị ichẹn-ichẹn ndị rịn'a bugbu enwẹn wẹ ọda, alị ndị nwọn ikẹn ọda-ọda; o ke nwọn onyẹ sa ẹka che ụnụ ọgụn d'e ru tannị.

10Onyẹ ohu imẹ ụnụ hụ a chụ mmadụ nnụ-uku ọsọ makẹni Osolobuẹ wụ Chuku ụnụ rị a lụnị ụnụ ọgụn k'o dọn kwe ụnụ nkwa.

11Dọnrin ni nwan ẹnya e nwọn ihiẹn-ọsụsụọ Osolobuẹ wụ Chuku ụnụ.

12“Kanị ụnụ makwọ ama gbehutọ, bannị ndị alị ndịnị họdụ imẹ igunrun ụnụ, ụnụ lẹ wẹ a lụtarịma di lẹ nwunyẹ, mẹkọma,

13marịnkwọ nị nị Osolobuẹ wụ Chuku ụnụ achụpụkọzịnị ụnụ ndị alị ndịnị. Kama, a wụrụ nị wẹ ụnụ uke lẹ ọnyan, mkpịnsịn hụn k'a gha a fịan ụnụ ụgba-azụụn lẹ ogun k'a gha a dụn ụnụ ẹnya, d'e runi ụnụ a la iwi imẹ alị-ọmanị Osolobuẹ wụ Chuku ụnụ ye ụnụ.

14“M'e d'a gha nwan ụzọ ndị ile bịa ụwa a gha. Ụnụ a marịngụọ imẹ obi ụnụ ile lẹ umẹ-ndụn ụnụ ile nị onwọnni kaka akpụ nkwa ohu mẹzulẹni imẹ nkwa-ọma ile Osolobuẹ wụ Chuku ụnụ kwe ụnụ. Nkwa ile o kwe e mẹzuchanrịngụọ; onwọnni hụn mẹzulẹni.

15“Kanị, kẹ nkwa-ọma ile Osolobuẹ wụ Chuku ụnụ kwe ụnụ dọn mẹzuchanrịn, ẹrịra kẹ Osolobuẹ k'a dọn wẹhẹni tan ụnụ eje-ihiẹn ile o ku oku ẹ, d'e ru n'o gbupụchanrịn ụnụ imẹ alị-ọmanị o ye ụnụ.

16Ụnụ latọ Iwu Osolobuẹ wụ Chuku ụnụ gi kwọngbama ụnụ lẹ ya, Iwu ọ sị ụnụ dọnmẹ, jẹn d'e femẹ mmọn-lẹ-iyi, kpọmanị wẹ isi alị, Osolobuẹ sikọ d'e gi olulu ẹ rị a dụn kẹ ọkụn sọn ụnụ, ụnụ a la iwi ozigbo-ozigbo imẹ alị-ọma hụ o ye ụnụ.”

← Chapter 22 Jump to: Chapter 24 →