2 Corinthians 12

Ilokano (Ti Biblia (1973))

← Chapter 11 Jump to: Chapter 13 →

1Masapul ti agpasindayaw nupay saan a maiparbeng; ngem saritaecto dagiti parparmata ken dagiti paltiing ti Apo.

2Am-ammoc ti maysa a tao ken Cristo, ket sangapulo ket uppat a tao-en itan (diac ammo no sibabagi, diac met ammo no saan a sibabagi; ti Dios ammona) naipangato agingga iti maicatlo a langit.

3Ket siac ammoc daydi a tao, a (diac ammo, no sibabagi wenno saan a sibabagi; ti Dios ammona.)

4Naipan idiay Paraiso, ket nangngegna dagiti sao a saan a mayebcas, a saan a rebbeng a sao-en ti maysa a tao.

5No maipapan itoy a tao agpasindayawacto, ngem no maipapan caniac met laeng saanacto nga agpasindayaw, no di cadagiti kinacapuyco.

6Ta uray no cayatco coma ti agpasindayaw, saanacto a nacuneng, ta sao-ecto ti pudno: ngem agteppelac tapno awan ti mangipapan caniac a nangatngatoac ngem iti panagkitana caniac wenno ti mangngegna a maipapan caniac.

7Ket tapno saanac coma a maidaydayaw iti aglablabes, gapu iti cadackel dagiti palti-ing, naited ti maysa a siit iti lasagco, maysa a babaonen ni Satanas a mamarigat caniac, tapno saanac coma a maidaydayaw iti aglablabes.

8No maipapan itoy, namitlo a nagcararagac iti Apo, tapno mayadayu coma caniac.

9Ket isu kinunana caniac: Ti paraburco macaanay kenca; ta ti pannacabalinco mangan-anay ti kinacapuy. Gapuna, siraragsacac unay nga agpasindayaw a nangnangrona cadagiti kinacapuyco, tapno ti pannacabalin ni Cristo salucubannac.

10Gapuna mapnecac cadagiti kinacapuy, cadagiti pannacauy-uyaw, cadagiti pacasapsapulan, pannacaidadanes, cadagiti rigrigat gapu ken Cristo: ta inton nacapuyac, isu ti capigsa.

11Naaramidac a nacuneng: dacayo ti nangipapilit caniac; ta siac coma ti indaydayawyo: ta iti uray ania saanac a maatiw cadagita cangatoan nga apostol; uray no awan met ti capapay-ac.

12Pudno a dagiti pacakitaan ti kinaapostol naaramidda iti tengngayo, iti isu-amin nga anus, babaen cadagiti pagilasinan ken datdatlag ken pannacabalin.

13Ta ania ti nacaat-atiwanyo cadagiti sabali nga Iglesia, no saan laeng a daytoy, ti diac panagpaawit cadacayo? Pacawanendac iti daytoy a biddut.

14Adtoy, daytoy ti maicatlo a daras a sisasaganaac nga umay cadacayo; ket saanac nga umay paawit cadacayo: ta diac sapulen ti cucuayo, no di dacayo; ta dagiti annac saanda a rebbeng ti agurnong ti sanicua a maipaay cadagiti ammada, no di ket dagiti amma agurnongda ti maipaay cadagiti annac.

15Ket siaayatac unay nga aggastonto ket magastoacto gapu cadagiti carcararuayo; ta no dungdungoencayo a nangnangrona, basbassit aya ti pannacadungngoc?

16Nupay casta siac diac pinaawit cadacayo; ngem idinto ta nasicapac, tiniliwcayo babaen ti al-lilaw, casta ti cunada.

17Nagsicapancayo aya gapu iti siasinoman cadagiti binaonco cadacayo?

18Binalacadac ni Tito ket imbaonco ti cabsat a kimmuyog kencuana. Sinicapannacayo iti aniaman ni Tito? Saancami aya a sangsangcatimpuyog iti espiritu ken iti maymaysa a pannagna?

19Pagarupenyo aya a nabayagen nga agpampambarcami cadacayo? Iti imatang ti Dios agsaocami babaen ni Cristo, ngem isu-amin a banag, ay-ayatec, maipaayda a pacapalainganyo.

20Ta maamacac, di laket ta gapu iti aniaman inton dumtengac, masaracancayo a casla ti diac coma cayat, ken masaracandac met a cas ti dicay coma cayat; di-laket ta adda ringgor, im-imun, pungpungtot, panagsisina, panagiinnuyaw, tantanabutob, tangtangsit, kibkibor;

21Di-laket ta inton dumtengac manen, ti Diosco pababaennac iti sangoyo, ket addanto pagladingitac cadagiti adu cadagiti nagbasol idi, ket saanda a nagbabawi iti kinarimon ken pannakicamalala ken kinaderrep nga inaramidda.

← Chapter 11 Jump to: Chapter 13 →