2 Corinthians 7

Ilokano (Ti Biblia (1973))

← Chapter 6 Jump to: Chapter 8 →

1Yantangay adda cadatayo dagitoy a carcari, ay-ayatec, agdalustay coma iti isu-amin a kinarugit ti lasag ken espiritu nga an-anayentayo ti kinasanto iti panagbuteng iti Dios.

2Luctanyo dagiti puspusoyo cadacami; awan ti rinanggasanmi, awan ti dinadaelmi, awan ti tinacawanmi.

3Saanco a sawen daytoy, tapno pabasolencayo; ta sinaocon nga addacay cadagiti puspusomi, tapno matay ken agbiagtayo nga agtitimpuyog.

4Dackel ti turedco nga agsao cadacayo; dackel ti dayawco gapu cadacayo: napnoanac iti liwliwa, agluplupias ti ragsacco iti tengnga dagiti amin a rigatmi.

5Ta uray idi dimtengcam ditoy Macedonia, ti bagimi awan idi ti panagtalnana, ta uray sadino a turong maparigatancami; iti ruar riribuc, iti uneg dandanag.

6Nupay casta, ti Dios a mangliwliwa cadagiti naemma, liniwliwanacami gapu iti iyaay ni Tito;

7Ket saan laeng a gapu iti iyaayna no di met gapu iti liwliwa a nacaliwliwaanna cadacayo, idi impadamagna cadacami ti narayray nga essemyo, ti sangityo, ti regtayo gapu caniac; iti casta nagragsacac ti adadda pay.

8Ta uray no pinagladingitnacayo daydi suratco saanco a ladingiten, uray no nagladingitac idi; (ta makitac a daydi a surat pinagladingitnacayo, nupay apagbiit),

9Ita agragsacac; saan a gapu ta nagladingitcayo, no di ket gapu ta nagladingitcayo iti maipaay iti panagbabawi, ta nagladingitcayo a mayannurot iti Dios tapno awan coma ti pannacadadael a sagabaenyo nga agtaud iti biangmi.

10Ta ti panagladingit a mayannurot iti Dios pataudenna ti panagbabawi a pacaisalacanan, a saan a pagbabawyan; ngem ti ladingit ti lubong pataudenna ti ipapatay.

11Adtoy ngarud, daytoy met laeng a panagladingityo a mayanurot iti Dios, ania ket nga annaden ti pinataudna cadacayo, ania ket a panangipalawagyon iti casasaadyo met laeng, ania ket a pungtoten, ania ket a butengen, ania ket nga essemen, ania ket a regtan, ania ket a kinalinteg ti pammalesen! Iti isu-amin nagparangcayo a nadalus itoy a panggep.

12Iti casta ngarud, uray no nagsuratac cadacayo, saan a gapu iti daydi nagaramid ti dakes, saan met a gapu iti daydi nagsagaba ti dakes, no di ket tapno maiparangarang ti regtayo a maipaay cadacami iti imatang ti Dios.

13Gapuna naliwliwacami: ket iti pannacaliwliwami, agragragsaccami a nangnangrona pay, gapu iti rag-o ni Tito: agsipud ta napapigsa ti espirituna gapu cadacayo amin.

14Ta no adda aniaman a nagpasindayawac kencuana iti maipapan cadacayo, saanac a naibabain; no di ket cas iti kinunami cadacayo a pudnoda amin, casta met ti panagpasindayawmi ken Tito, nasaracan nga agpayso.

15Ket ti dongngona cadacayo, ad-adda pay, no malagipna ti kinatulocyo amin, ken no casano ti panangawatyo kencuana a sidadayaw ken sibubutengcayo.

16Agragsacac gapu ta cadagiti isu-amin adda maan-anay a panagtalecco cadacayo.

← Chapter 6 Jump to: Chapter 8 →