2 Corinthians 4

Ilokano (Ti Biblia (1973))

← Chapter 3 Jump to: Chapter 5 →

1Gapuna, idinto ta adda cadacami daytoy a panagaywan, cas iti pannacagunodmi ti asi, saancam nga agcapuy:

2No di ket nagpanawanmi dagiti mailemlemmeng a nacababain, a dicam agsicsicap ken saanmi a killoen ti sao ti Dios, no di ket, iti panangiparangarang ti pudno, italecmi ti bagimi iti conciencia dagiti amin a tattao, iti imatang ti Dios.

3Ket no ti evangeliomi naabbongan pay laeng, naabbongan a maipaay cadagiti mapucaw:

4Cadacuada ti dios a nailubongan binulsecna dagiti isisip dagiti saan a mamati, tapno di agraniag cadacuada ti lawag ti evangelio ti dayag ni Cristo, isu a ladawan ti Dios.

5Ta dicam icascasaba dagiti bagbagimi, no di ni Cristo Jesus, nga Apo, ket dacami dagiti cas adipenyo, gapu ken Jesus.

6Ta ti Dios kinunana: Tumpuarto ti silaw iti casipngetan, isu a naglawag cadagiti puspusotayo, a maipaay iti pannacalawag ti pannacaammo iti dayag ti Dios, iti langa ni Jesu-Cristo.

7Ngem addaancami iti daytoy a gameng cadagiti damili a vaso, tapno ti naindaclan a pannacabalin, biang coma ti Dios, a saan a cadacami;

8Cadagiti isu-amin a disso mailetancami, ngem saan a maparigat unay; agduaduacami, ngem saan a maiccat ti inanamami;

9Naidadanescami, ngem saan a nabaybay-an; naituangcami, ngem saancami a napucaw;

10Nga itugtugotmi nga agnanayon iti bagimi ti ipapatay ni Jesus tapno ti biag ni Jesus maiparangarang met iti bagimi.

11Ta dacami nga agbiag, agnanayon a maiyawatcami ken patay gapu ken Jesus, tagno ti biag met ni Jesus maiparangarang iti lasagmi a matay.

12Iti casta, ti patay agaramid cadacami, ngem ti biag, cadacayo.

13Ngem, idinto nga adda daydiay met laeng nga espiritu ti pammati, cas adda a naisurat; Namatiac ket gapuna nagsaoac: Mamaticami met ket gapuna nga agsaocami met;

14Nga ammomi a ti namagungar ken Apo Jesus, pagungarennacamto met gapu ken Jesus; ket iparangnacamto a maicuyog cadacayo.

15Ta isu-amin maigapu cadacayo; tapno idinto nga immadu ti parabur gapu cadagiti adu, ti panagiaman umadu met a pacaidayawan ti Dios.

16Gapuna, saancam a maupay; ngem uray ti tao a makinruar cumapuy la a cumapuy, ti tao a makin-uneg mapabaro nga inaldaw.

17Ta ti nalag-an a sagabami, nga apagcanito laeng, agaramid cadacami ti saan a marucud a cangato ken agnanayon a cadackel ti dayag:

18Idinto a dicam kitaen dagiti banbanag a makita, no di ket dagiti saan a makita; ta dagiti banbanag a makita saanda a mataginayon ngem dagiti saan a makita, mataginayonda.

← Chapter 3 Jump to: Chapter 5 →